राष्ट्रिय सरकार बनाउन दाहाल-नेपाल भेट

लिम्वूवान डट व्लगस्पोट डटकम,काठमाडौं

फागुन ७,एकीकृत नेकपा माओवादीका अध्यक्ष पुष्पकमल दाहाल र एमाले वरिष्ठ नेता माधवकुमार नेपालबीच राष्ट्रिय सरकार गठनका विषयमा छलफल भएको छ। आज बिहान दुई नेताबीच नेपाल निवास कोटेश्‍वरमा पौने घन्टा छलफल भएको एमाले प्रचार विभाग सदस्य विष्णु रिजालले जानकारी दिए। भेटमा सेना समायोजनबारे छलफल भएको थियो। माओवादीले लडाकु समायोजनामा नेपाली सेनामा उपल्लो पद खोजेपछि नेता नेपालले त्यसको कडा आलोचना गर्दै आएका थिए। नेपालको कडा टिप्पणी सार्वजनिक हुन थालेपछि दाहाल उनको निवासमा पुगेर शान्ति प्रकृया टुङ्गोमा पुर्‍याउन नेपाललाई सक्रिय हुन भनेका थिए। नेपालले प्रतिउत्तरमा पहिले भएका सम्झौता पालन गर्ने हो भने समायोजन र शान्ति प्रकृयामा कुनै अवरोध नहुने बताएका थिए। त्यसका लागि माओवादी नै जिम्मेवार हुनुपर्ने उनको तर्क थियो।

'विगतमा जे सहमति भएको छ त्यति मात्रै कार्यान्वयन गर्ने हो भने पनि शान्ति प्रक्रिया तुरुन्त टुंग्याउन सकिन्छ र त्यही आधारमा संविधानका विवादित विषयहरुमा पनि निष्कर्षमा पुग्न सकिन्छ,' नेपाललाई उदृत गर्दै रिजालले जानकारी गराए। जवाफमा दाहाले आफ्नो पार्टीभित्रको समस्याका बाबजुद आफू पनि शान्ति प्रक्रिया छिटो टुंग्याउन तल्लिन रहेको जानकारी दिँदै यसमा एमाले-कांग्रेसलगायतका दलहरुको पनि सकारात्मक भूमिका हुनुपर्ने बताएका थिए। उनको भनाइ थियो, 'अब यस प्रक्रियाबाट कोही पछि हट्न सक्दैन । यसलाई निष्कर्षमा पुर्याउनुको विकल्प छैन ।'