संसद् अवरोध हटाउन दाहालको आग्रह

लिम्वूवान डट व्लगस्पोट डटकम,काठमाडौं

माघ १८ - माओवादी अध्यक्ष पुष्पकमल दाहालले जारी संसद् अवरोध हटाउन कांग्रेस सभापति सुशील कोइरालालाई आग्रह गरेका छन् । कोइराला निवास महाराजगञ्जमा बुधबार भएको भेटमा दाहालले संसद् नचल्दा शान्ति र संविधान निर्माण ओझेलमा परेको भन्दै संसद् खुलाउन आग्रह गरेका हुन् । 'जनसत्ता'ले गरेको घरजग्गा कारोबारलाई मान्यता दिने निर्णय फिर्ताको माग गर्दै विपक्षी कांग्रेस-एमालेलगायतका दलले संसद् अवरोध गर्दै आएका छन् । 'सर्वोच्च अदालतले अन्तरिम आदेश दिइसकेको अवस्थामा संसद् अवरुद्ध नगर्नुस्,' दाहालको भनाइ उद्धृत गर्दै स्वकीय सचिव समीर दाहालले भने, 'यसले शान्ति र संविधानको मुख्य कार्यभार ओझेल पार्‍यो ।'कोइरालाले भने मन्त्रिपरिषद्को निर्णय फिर्ता नै हुनुपर्ने अडान दोहोर्‍याए । उनले सात बुँदे सहमतिमै घरजग्गा फिर्ता हुनुपर्ने उल्लेख भएको अवस्थामा 'जनसत्ता'ले गरेको घरजग्गा कारोबारलाई मान्यता दिएर सरकारले सहमति भाँडेको आरोप लगाए । दुवै नेता सवै विवादित विषयलाई प्याकेजमै समाधान गर्न सहमत भएको दाहालले जानकारी दिए ।