नेकपा (संयुक्त) द्वारा सरकारलाई दिएको समर्थन फिर्ता

लिम्वूवान डट व्लगस्पोट डटकम,काठमाडौं
फागुन १० नेपाल कम्युनिष्ट पार्टी संयुक्तले डा. बाबुराम भट्टराईको नेतृत्वमा बनेको सरकारलाई दिएको समर्थन फिर्ता लिएको घोषणा गरेको छ। नेकपा संयुक्तको फागुन ३–४ गते काठमाडौंमा बसेको केन्द्रीय कार्यसमितिको बैठकले वर्तमान सरकारले राष्ट्रघाती काम गर्न थालेको भन्दै सरकारलाई दिएको समर्थन फिर्ता लिने निर्णय गरेको भए पनि आज समर्थन फिर्ता लिएको आधिकारिक घोषणा गरेको हो। बुधबार रिपोर्टर्स क्लब नेपालमा पत्रकार सम्मेलन गर्दै नेकपा संयुक्तले शान्ति प्रक्रिया र संविधान निर्माण गर्नतिर भन्दा पनि भ्रष्टाचार, महङ्गी, नागरिक असुरक्षा, हत्या, आतङ्क र लुटपाट जस्ता अनैतिक कार्यमा सरकार लिप्त हुँदै गएको हुनाले सरकारलाई दिएको समर्थन फिर्ता लिन बाध्य भएको जानकारी गराएको थियो। पत्रकार सम्मेलनमा वितरित प्रेस विज्ञप्तिमा भनिएको छ– सत्तामा आसिन मन्त्रीहरुबाटै पटक–पटक देश टुक्रिन सक्ने अभिव्यक्ति, मन्त्रीको लहडवाजीमा नागरिकता बाँड्ने प्रयास, अपराधमा संलग्नलाई सरकारी संरक्षण, कानुनविहीनताको स्थितिमा पनि सत्ता टिकाउने खेलमा सरकार लागिपरेकाले बाध्य भएर समर्थन फिर्ता लिएका हौं। पत्रकार सम्मेलन बोल्दै पार्टी अध्यक्ष चन्द्रदेव जोशीले भने– माओवादीको नेतृत्वमा शान्ति र संविधान निष्कर्षमा पुग्छ भनेर समर्थन दिएका थियौं तर सरकारमा आसिन मन्त्रीहरुको रवैयाले हाम्रो समर्थन फिर्ता लिन बाध्य बनाएको हो।