दरबारमा १६० सिकारीको दरबन्दी भएको खुलासा सिकारीबाटै

लिम्वूवान डट व्लगस्पोट डटकम,काठमाडौं

राजखान्दान जंगली जनावरको मासुको सोखिन त हुने नै भयो । तर, आश्चर्य १ पाँच-सातजनालाई मासु पुर्‍याउन एक सय साठीजना सरकारी सिकारीको टोली थियो- दरबारमा वर्षौं काम गरेका सिकारीहरूले नै खुलासा गरेका छन् ।राजा, रानी, हजुरआमा र नाति-नातिनालाई जंगली जनावरको मासु पुर्‍याउन दरबारमा सिकारी अड्डा नै थियो । अड्डाका कर्मचारीको कामै थियो- जरायो, मृग, बँदेल, कालिज, तित्रा, बाह्रसिंगा, चित्तल, रतुवालगायतका वन्यजन्तु मारेर मासु दरबारमा टक्र्याउने । यसका लागि उनीहरू राष्ट्रिय निकुन्ज र वन्यजन्तु आरक्षभित्र गएर सिकार गर्थे । पूर्वराजा र राजपरिवारका सदस्यहरू कहिलेकाहीँ त आफैं सिकार खेल्न पनि जान्थे । 'उहाँहरू रमाइलो मानी-मानी सिकार खेल्नुहुन्थ्यो, समस्या आए हामी अघि सथ्र्यौं,' दरबारको हवल्दार पोस्टका तत्कालीन सिकारी कुमार विष्टले नयाँ पत्रिकासित भने ।०४४ सालमा सिकारीको दर्जामा दरबारमा जागिर खान पुगेका विष्टका अनुसार तत्कालीन राजपरिवारका सदस्यको निर्देशनमा सिकारीहरू गोकर्ण, नागार्जुन, शिवपुरी, गोदावरी, धुन्चे, नुवाकोटदेखि चितवन र बर्दियासम्म पुग्थे । 'जनावरको मासु ल्याएर दरबारमा टक्र्याउँथ्यौँ,' विष्टले भने ।अर्का एक सिकारीका अनुसार राजपरिवारमा हुने साप्ताहिक भेटघाट र भोजमा वन्यजन्तुका विभिन्न परिकार अनिवार्य थिए । यसैगरी, विदेशीहरूको सम्मानमा दरबारबाट दिइने रात्रिभोजमा पनि यस्तै परिकार बन्थे । 'राजा महेन्द्र त सिकारका निक्कै सोखिन थिए, संगतले होला रत्न पनि सिकारमा निकै चाख लिन्थिन्,' उनले भने, 'रत्न सिकार खेल्न सिकारीका साथ टाढा-टाढा पुग्थिन् । पूर्वराजा ज्ञानेन्द्र, उनका छोरा पारस तथा वीरेन्द्र पनि सिकारका लागि सोखिन भएको सिकारीहरू बताउँछन् । पूर्वराजा र तिनका परिवारलाई जुन समयमा मासुका नौलो परिकार खान मन लाग्थ्यो, सिकारी अड्डालाई निर्देशन आउँथ्यो, सिकारीहरू राष्ट्रिय निकुन्ज र वन्यजन्तु आरक्षतिर दगुर्थे । यही प्रयोजनका लागि नागार्जुन, गोकर्ण हुँदै नवलपरासी र चितवनका जंगल-जंगल कुदेको सिकारी भक्तबहादुर तामाङले बताए । उनका अनुसार द्वन्द्व चर्किएपछि ०५५ सालदेखि सिकार गर्ने क्रम पनि घटेको थियो । अर्का सिकारी मदन खड्काले त जंगलभित्र छिरेर मात्र होइन, बाहिरै पनि वन्यजन्तुको सिकार गरेको बताए । 'बस्तीमा आएर दुःख दिने बाघ, बँदेल पनि मारियो ।' यस्तो मासु पनि दरबारमै जाने गरेको सिकारीहरूको भनाइ छ । तत्कालीन राजपरिवारका लागि सिकार टक्र्याउने जिम्मेवारी पाएको सिकारी अड्डा अझै पनि नारायणहिटीभित्रै छ । अड्डाको मातहतमा प्युठदेखि अमलदार, हवल्दार, जमदार, मुखिया, खरदार, सुब्बा र शाखा अधिकृतस्तरका कर्मचारी थिए । नासु चन्द्रशेखर महर्जन अझै पनि अड्डा कुरेर बसेका छन् ।शाखा अधिकृत प्रवीणमान महर्जनलगायतका कर्मचारीलाई भने वन विभागले विभिन्न कार्यालयमा खटाएको छ । 'दरबारमा एक सय ६० सिकारीको दरबन्दी थियो, त्यसमध्येका ७५ सिकारी अहिले विभागकै मातहतमा छन्,' विभागका एक अधिकारीले भने । नारायणहिटीभित्रको अड्डा खारेज गर्न वन विभागले फाइल सामान्य प्रशासन मन्त्रालयमा पठाए पनि मन्त्रालयले कारबाही अगाडि नबढाएको वन्यजन्तु विभागको भनाइ छ । 'सिकारीको रूपमा जागिर खान कुनै औपचारिक प्रक्रिया थिएन, दरबार निकट व्यक्तिहरूको सोर्सफोर्सका आधारमा सिकारीहरूको नियुक्ति हुने गरेको थियो,' सिकारी र वन विभागका कर्मचारी यसै भन्छन् ।

अनमिनको म्याद नसकिँदै नेपालको शान्ति-प्रक्रिया टुंगोमा पुग्ने

लिम्वूवान डट व्लगस्पोट डटकम,काठमाडौं

प्रधानमन्त्री पुष्पकमल दाहाल 'प्रचण्ड'ले राष्ट्रसंघीय मिसन अनमिनको म्याद नसकिँदै नेपालको शान्ति-प्रक्रिया टुंगोमा पुग्ने विश्वास व्यक्त गरेका छन् । अनमिनको म्याद मध्यसाउनमा सकिँदै छ । 'हामी शान्ति-प्रक्रियाको अन्तिम चरणमा छौँ, चार-पाँच महिनामा तार्किक निष्कर्षमा पुग्नेछौँ,' दुईदिने भ्रमणमा नर्वे आएका प्रधानमन्त्री प्रचण्डले ओस्लोको होटल कन्टिनेन्टलमा नेपाली तथा विदेशी पत्रकारहरूबीच भने, 'हामी द्वन्द्व समाधानका लागि दुनियाँलाई र खासगरी दक्षिण एसियालाई उदाहरण प्रस्तुत गर्दै छौँ ।'प्रचण्डले संविधानसभाले संघीय लोकतान्त्रिक गणतन्त्रात्मक संविधान बनाउने दाबी पनि गरे । 'हाम्रो संविधानसभा हदैसम्म समावेशी छ, समावेशी सभाले सफल संविधान बनाउँछ,' प्रचण्डले दाबी गरे । नर्वेका विकास तथा वातावरणमन्त्री एरिक सोल्हेइमले आफ्नै पहल र आफ्नै शैलीमा नेपाली दलहरूले शान्ति-प्रक्रियालाई निष्कर्षमा पुर्‍याउन लागेको भन्दै बधाई पनि दिए । 'नेपाली शैली अब द्वन्द्वग्रस्त अरू देशका लागि उदाहरण बन्नेछ,' उनले भने । मन्त्री सोल्हेइमले नेपालको विकास र खासगरी जलविद्युत्मा नर्वेको लगानी बढाउने प्रतिबद्धता पनि व्यक्त गरे । नर्वेको लगानीमा नेपालमा खिम्ती जलविद्युत् आयोजना सञ्चालित छ भने थप लगानीका बारेमा यसपालिको भ्रमणमा पनि छलफल भइरहेको छ । प्रचण्डले मंगलबार ओस्लोनजिकैको सल्बर्गफस जलविद्युत् आयोजनाको अवलोकन गर्नेछन् । प्रधानमन्त्री प्रचण्डले नर्वेजियन समकक्षी जेन्स स्टोलटेन्बर्गसँग भेटवार्ता गरिसकेका छन् । भेटमा नर्वेले नेपालको विकासमा गर्दै आएको सहयोग अझ बढाउने समझदारी बनेको छ । समझदारीपत्रमा नेपालका परराष्ट्रसचिव ज्ञानचन्द्र आचार्य र समकक्षी एटेल लेइकभोलले हस्ताक्षर गरेका छन् । प्रचण्डको टोली बुधबार फिनल्यान्ड पुग्नेछ । उनले त्यहाँ राष्ट्रपति तारजा हालोनन, प्रधानमन्त्री माट्टी वान्हानेन र अन्तर्राष्ट्रिय व्यापार तथा विकासमन्त्री पाभो भारिननसँग भेटवार्ता गर्ने कार्यक्रम छ । फिनल्यान्डका नेताहरूसँग नेपाली प्रधानमन्त्रीले शान्ति-प्रक्रिया, जलविद्युत् र विकास सहयोगका विषयमा कुरा गर्नेछन् ।

दिसा खुवाउने प्रधानाध्यापिकालाई पक्राउ गर्न सहमति

लिम्वूवान डट व्लगस्पोट डटकम,काठमाडौं

दलित महिलालाई कुटपिट गरी दिसा खुवाउने प्रधानाध्यापिकालाई एक साताभित्र पक्राउ गरी कारबाही गर्न राजनीतिक दल र प्रशासनबीच सहमति भएको छ । जिल्ला प्रशासन कार्यालय ललितपुरमा सोमबार ६ राजनीतिक दल, प्रशासन तथा आन्दोलनरत संयुक्त दलित विद्यार्थी संघर्ष समितिले सो सहमति गरेका हुन् । अभियुक्तमाथि कारबाही गर्न सहमति जनाउने दलहरूमा माओवादी, कांग्रेस, एमाले, माले, नेकपा एकीकृत र नेपाल सद्भावना छन् । सामान्य प्रशासनमन्त्री पम्फा भुसाल तथा ललितपुर क्षेत्र नं २ का सभासद् वर्षमान पुन अनन्तको रोहबरमा दोषीमाथि कारबाही गर्ने सहमति गरिएको सभासद् विनोद पहाडीले बताए । 'प्रशासन तथा राजनीतिक दलको सक्रियतामा अभियुक्तलाई पक्राउ गर्ने सहमति भएको छ,' पहाडीले भने । आन्दोलनरत संयुक्त दलित विद्यार्थी संघर्ष समितिले पनि एक सातासम्मका लागि धर्ना कार्यक्रम फिर्ता लिएको जनाएको छ ।प्र्रहरीले अभियुक्तलाई समातेर पनि छोडेको बारेमा छानबिन गर्न डिएसपीको संयोजकत्वमा छानबिन समिति गठन गरिएको छ । समितिले छानबिन गरेपछि अभियुक्तलाई पक्राउ गरी छाड्ने प्रहरीमाथि विभागीय कारबाही गर्ने सहमति भएको छ । ललितपुर प्युटार-७ की दलित महिला कल्लीकुमारी विकलाई स्थानीय गडीभञ्ज्याङ प्राविकी प्रधानाध्यापिका विमला लामाले बोक्सीको आरोप लगाउँदै दिसा कोच्याएकी थिइन् । यसैबीच, अधिकारवादी एवं सरोकारवाला संस्थाले दलित महिलालाई दिसा खुवाइएको घटनाप्रति गम्भीर चिन्ता व्यक्त गरेका छन् । सो घटनाका सम्बन्धमा सोमबार राजधानीमा राष्ट्रिय मानवअधिकार आयोग, राष्ट्रिय महिला आयोग र राष्ट्रिय दलित आयोगका पदाधिकारीबीच गम्भीर छलफल भएको थियो ।

खेलाडी धनका लागि पेरिस सहरमा नांगो रूपमा प्रस्तुत

लिम्वूवान डट व्लगस्पोट डटकम,काठमाडौं

खेलाडीलाई आपनो उत्पादनको विज्ञापनमा खेलाउने उत्सुकता विश्वका धेरै संस्थाले बोकेका हुन्छन् । मनग्य धन आर्जन गर्ने अवसरका रूपमा लिन्छन् खेलाडी पनि विज्ञापनलाई । तर, धनका लागि पेरिस जस्तो व्यस्त सहरमा नांगो रूपमा प्रस्तुत हुन पनि पछि परेनन् पोलभोल्टका एक खेलाडी । फ्रान्सेली पोलभोल्टर रोमान मेस्निल प्रायोजक सम्झौताका लागि त्यसरी व्यस्त सहरमा नांगो स्वरूपमा प्रस्तुत भएका हुन् । पोलभोल्टका साथ नांगै पेरिस सहर घुमेको भिडियो उनले इन्टरनेटमा पनि 'पोस्ट' गरेका छन् । २००७ मा ओसाकामा सम्पन्न वल्र्ड च्याम्पियनसिपमा रजत पदक जितेका खेलाडी हुन् ३१ वर्षीय मेस्निल । विश्व च्याम्पियनसिपमा पदक जितेपछि उनीसँग विश्वप्रसिद्ध खेलकुद सामग्री उत्पादक नाइकले सम्झौता गरेको थियो । त्यो सम्झौता गत वर्ष समाप्त भयो । त्यसपछि नाइक उनीसँगको सम्झौता पुनर्विचार गर्न तयार भएन । उनले विश्व आर्थिक मन्दीका कारण बजेट अभावले पुनः सम्झौता नगरिएको हुनसक्ने बताए । नाइकसँगको सम्झौता समाप्तिपछि अन्य कम्पनीलाई आकषिर्त गर्ने उनको शैली अचम्मको छ । यद्यपि, अब नयाँ कम्पनीले आफूसँग सम्झौता गर्नेमा मेस्निल ढुक्क छन् । नांगो प्रदर्शनपछि दुई च्यारिटीका लागि रकम संकलन गर्ने योजना पनि बुनेका छन् उनले ।

नायिका झरना थापा सांकेतिक भाषा सिक्नमा व्यस्त

लिम्वूवान डट व्लगस्पोट डटकम,काठमाडौं

नायिका झरना थापा अचेल सांकेतिक भाषा सिक्नमा व्यस्त छिन् । उनको 'रुटिन' मा प्रत्येक दिउँसो ११ बजेदेखि एक घन्टा सांकेतिक भाषा प्रशिक्षणका लागि समय थपिएको छ । केही दिनदेखि उनी नियमित ११ बजे काठमाडौं बहिरा संघमा पुग्ने गरेकी छिन् । त्यहाँ उनले बहिराहरूसँगै बसेर सांकेतिक भाषा सिक्ने गरेकी छिन् । मंगलबार दिउँसो बहिरा संघको कक्षाकोठामा एक 'इन्टरप्रेटर' र केही बहिरासँग सांकेतिक भाषा 'प्राक्टिस' गर्नमा मग्न थिइन् । उनी संकेत गर्दै थिइन्, 'मेरो भन्नु तिमी... मात्र तिमी हौ ।' झरनालाई सांकेतिक भाषा सिक्न किन परेको होला ? सांकेतिक भाषामै बताउने प्रयास गर्दै झरनाले खितितिति हाँस्दै भनिन्, 'नयाँ फिल्म तिमी मात्र तिमी..मा म बोल्न नसक्ने केटीको रोलमा अभिनय गर्दैछु । त्यसैका लागि सांकेतिक भाषा सिक्ने प्रयासमा लागेकी छु ।' झरनाले यति भनी नसक्दै उनको छेवैमा रहेका निर्देशक योगेश घिमिरे बोलिहाले, 'मेरो फिल्ममा झरनाको डाइलग छैन । उहाँ सुन्न सक्नुहुन्छ, तर बोल्न भने सक्नुहुन्न । त्यसकै लागि उहाँलाई प्राक्टिस गराइएको हो ।' आगामी वैशाखदेखि छायांकन सुरु हुने उक्त फिल्म सबलमात्र नभएर बोल्न नसक्ने दर्शकले पनि बुझ्न सकून् भनेर कथामा नयाँपन दिन बहिरी केटीलाई प्रमुख पात्र बनाइएको निर्देशकले बताए । दुई युवाहरू नीरज ढकाल र रिमेश अधिकारीले निर्माण गर्न लागेको उक्त फिल्ममा झरनाबाहेक राजबल्लभ कोइराला र नन्दिता केसीको प्रमुख भूमिका रहने बताइन्छ ।

त्रिवीमा अनेरास्ववियु क्रान्तिकारी विजयी

लिम्वूवान डट व्लगस्पोट डटकम,काठमाडौं

कीर्तिपुर स्थित केन्द्रीय क्याम्पसमा स्ववियु सभापति सहित अधिकांश पदमा अनेरास्ववियु क्रान्तिकारी विजयी भएको छ । सभापतिमा क्रान्तिकारीका हिमाल शर्मा निर्वाचित भएका छन् ।७ हजार ७ सय मत खंसेकोमा शर्माले प्रतिद्वन्दी भन्दा झण्डै साढे ४ सय मत बढी प्राप्त प्राप्त गरी विजयी भएका हुन् । सह-सचिव र एउटा सदस्य भने नेवसंघले जितेको छ । केन्द्रीय क्याम्पसमा गत चैत्र ६ गते निर्वाचन भएपनि पटक-पटकको अवरोधपछि सोमबार रातिबाट मतगणना सुचारु भएको थियो । यसअघि,राजधानीको रत्नराज्यलक्ष्मी र ल क्याम्पसमा सोमबार भएको स्ववियु निर्वाचनमा एमाले निकट अनेरास्ववियुको प्यानल नै विजयी भएको छ । ल क्याम्पसमा गुणराज आचार्यको प्यानल तथा रत्नराज्यमा राजकुमार राईको प्यानलले जितेको हो । पोखराको पृथ्विनारायण क्याम्पसमा पनि अनेरास्ववियु रश्मी आचार्यको प्यानलले जितेको छ । गत चैत्र ६ गते निर्वाचन सम्पन्न भएको पिएन क्याम्पसमा विवादका कारण मतगणना स्थगित भएको थियो । भने आरआर तथा ल क्याम्पसमा निर्वाचन नै हुन सकेको थिएन । सोमबार नै निर्वाचन भएको पद्यमकन्या क्याम्पसमा नेविसंघको प्यानल विजयी भएको छ ।

गृहमन्त्रीको तोक आदेशमा गुप्तचर भर्ना धमाधम

लिम्वूवान डट व्लगस्पोट डटकम,काठमाडौं

राष्ट्रिय अनुसन्धान विभागले गृहमन्त्रीको तोक आदेशमा भित्रभित्रै धमाधम नयाँ भर्ना लिन थालेको छ । उपप्रधान तथा गृहमन्त्री वामदेव गौतम स्वयंले 'सुरक्षा निकाय आधुनिकीकरण उच्चस्तरीय कार्यदलको सिफारिस' विपरीत नयाँ भर्ना नलिने भनी गरेको प्रतिबद्धता उल्लंघन गर्दै आफ्ना केही मानिस भर्ना गरेका हुन् ।विभाग स्रोतका अनुसार हालैमात्र ३७ जनालाई बिनाप्रतिस्पर्धा सहायक सूचकमा भर्ना गरिएको छ । उनीहरू सबै चैत २ मा एकमहिने तालिम सकेर कार्यक्षेत्रमा परिचालनसमेत भइसकेका छन् । उनीहरू राजनीतिक प्रभावले भर्ती भएका हुन् । सहायक सूचक हुनेमध्ये ६ जना गृहमन्त्री गौतम, १६ विभाग प्रमुख धनसिंह कार्की, १४ जना उपप्रमुख सुखचन्द्र झा र एक पूर्वगृहसचिवको सिफारिसमा भर्ना गरिएको स्रोतले जानकारी दियो ।गृह प्रवक्ता सहसचिव नवीन घिमिरेले भर्ना गरेको सुनिएको तर आधिकारिक जानकारी नआएको बताए । नयाँ भर्ना गरिएकाबाट डेढदेखि तीन लाख रुपैयाँसम्म लिइएको विभागका एक अनुसन्धान निर्देशकले दाबी गरे । 'अधिकृतका लागि पाँचदेखि ७ लाख र सहायकका लागि तीनदेखि पाँच लाखसम्म लिने गरिएको छ,' उनको दाबी छ, 'सरुवामा पनि तीन महिनाको तलब माग गर्ने गरिएको गुनासो सुनेको छु ।' नयाँ भर्ना गरिएका १३ अधिकृत र १२ सहायकको तालिम पनि चैत १० बाट सुरु भएको छ । यीमध्ये अधिकांश तत्कालीन गृहमन्त्री कृष्णप्रसाद सिटौलाका पालामा संविधानसभा निर्वाचनअघि भर्ना भएका हुन् । भागबन्डामा विवाद नमिलेका कारण पछि केही व्यक्तिसमेत थपेर हाल मात्र तालिममा सहभागी गराएको स्रोतले बतायो । अधिकृत तालिममा हाल सहभागी हुनेमा भूमिप्रसाद पाठक, प्रह्लाद संग्रौला, अभिनवकुमार सिंह, दिलीपकुमार सिंह, कालीदास निरौला, रमेशसिंह डाँगी, रामहरि शर्मा, जयनेन्द्रप्रसाद उपाध्याय, शेरजंगबहादुर चन्द, नरेन्द्रराज गिरी, विमल घिमिरे, सुदीप अधिकारी र तिलक शर्मा छन् । नेपाल विशेष सेवा नियमावलीमा सिपाहीभन्दा माथिल्लो तहमा पदपूर्ति गर्नुपरेमा २० प्रतिशत मात्र छड्के प्रणालीअन्तर्गत भर्ना गर्न पाइन्छ । ५० प्रतिशत आन्तरिक बढुवा, ३० प्रतिशत खुला प्रतिस्पर्धाबाट गर्नुपर्ने व्यवस्था गोप्य राखिने नियमावलीमा छ । विभागमा भने २०५२ फागुनयता खुला प्रतिस्पर्धाबाट भर्ना लिइएको छैन । ०६४ भदौमा प्रतिस्पर्धाबाट भर्ना लिने भनी ३७ अधिकृत र ६२ सहायकको विज्ञापन गरिए पनि त्यसका लागि लिखित परीक्षाको प्रक्रियासमेत अघि बढेको छैन ।
हाल १ हजार ६ सय ७२ दरबन्दी रहेको राष्ट्रिय अनुसन्धान विभागमा ७० प्रतिशत जनशक्ति खुला प्रतिस्पर्धाबाट आएका हुनुपर्ने प्रावधान छ । तर राजनीतिक हस्तक्षेपका कारण खुला प्रतिस्पर्धाबाट आएकाहरूले जागिर छाडदै गएको जानकारी दिँदै एक उच्च गुप्तचर अधिकृत भन्छन्, 'राजनीतिक भर्ती र रकम खर्चेर आउनेहरू ८० प्रतिशतभन्दा बढी छन् । ठाडो भर्ती प्रणालीको अन्त्य नभएसम्म विभागको रोग निको हुँदैन ।'

चार राजनीतिक दलले भावी संविधान अवधारणा बुझाए

लिम्वूवान डट व्लगस्पोट डटकम,काठमाडौं
संविधानसभामा प्रतिनिधित्व गर्ने चारवटा राजनीतिक दलले भावी संविधानले आत्मसात् गर्नुपर्ने दलीय अवधारणा मङ्गलबार संवैधानिक समितिमा बुझाएका छन् । चारै दलले बहुदलीय शासन प्रणालीलाई स्वीकार गरेका छन् ।प्रमुख प्रतिपक्षी दल नेपाली काङ्ग्रेसले राष्ट्रको कार्यकारी प्रमुख प्रधानमन्त्री हुने र राष्ट्रपति संवैधानिक हुने अवधारणा संवैधानिक समितिसमक्ष बुझाएको छ । पार्टीको अवधारणा हस्तान्तरण गर्दै सभापति गिरिजाप्रसाद कोइरालाले राष्ट्रपतीय प्रणालीभन्दा संसदीय प्रणाली नै नेपालका लागि उपयुक्त हुने विचार व्यक्त गर्नुभयो ।उहाँले लोकतन्त्र, बहुदलीय शासन प्रणाली, प्रेस स्वतन्त्रता, मानव अधिकारलाई अक्षुण्ण राख्दै देशलाई विखण्डन होइन, एकीकृत गर्ने सङ्घीयतामा जोड दिनुभयो । नेपाललाई सङ्घीय गणतन्त्रात्मक राज्य निर्माण गरी बहुलवादमा आधारित बहुदलीय लोकतान्त्रिक शासन प्रणाली अवलम्बन गर्दै राष्ट्रिय एकता र अखण्डता, जनतामा निहित सार्वभौमसत्ता, संविधानको सर्वोच्चतामा काङ्ग्रेसले जोड दिएको छ ।राष्ट्रप्रमुख राष्ट्रपति हुने र राष्ट्रपतिको निर्वाचन केन्द्रीय संसद् र प्रादेशिक संसद्का सदस्यबाट हुने, राष्ट्रपति नेपाली जनताको एकताको प्रतीक, सेनाको परमाधिपति, संविधानको संरक्षक र पालनकर्ता हुने प्रस्ताव गरिएको छ ।यसैगरी, उपराष्ट्रपतिले राष्ट्रपतिको अनुपस्थितिमा निजले गर्ने कार्यका साथै केन्द्रीय संसद्को माथिल्लो सदनको अध्यक्षका रूपमा समेत काम गर्नेछ । काङ्ग्रेसले बहुदलीय प्रतिस्पर्धात्मक मान्यता अन्तर्गत संसदीय शासन प्रणाली र यसका आधारभूत सिद्धान्तलाई मूल आधार बनाउँदै केन्द्रमा कार्यकारी प्रमुख प्रधानमन्त्री रहने र प्रधानमन्त्री संसद्प्रति उत्तरादायी हुने प्रस्ताव गरेको छ ।काङ्ग्रेसले प्रधानमन्त्रीको निर्वाचनबारे अवधारणापत्रमा कुनै कुरा उल्लेख गरेको छैन भने सोमबार मात्रै नेपाली काङ्ग्रेसका २५ जना सभासद्ले प्रत्यक्ष निर्वाचनबाट निर्वाचित प्रधानमन्त्रीलाई राष्ट्रको कार्यकारी प्रमुख हुने प्रस्ताव गरेका थिए । यसबाट प्रधानमन्त्रीको चयन प्रक्रियामा काङ्ग्रेसमा स्पष्ट रूपमा दुई विचार देखापरेका छन् ।संवैधानिक समितिका सभापति माधवकुमार नेपालको अध्यक्षतामा बसेको बैठकमा काङ्ग्रेसका उपसभापति रामचन्द्र पौडेलले अबको नेपालमा सैन्यवाद, व्यक्ति वा पार्टीविशेषको अधिनायकवाद वा धार्मिक एकाधिकारवादको पक्षपोषण गर्ने कुनै विचार, दर्शन र प्रयोग नेपाली जनतालाई स्वीकार्य हुादैन भन्नुभयो ।मानव अधिकार, मौलिक हक एवं नागरिक तथा राजनीतिक स्वतन्त्रता, वैयक्तिक स्वतन्त्रता, सम्पत्तिको हक, धर्म निरपेक्षता र धार्मिक स्वतन्त्रता, सामाजिक न्याय र आरक्षणको व्यवस्थालाई काङ्ग्रेसले जोड दिएको छ ।काङ्ग्रेसका २५ सभासद्ले सङ्घ निर्माण गर्दा छ वा १३ को विकल्प प्रस्तुत गरेका छन् तर काङ्ग्रेस पार्टीले भने सङ्घ गठनका लागि आवश्यक आधारहरूको किटान गरे पनि सङ्ख्या कति हुने भन्ने उल्लेख गरेको छैन ।सुझावमा भनिएको छ- प्रदेश रचनाका प्रमुख आधार नेपालको राष्ट्रिय अखण्डता, भौगोलिक अवस्थिति र अनुकूलता, जनसङ्ख्या, प्राकृतिक स्रोत र आर्थिक सम्भाव्यता, प्रदेशहरूको अन्तरसम्बन्ध, भाषिक/जातीय एवं सांस्कृतिक सघनता, राजनीतिक/प्रशासनिक सम्भाव्यता आदि हुनेछ । दुई सदनात्मक संसद्, त्यस्तै केन्द्र, प्रदेश र स्थानीय सरकार गरी तीनवटा सरकारको सुझाव दिइएको छ ।यसअघि सभापति कोइरालाले संविधानसभाका अध्यक्षसमक्ष संवैधानिक समिति सदस्यको पद तथा गोपनीयताको शपथ लिनुभएको थियो ।त्यसैगरी नेकपा (माले)का तर्फबाट त्यस दलका महासचिव सी.पी. मैनालीले संसदीय शासन प्रणालीसहितको प्रत्यक्ष निर्वाचनबाट निर्वाचित कार्यकारी प्रधानमन्त्री र केन्द्रका दुवै सदन एवं प्रादेशिक प्रतिनिधिसभाका सदस्यहरूबाट निर्वाचित राष्ट्रपति हुने धारणा प्रस्तुत गर्नुभयो । उपराष्ट्रपति भने राष्ट्रियसभाको पदेन अध्यक्ष हुने प्रस्ताव मालेको छ ।प्रशासनिक हिसाबले राज्यलाई केन्द्र, प्रदेश, जिल्ल र स्थानीय निकायमा विभाजन गर्ने प्रस्ताव गर्दै नेकपा (माले)ले केन्द्रशासित एक प्रदेशसहित छ प्रदेशको नक्सा सुझावमा दिइएको छ । प्रतिनिधिसभाका सदस्यहरूको निर्वाचन मिश्रति सदस्य समानुपातिक प्रतिनिधित्वको प्रणाली अपनाइनेछ ।महासचिव मैनालीले निर्वाचित राष्ट्रपतिको व्यवस्था गर्दा राष्ट्रप्रमुख र सरकारप्रमुख नै एउटै व्यक्ति हुनेहुादा त्यहा निरङ्कुशता हुनसक्ने आशङ्का व्यक्त गर्नुभयो ।मङ्गलबार नै राष्ट्रिय प्रजातन्त्र पार्टीका अध्यक्ष पशुपतिशमशेर राणाले दलीय धारणा राख्दै शासन प्रणाली 'वेस्ट मिनिस्टर' शैलीको प्रधानमन्त्रीय पद्धति, केन्द्रमा दुई सदनात्मक व्यवस्थापिका रहने र तल्लो सदनले प्रधानमन्त्री निर्वाचित गर्ने सुझाव दिनुभयो ।राप्रपाले संवैधानिक राष्ट्रपति राष्ट्राध्यक्ष हुने, राज्यस्तरमा एक सदनात्मक व्यवस्थापिका रहने र त्यसको प्रमुख मुख्यमन्त्री रहनेछन् । रापप्राले चार तहका अदालतको सुझाव दिएको छ ।आˆनो पार्टी धर्म निरपेक्षताको विपक्षमा रहेको र मुलुकमा चलिआएको सनातन धर्म, संस्कृति, परम्परा र आस्थाको रक्षा राज्यले गर्नुपर्छ भन्दै रापप्रा अध्यक्ष राणाले आस्तिकहरूको प्रचण्ड बहुमत भएको मुलुकमा राज्य नास्तिक हुन सक्दैन भन्नुभयो ।यस्तै राष्ट्रिय प्रजातन्त्र पार्टी नेपालका अध्यक्ष कमल थापाले राजसंस्था, हिन्दु राष्ट्र र सङ्घीयताका बारेमा जनमत सङ्ग्रह गर्नुपर्ने सुझाव दिनुभयो ।देशमा गणतन्त्र स्थापना भइसक्दा पनि राप्रपा नेपालले राष्ट्रप्रमुख संवैधानिक राजा रहने र कार्यकारी अधिकारसहितको प्रधानमन्त्री तथा दुई सदनात्मक व्यवस्थापिकाको सुझाव प्रस्तुत गरेको छ । जनप्रतिनिधिसभा २३५ र राष्ट्रियसभा १०५ सदस्यीय रहने प्रस्ताव राप्रपा नेपालको छ । सङ्घीयताको पक्षमा तर जात र भाषाका आधारमा सङ्घीयतामा जानु घातक हुने सुझाव राप्रपा नेपालको छ ।नेपाली भाषा मुख्य सरकारी भाषा र माध्यम भाषा हुने, नेपालका सबै स्वदेशी मातृभाषा नेपालका समान राष्ट्रिय भाषा हुने धारणा सबै दलले राखेका छन् ।

दरबार हत्या तीन कारण भएको पारसले बताए

लिम्वूवान डट व्लगस्पोट डटकम,काठमाडौं

नेपालका भूतपूर्व युवराज पारसले आठ वर्षअघिको राजदरबार हत्याकाण्डमा तत्कालीन युवराज दीपेन्द्रको भूमिकाका बारेमा सार्वजनिक गरेका नयाँ भनाइले राजनीतिक वृत्तमा नयाँ तरंग ल्याएको छ।राजतन्त्रको उन्मूलन भएपछि सिंगापुरमा बसोबास गरिरहेका पारसले सिंगापुरकै एउटा पत्रिकालाई दिएको अन्तर्वार्तामा दरबार हत्या प्रकरणका पछाडि दीपेन्द्रसंग सम्बन्धित तीन कारण भएको बताएका छन्। यो भन्दा अगाडि आफ्नी प्रेमिका देवयानी राणासंग विवाह गर्न नदिइएको एक मात्र कारणले दीपेन्द्रले आफ्ना बाबु-आमा राजा वीरेन्द्र र रानी ऐश्वर्यसहित परिवारका अरु सदस्यहरुको हत्या गरेको बताइएको थियो।राजा वीरेन्द्र, रानी ऐश्वर्य र स्वयं युवराज दीपेन्द्र सहित १० जना मारिएको दरबार हत्या प्रकरणबारे भूतपूर्व युवराज पारसले बताएका भनि सिंगापुरको द न्यु पेपरमा प्रकाशित अन्तर्वार्ता नेपालका सञ्चार माध्यमले छापेका थिए। अन्तर्वार्तामा पारसले देवयानी राणासंगको प्रेम प्रकरणका अतिरिक्त अरु दुई कारणले दीपेन्द्रले राजारानी सहित आफ्नै परिवारका सदस्यहरुको हत्या गरेको उल्लेख गरेका छन्। नेपाली सेनाका लागि बन्दूक किन्दा आफूले भनेको बन्दूक किन्न तत्कालीन राजा वीरेन्द्र तयार नभएकाले दीपेन्द्र क्रुद्ध भएको पारसले बताएको जनाईएको छ।त्यस्तै दीपेन्द्रले राजा वीरेन्द्रले गद्दी त्याग गर्ने सोंच बनाएको र आफू राजा बन्न नपाउने झोक पनि देखाएको पारसले उल्लेख गरेका छन्। त्यसैगरी उनले हत्याकाण्ड भएको दिन दीपेन्द्र रक्सीले मात्तिएका भन्ने यस अघि सार्वजनिक भएका भनाइहरुको खण्डन गरेका छन्।पारसका अनुसार त्यो दिन दीपेन्द्र रक्सीले मातेका थिएनन्। भूतपूर्व युवराज पारसको यो भनाइ दरबार हत्याकाण्डको फेरि छानबीन गरिने भनि प्रधानमन्त्री पुष्पकमल दाहाल (प्रचण्ड) ले बताएको केही सातापछि आएको छ।

दिसा खुवाउने 'हेडमास्टर्नी'लाई पक्राउ गर्न धर्ना

लिम्वूवान डट व्लगस्पोट डटकम,काठमाडौं

बोक्सीको आरोपमा दलित महिलालाई दिसा गर्न लगाई खुवाउने प्रधानाध्यापिकालाई तत्काल गिरफ्तार गर्न माग गर्दै संयुक्त दलित विद्यार्थी संघर्ष समितिले जिल्ला प्रशासन कार्यालय ललितपुरमा धर्ना दिएको छ । धर्नामा सभासद् र नेताहरूले पनि साथ दिएका छन् । नौ दिन बितिसक्दा पनि प्रशासनले अभियुक्तलाई गिरफ्तार नगरेको भन्दै विद्यार्थी, सभासद्लगायत दलितसँग सम्बन्धित संघसंस्थाका प्रतिनिधिले आइतबार बिहान साढे १० बजेदेखि एक बजेसम्म धर्ना दिएका थिए । धर्नाकारीले एक घन्टासम्म प्रमुख जिल्ला अधिकारीको कार्यकक्षमा तालाबन्दी गरी सबै काम ठप्प पारे । धर्ना दिन सभासद्हरू खड्ग बस्याल सार्की, सन्तबहादुर नेपाली, विनोद पहाडी, धर्मशिला चापागाईं, एमाले केन्द्रीय सदस्य जितु चापागाईं र पूर्वसांसद सुशीला नेपाल पुगेका थिए । आन्दोलनकारीले पीडकलाई गिरफ्तार नगरेसम्म प्रशासनसँग वार्तामा नबस्ने घोषणा गरेको सभासद् विनोद पहाडीले जानकारी दिए । आइतबार पनि अभियुक्तलाई पक्राउ नगरे सोमबार १० बजेदेखि एक बजेसम्म जिल्ला प्रशासन कार्यालयको सम्पूर्ण काम ठप्प पार्ने उनको भनाइ थियो । मंगलबार बस्ने संसद् बैठकमा पनि दलित महिलामाथिको ज्यादतिबारे आवाज उठाउने पहाडीले बताए ।प्रहरीले भने अभियुक्त फरार रहेको र पक्राउ गर्ने प्रयास जारी रहेको बताएको छ । ललितपुर प्युटार- ७ की दलित महिला कल्लीकुमारी विकलाई स्थानीय गढीभञ्ज्याङ प्राविकी प्रधानाध्यापिका विमला लामाले बोक्सीको आरोप लगाउँदै दिसा कोच्याएकी थिइन् । उता प्युटारकै सचेत युवाहरूले बोक्सीको आरोपमा दिसा खुवाउने बर्बर अन्यायको विरोध गरेका छन् । प्युटारका युवा तथा बौद्धिक वर्गका नामबाट जारी वक्तव्यमा भनिएको छ, 'सबै प्युटारवासी बोक्सीमा विश्वास राख्दैनन् र सो बर्बर कार्यमा संलग्न दोषीलाई संरक्षण गर्न सबैको संलग्नता छैन ।' उनीहरूले दोषी प्रधानाध्यापिकालाई गिरफ्तार गरिसकेपछि पनि प्रहरीकै संलग्नतामा छोडिएको आरोप लगाएका छन् । दोषीलाई कानुनअनुसार हदैसम्मको कारबाही गर्न युवाहरूले माग गरेका छन् ।

सभासद्सँग रक्सीको लत छुटाइदिन आग्रह

लिम्वूवान डट व्लगस्पोट डटकम,काठमाडौं

कैलाली/ नयाँ संविधान निर्माणका लागि सुझाव संकलन गर्न आएका संविधानसभा सदस्यलाई दलित महिलाले आफ्ना श्रीमान्लाई रक्सीको लत छुटाइदिन आग्रह गरेका छन् । संविधानसभा सदस्य हरि श्रीपाइलीले 'तपाईंहरूका समस्या के-के छन् ? भन्नूस् म तपाईंहरूको सुझाव संविधानमा लगेर नयाँ कानुन बनाउन प्रस्ताव राख्छु' भनेपछि कैलालीको धनगढी-६ जालीका दलित बस्तीका महिलाले श्रीमान्लाई रक्सी नखाने बनाइदिन आग्रह गरेका हुन् ।'हामी दाउरा बेचेर पैसा ल्याई घरखर्च चलाउँछौँ, तर श्रीमान् भने रक्सीले मात्तिन्छन्,' सरुलीदेवी विकले सभासद् हरि श्रीपाइलीलाई आफ्नो दुखेसो पोख्दै भनिन् । 'रक्सी पिए कारबाही हुने कानुन बनाउनुपर्‍यो, हामी दिनभरि ज्याला-मजदुरी गरेर पैसा कमाउँछौँ, तर हाम्रा पुरुष भने राति रक्सी खाएर कुट्छन्,' गंगादेवी सार्कीले भनिन् । 'यहाँका पुरुषलाई त रक्सीले नै बिगारेको हो' महिलाले होमा हो मिलाउँदै सभासद् श्रीपाइलीलाई भने, 'पुरुषले रक्सी खान छाडे यो टोल सुधि्रन्छ ।' सभासद् हरि श्रीपाइलीले अब यहाँका पुरुषले रक्सी खाए प्रहरीबाट कारबाही गराउने आश्वासन दिए । महिलाले आफ्ना श्रीमान्को रक्सी खाने बानीले सताएको बताउँदै गर्दा पुरुषहरू भने चुपचाप बसेका थिए ।

महिलाले करिअर भन्दा परिवारलाई प्राथमिकता दिए

लिम्वूवान डट व्लगस्पोट डटकम,काठमाडौं

परिवार ठूलो कि करिअर ? महिलामाथि सधैं यस्तै प्रश्न तेर्सिन्छन् । संयुक्त राज्य अमेरिकाकी प्रथम महिला मिसेल ओबामाले आफ्नो जागिर छोडेर पतिको चुनाव अभियानमा लागेको कतिपय नारीवादी व्यक्तिलाई मन परेन । करिअरभन्दा परिवार र पतिको मानलाई सर्वोपरि ठानेकोमा एक जमातले उनको आलोचना पनि गरे । तर, मिसेलले आफ्नो लागि परिवार, सन्तान अगाडि आउने बताइन् । प्रथम महिला मिसेल मात्र होइन, करिअर र परिवारको प्राथमिकताबारे धेरै महिला अन्योलग्रस्त नै छन् । महत्त्वाकांक्षी कामकाजी महिलाहरू पनि ३० वर्षको छेउछाउ पुग्न थालेपछि करिअरभन्दा परिवारलाई महत्त्व दिने गरेको इले म्यागेजिनले गरेको एक सर्वेक्षेणले देखाएको छ । बेलायतमा गरिएको यस सर्वेक्षेणअनुसार सन् १९७९ मा जन्मिएका महिलाहरूको प्राथमिकता रोजेको पुरुषसँग बिहे गरेर परिवार बसाउनुरहेको छ । यो सर्वेक्षण ३० वर्ष पुग्न लागेका १८ सय महिलामा गरिएको हो । सर्वेक्षेणमा ७० प्रतिशत महिलाले आफ्नो उमेर परिवारलाई जीवन सुरु गर्ने उपयुक्त समय भएको बताए । ८० प्रतिशत महिलाले ३० वर्ष बिहे गर्ने उपयुक्त उमेर भएको उल्लेख गरे । प्रेमलाई अधिकांश महिलाले प्राथमिकतामा राखे । केही दशकअगाडि गरिएको सर्वेक्षणमा ३० वर्षको उमेरका महिलाले परिवारभन्दा करिअरलाई प्राथमिकता दिएका थिए ।

एकै दिनमा ४ जनाले झुन्डिएर आत्महत्या

लिम्वूवान डट व्लगस्पोट डटकम,काठमाडौं

काठमाडौंका ४ छुट्टाछुट्टै स्थानमा ४ जनाले झुन्डिएर आत्महत्या गरेका छन्। शनिबार एकै दिन भएको सो घटनामा एक महिला र तीन पुरुषको मृत्यु भएको छ।ओखलढुंगा जिल्ला घर भई काठमाडौंको कपन-३ बस्दै अँएका ४० वर्षीय कुलहरि दाहालले घरनजिकैको किम्बुको रुखमा झुन्डिएर आत्महत्या गरेका छन्। शनिबार दिउँसो २ बजे उनले आत्महत्या गरेका थिए। त्यस्तै काठमाडौंको नागार्जुन जंगलमा ६० वषीय पुरुषले आत्महत्या गरेका छन्। रसुवा घर भएका इन्द्रबहादुर विकको मृत्यु भएको अवस्थामा प्रहरीले फेला पारेको थियो। सुन्दरीजल-४ मूलखर्क बस्ने २२ वर्षीया प्रेरणा तामाङले शिवपुरी जंगलको रुखमा झुन्डिएर आत्महत्या गरेकी छिन्। शनिबार दिउँसो ३ बजे सलको पासो लगाई उनले आत्महत्या गरेको प्रहरीले जनाएको छ। सोही दिन साँझ करिब ६ बजे काठमाडौंको मुड्खुस्थित रानीवनमा एक पुरुषलाई झुन्डिएको अवस्थामा प्रहरीले फेला पारेको थियो। हालसम्म नाम, थर, वतन नखुलेका ती पुरुषले रुखमा डोरीले बाँधी आत्महत्या गरेका थिए। सबै घटनाका बारेमा प्रहरीले अनुसन्धान गरिरहेको बताएको छ।

सर्वोच्च अदालतमा दायर रिट निवेदनको सुनुवाइ सारियो

लिम्वूवान डट व्लगस्पोट डटकम,काठमाडौं

सेनाका ८ जना सहायक रथीको पदावधि नथप्ने सरकारी निर्णयको कार्यान्वयन नगर्न सर्वोच्च अदालतले दिएको आदेश खारेजीको माग गर्दै सर्वोच्च अदालतमा दायर रिट निवेदनको सुनुवाइ सोमबारपनि सरेको छ । न्यायाधीशद्वय अनुपराज शर्मा र प्रकाश वस्तीको संयुक्त इजलासमा सोमबार सुनुवाई हुने तय भएपनि पुनः प्रविधिक जटिलता उत्पन्न भएपछि सुनुवाइलाई अर्को बेन्चमा सारिएको हो ।न्यायाधीश वस्तीले यसअघि यस्तै प्रकृतिको मुद्धाको बहस गरेकाले सुनुवाइ गर्दा पूर्वाग्रही हुनसक्ने भएकाले बेन्च परिवर्तन गरिएको सर्वोच्चले जनाएको छ । यसअघि आइतबार न्यायाधीश मिनबहादुर रायमाझीले २ बर्षअघि सोही प्रकृतिको मुद्धामा सेनाका अवकास प्राप्त उपरथी प्रदिपप्रताप बम मल्ललाई बहाली गर्ने आदेश दिएको भन्दै बेन्च परिवर्तन गरिएको थियो ।सहायक रथीहरूलाई अवकास दिने सरकारी निर्णय कार्यान्वयन नर्गन सर्वोच्चले अन्तरिम आदेश दिएपछि रक्षा मन्त्रालयले गत बुधबार उक्त आदेश खारेजीको माग गर्दै निवेदन दायर गरेको थियो । सर्वोच्चको आदेशपछि आठै जना सहायक रथी काममा फर्किसकेका छन् ।

नेपाल र नर्वेबीच जलविद्युत् विकासलाई तीन वर्षे सम्झौता

लिम्वूवान डट व्लगस्पोट डटकम,काठमाडौं

नेपाल र नर्वेबीच जारी शान्ति प्रक्रिया र नेपालको जलविद्युत् विकासलाई प्राथमिकतामा राखी तीन वर्षे नयाँ बृहत्तर समझदारी पत्रमा सोमबार सम्झौता भएको छ ।प्रधानमन्त्री पुष्पकमल दाहालको भ्रमणको अवसर पारेर भएको समझदारी पत्रमा विद्यमान सहयोगलाई निरन्तरता दिँदै ऊर्जा, शिक्षा र असल शासनका क्षेत्रमा थप सहयोग गर्ने उल्लेख छ । त्यस्ता क्षेत्रमा नेपाल सरकारसँग ठोस प्रस्तावको आह्वानपछि नर्वे सरकारले सहयोग गर्नेछ ।प्रधानमन्त्री दाहाल नर्वे र फिनल्यान्ड भ्रमणका लागि आइतबार ओस्लो आएका हुन् । उनका साथ पुत्र प्रकाश, श्रीमती सीता, व्यापारी टोलीसहित १९ जना भ्रमणमा छन् ।नेपालमा आएको परिवर्तनलाई समेत सम्बोधन गरी भएको नयाँ समझादारी पत्रले सन् १९९६ मा दुई देशबीच भएको समझदारीलाई प्रतिस्थापन गरेको छ । पुरानो समझदारी पत्रले सहयोगका क्षेत्रलाई विशिष्टीकृत गर्न सकेको थिएन ।समझदारी पत्रमा परराष्ट्र सचिव ज्ञानचन्द्र आचार्य र नर्वे विदेश मन्त्रालयका उपमहासचिव अट्ले लेकभोलले हस्ताक्षर गरेका हुन् । हस्ताक्षरमा प्रधानमन्त्री दाहाल र नर्वेका वातावरण तथा अन्तर्राष्ट्रिय विकासमन्त्री इरिक सोल्हेम उपस्थित थिए । नेपालको शान्ति प्रक्रियामा विशेष चासो राख्ने सोल्हेमको विशेष पहलमा भ्रमणको व्यवस्था मिलाइएको हो ।नेपालको तीन वर्षे अन्तरिम योजना, सरकारका न्यूनतम साझा कार्यक्रम र बजेटमा उल्लेखित सरकारका मुख्य प्राथमिकतालाई आधार मानी समझदारी पत्र तयार पारिएको परराष्ट्र मन्त्रालयका सहसचिव प्रद्युम्न विक्रम शाहले ई-कान्तिपुरलाई बताए ।यो बृहत्तर समझदारी हो, यसकै आधारमा तीन वर्षमा नर्वेको सहयोग र लगानीका प्राथमिकता र परियोजना निर्धारित हुनेछन्, उनले भने ।सन् २०११ सम्मका लागि भएको यो बृहत्तर विकास संरचनामा नेपालको ऊर्जा, शिक्षा, असल शासन, सरकार निजी साझेदारी, नागरिक समाजसँगको सहकार्यमा विशेष जोड दिइएको छ । जलविद्युतो क्षेत्रमा सहयोग केन्दि्रत गरे पनि परियोजना विशेषको नाम समझदारी पत्रमा उल्लेख छैन । स्रोतका अनुसार, यो समझदारी पत्रमार्फत नर्वेका लागि अब नेपालको जलविद्यत् लगानीलाई थप खुला भएको छ ।ऊर्जाबाहेकका नौ बुँदे सहयोगका क्षेत्रमा शान्ति र लोकतन्त्रको निर्माण, नेपालको स्कुल क्षेत्र सुधार कार्यक्रम, नेपाललाई बजेट सहयोग, जारी शान्ति प्रक्रियामा नेपालले चाहेको थप सहयोग उपलब्ध गराउने, नागरिक समाजलाई सहयोग, निजी क्षेत्रसँगको सहकार्य, सार्वजनिक निजी साझेदारी र राष्ट्रसंघमार्फत नेपाललाई दिएको सहयोगको निरन्तरतालगायत छन् ।समझदारी पत्रपछि आयोजित संक्षिप्त पत्रकार सम्मेलनमा मन्त्री सोल्हेमले नेपालको शान्ति प्रक्रिया सकारात्मक दिशाउन्मुख भएको बताए । उनले शान्ति प्रक्रिया, नयाँ संघीय प्रणाली र आर्थिक विकासमा नेपाललाई पर्ने सबैखाले सहयोग गर्न नर्वे तयार रहेको समेत बताए ।
प्रधानमन्त्री दाहालसँगका आफ्ना सम्बन्धलाई स्मरण गर्दै उनले नर्वेमा स्वागत गर्न पाउनु सुखद भएको समेत बताए । सकारात्मक दिशाउन्मुख भई पनि नेपालको शान्ति प्रक्रियामा जटिलता पनि छन्, तर मलाई विश्वास छ, नेपालका राजनीतिक दलले तिनलाई समाधान गर्नेछन्, उनले भने ।प्रधानमन्त्री दाहालले नेपालको शान्ति प्रक्रियामा नर्वेको सहयोगको प्रशंसा गर्दै नयाँ संविधान निर्माणमा सबै पार्टीको प्रतिबद्धता रहकाले तार्किक निष्कर्षमा पुग्ने बताए । दाहाललाई नर्वेजियन सञ्चारमाध्यमका प्रतिनिधिले सेना समायोजन, ऊर्जामा नर्वेको सहयोग, मेलम्ची खानेपानी परियोजनालगायतका विषयमा जिज्ञासा राखेका थिए ।यसैबीच प्रधानमन्त्री दाहालले सोमबारै नर्वेका राजा हेराल्ड पाँचौं र प्रधानमन्त्री जेन्स स्टोलनवर्गसँग छुट्टाछुट्टै भेट गरेका छन् । त्यसक्रममा नेपाल र नर्वे सम्बन्ध र सहयोगबारे छलफल भएको छ ।

हङकङमा नेपालीको वृहत विरोध मौन जुलुश

लिम्वूवान डट व्लगस्पोट डटकम,हङकङ

गत मार्च १७ मा पुलिसको गोलीबाट घरबारविहीन एक हङकङ निवासी नेपाली दिलबहादुर लिम्बूको मृत्यु भएकोमा विरोधस्वरुप हङकङ नेपाली महासँघको आयोजनामा एक वृहत मौन जुलुशको आयोजना आज अपरान्ह हङकङको वानचाइबाट सेन्ट्रलस्थित हङकङ प्रमुख डोनाल्ड चाङको अफिसमा पुगी विरोधपत्र हस्तान्तरण गरेको छ । जंगलमा बसोबास जीवनलाई बचाउन वाध्य भएको दिलबहादुर लिम्बूको पुलिसको गोली प्रहारबाट मृत्यु भएको थियो ।हङकङ नेपाली महासँघले आयोजना गरेको यस कार्यक्रमलाई हङकङमा रहेका महासँघबाहिरका संघसंस्थाहरुले राम्रो साथ दिएका थिए भने नेपाली बडिबिल्डिङ एस्सोसिएसनका सदस्यहरुलगायत केही संघसंस्थाका सदस्यहरु स्वयंसेवक भई जुलुशलाई नियन्त्रणबाट बाहिर जान नदिन सक्षम भएका छन् । साउथर्न प्लेग्राउण्डमा जम्मा भएका तीनदेखि चार हजार संख्याका नेपालीहरु, केही चाइनिज र विदेशी घरेलु कामदारहरु हङकङ नेपाली महासँघको व्यानर तथा विभिन्न प्ले कार्डहरु बोकेर हिँडेका थिए । मुख्य रोडको आधा भाग मौन जुलुशमा भाग लिनेहरुलाई छुट्याइएको थियो । जुलुशलाई शुरु गर्नु भन्दाअगाडि मानवाधिकार समूहकी डाइरेक्टर फर्मी वोङ, महासँघका उपाध्यक्ष हर्क राना, तथा एक पाकिस्तानीले चाइनिज, अंग्रेजी, नेपाली तथा उर्दूमा शान्तसँग, हङकङको कानूनको पालना गर्दै समूह समूहमा हिँड्नका लागि अनुरोध गरिएको थियो । हालैका वर्षहरुमा नेपालमा नेपालीहरुबाट प्रदर्शन गरिने विरोध शैलीसँग जानकार भएका लाग्ने प्रहरी अधिकृतहरु बारम्बार स्वयंसेवकहरुलाई जुलुशमा अनियन्त्रित हुन नदिन सावधान गराइरहेका देखिन्थे ।तीनदेखि चार हजारको संख्याका उक्त जुलुश शान्त रही प्ले कार्डहरु बोकेर छुट्याइएको बाटोबाट नै गन्तव्यतिर जाँदै गरेका टाढैबाट देखिन्थ्यो । …’हामी बीर छौं, बहादुर छौं, र बुद्दिमान तथा चेतनशील पनि छौं भन्ने दर्शाउन हामी शान्तसँग जुलुशमा भाग लिँदैछौं’ भनी कार्यक्रमलाई सञ्चालन गरेका थिए भने महासँघका अध्यक्ष हेम लिम्बूले ‘सबैलाई शान्त रही हामी नेपालीहरु गम्भीर तथा सम्वेदनशील भएको प्रमाणित गर्न’ सबैलाई आग्रह गरेपछि जुलुश शुरु भएको थियो । जुलुशको बीचमा केही उरन्ठेउला केटाहरु केही हल्ला गर्दै थिए र त्यसमध्ये अलि ज्यादै गर्नेलाई स्वयंसेवकहरुले जुलुशबाट बाहिर निकालेका थिए ।‘मैले सार्वजनिक स्थलमा पिसाव गरेँ…पुलिस मलाई नमार’, ‘घरबारविहीन हुनु, बेरोजगार हुनु संगीन अपराध होइन’, ‘मानव अधिकारको रक्षा गर’, ‘निष्पक्ष जाँचबुझ आयोगको गठन गरी गोली हान्ने पुलिसलाई कारबाही गर’ आदि प्लेकार्डहरु बोकिएको थियो भने, आयोजकहरुले भनेविपरीत नेपाली केही संस्थाले आफ्नो संस्थाको छुट्टै ब्यानर र केही समूहले ‘अल्पसंख्यकहरु अपराधी होइनन्’ भन्ने प्लेकार्ड पनि बोकेका थिए, जसलाई त्यसरी सामेल नगराइने बताइएको थियो । सवा तीन बजे शुरु भएको जुलुश पाँच बजेको करीव समाप्त भएको थियो ।हङकङका चिफ एक्जेक्युटिभ डोनाल्ड चाङको अफिसमा पुगी सानो कोण सभामा परिणत भएको उक्त कार्यक्रमलाई किसन राईले संचालन गरेका थिए भने यस विरोध समितिका प्रवक्ता गणेश इजमले चिफ एक्जेक्युटिभ चाङलाई दिइने विरोध पत्र पढेर सुनाएका थिए, जसको चाइनिज भाषाको भर्सनचाहिँ मानवाधिकार समूहकी फर्मी वोङले पढेकिथिईन् । महासँघका अध्यक्ष हेम लिम्बूले चिफ एक्जेक्युटिभका प्रतिनिधिलाई उक्त विरोधपत्र हस्तान्तरण गरेका थिए ।गणेश इजमले ‘यसरी घरबारविहीन हङकङवासी नेपालीको प्रहरीको अत्यधिक शक्तिको प्रयोगले गर्दा भएको मृत्युमा गम्भीर रुपमा आपत्ति जनाउँदै यसरी यो कार्यक्रमको आयोजना गरिएको र पुलिसको हेडक्वाटरमा नगई यहाँ आउनुमा जाँचपडताल गरिने समिति निष्पक्ष आफूहरुले मान्न सक्ने’ बताएका थिए भने कार्यक्रमलाई विसर्जन गर्ने क्रममा अध्यक्ष लिम्बूले, ‘हङकङ नेपाली महासँघको आहृवान यसरी एकजुट भई, अनि शान्त रही जुलुशमा भाग लिने’ सबैलाई धन्यवाद दिएका थिए । किसन राईले ‘यदि यो पटकको यस विरोध प्रदर्शनी तथा विरोध पत्रअनुसार कारबाहीहरु नगरे नेपालीहरु माथिसम्म जाने’ भनेका थिए ।

सेना समायोजन प्राविधिक समितिको समयसीमा बढाउन माग

लिम्वूवान डट व्लगस्पोट डटकम,काठमाडौं

सेना समायोजन विशेष समिति अन्तर्गतको प्राविधिक समितिले आफ्नो समयसीमा बढाउन विशेष समितिलाई सुझाव दिएको छ । प्राविधिक समितिको आइतबार बसेको पहिलो बैठकले हतारमा निर्णय गरिए त्यसले दीर्घकालीन असर पार्ने भन्दै समयसीमा बढाउन माग गरेको हो । यसअघि विशेष समितिले तीन महिनाभित्र सेना समायोजन तथा पूर्नस्थापना गर्नुपर्ने समयसीमा सहितको निर्देशन प्राविधिक समितिलाई दिएको थियो । प्राविधिक समितिले विशेष समितिका सदस्यले पाए अनुसारको सेवा सुविधा, यस अघि सरकार र माओवादीबीच भएको सेना समायोजन सम्बन्धी सम्झौताका कागजपत्र उपलब्ध गराउनुपर्ने लगायतका माग गरेको प्राविधिक समितिका एक सदस्यले जानकारी दिए ।

खस-क्षेत्री एकता समाजले सशक्त आन्दोलन गर्ने चेतावनी

लिम्वूवान डट व्लगस्पोट डटकम,काठमाडौं

विराटनगर/ खस-क्षेत्रीलाई अलग जातीय समूहमा वैधानिक किटान गर्नेलगायतका पाँचवटा माग संविधान मस्यौदामा नपरेमा खस-क्षेत्री एकता समाजले सशक्त आन्दोलन गर्ने चेतावनी दिएको छ । समाजको केन्द्रीय समितिद्वारा शनिबार विराटनगरमा आयोजित पत्रकार सम्मेलनमा सो चेतावनी दिइएको हो । खस-क्षेत्री जातिलाई 'अन्य' (क्षेत्री, बाहुन, सन्यासी, ठकुरी, चुरौटे) को सूचीबाट हटाई बेग्लै आदिवासी खस क्षेत्रीमा सूचीकृत गरिनुपर्ने जोडदार माग गरिएको छ ।विसं. ०५८ को जनगणना अनुसार सबैभन्दा बढी जनसंख्या ३५ लाख ९३ हजार चार सय ९६ अर्थात् नेपालको जनसंख्याको १५.८० प्रतिशत खस-क्षेत्री रहेको समाजका केन्द्रीय उपाध्यक्ष योगेन्द्र थापाले बताए । तर, राज्यको हरेक अंगमा खस-क्षेत्रीको पहुँचलाई खुम्च्याउँदै लगेर सुविधा तथा अधिकारविहीन श्रेणीमा पुर्‍याउने षड्यन्त्रहरू भइरहेको उनले आरोप लगाए । सम्पूर्ण देशभरि स्थापना भएका खस-क्षेत्रीका अन्य संघसंस्थासँग सहकार्य तथा कार्यगत एकता गर्दै अघि बढ्ने घोषित लक्ष्यअनुसार काठमाडौंको क्षेत्री समाज महासंघ र पोखराको क्षेत्री समाज नेपालसँग केन्द्रीयस्तरको खस क्षेत्री संयुक्त राष्ट्रिय मोर्चा निर्माण भएको जानकारी दिइयो । समाजकी अध्यक्ष दुर्गा चापागाइं बस्नेतले आरक्षण जातिको आधारमा नगरी निश्चित समयावधिका लागि गरिबले सेवा र सुविधा पाउनेगरी वर्गीय आधारमा गरिनुपर्ने माग राखिन् । साथै संघीय राज्यको नामकरण गर्दा जातजातिका आधारमा नभई नदी, पहाड, हिमाल वा अन्य प्राकृतिक सम्पदाका आधारमा गरिनुपर्नेमा पनि पत्रकार सम्मेलनमा जोड दिइयो ।

इन्डोनेसियाको बाँध भत्कँदा मर्नेहरूको संख्या ९३

लिम्वूवान डट व्लगस्पोट डटकम,काठमाडौं

जकार्ता/ इन्डोनेसियाको जर्कातास्थित एउटा बाँध भत्कँदा मर्नेहरूको संख्या ९३ पुगेको छ । हराइरहेका एक सयभन्दा बढीलाई जीवितै फेला पार्न सकिने संभावना अत्यन्त न्यून रहेको सरकारी अधिकारीले बताएका छन् । आइतबार बिहानसम्म ९३ जनाको लास भेटिएको उद्धार तथा खोजीमा संलग्न अधिकृतले बताए । प्रहरी तथा सैनिकसमेत गरी सात सय उद्धारकर्मी खोजी तथा उद्धारमा खटिरहेको जनाइएको छ । राजधानी जकार्ताको बाहिरी भागमा अवस्थित बाँध शुक्रबार बिहान सखारै भत्केको थियो । दिनभरिको अविरल वर्षाका कारण जलाशयमा पानीको मात्रा अत्यधिक बढ्नाले बाँध भत्केको अनुमान गरिएको छ । वातावरणवादी तथा स्थानीय बासिन्दाले भने समयमा बाँधको मर्मतसम्भार नहुँदा दुर्घटना भएको दाबी गरेका छन् । बाँध भत्केपछि आएको बाढीले एक सयभन्दा बढी घरलाई नराम्ररी प्रभावित पारेको छ । यसैबीच, राष्ट्रपति सुसिलो बामबाङ युधोयोनोले प्रभावित स्थलको निरीक्षण गरेका छन् । पीडित प्रभावित परिवारलाई तत्काल सहयोग गर्न पनि उनले सरकारी निकायहरूलाई निर्देशन दिएका छन् ।

पेलेको पहिलो यौन सम्पर्क पुरुषसंग

लिम्वूवान डट व्लगस्पोट डटकम,काठमाडौं

महान् फुटबल खेलाडी को भन्ने विषयमा संसारका धेरै फुटबल प्रेमीमाझ बहस हुने गर्छ । ब्राजिलका पेले र अर्जेन्टिनाका म्याराडोनामा आए पछि नयाँ बहस सुरु हुन्छ । पेले महान् कि म्याराडोना ? विश्व फुटबलको सर्वोच्च संस्था फिफालाई समेत यो निर्णय गर्न कठिन भयो । त्यसपछि, फिफाले सन् २००० को अन्त्यमा पेले र म्याराडोना दुवैलाई संयुक्त रूपमा शताब्दीकै महान् फुटबलरको सम्मान दियो । आपना वेबसाइटका फुटबल प्रशंसकको मतका आधारामा म्याराडोनालाई र पदाधिकारीको मतका आधारमा पेलेलाई फिफाले सर्वोत्कृष्ट ठहर्‍याएको थियो । प्रशंसकमाझ मात्र नभई महान् फुटबलर मानिएका यी दुई खेलाडी एक-अर्काप्रति असन्तुष्टि र कुण्ठा बोकेर बसेका छन् । एक-अर्काप्रतिको यिनीहरूको रबैया’ कहिल्यै राम्रो रहेको पाइन्न । फिफाले सन् २००० मा महान् फुटबलरको उपाधि दिँदा पेलेलाई नपर्खी म्याराडोना पहिल्यै कार्यक्रमस्थल छाडेर हिँडेका थिए । त्यसको केही वर्षपछि आफूले चलाएको एक टेलिभिजन कार्यक्रममा म्याराडोनाले पेलेलाई अन्तर्वार्ताका लागि बोलाएका थिए । सो घटनाले विश्व फुटबल जगत्लाई रोमाञ्चित तुल्याएको थियो । आ-आपनो शैलीका उत्कृष्ट फुटबलरबीचको शीतयुद्ध समाप्त भएको मानेका थिए धेरैले । तर, यस साता यी दुईबीच फेरि वाक्युद्ध सुरु भएको छ । फुटबलसँगै लागूऔषधको दुव्र्यसनमा लागेका कारण म्याराडोनालाई आइडल मान्न नसकिने अभिव्यक्ति दिए पेलेले । पेलेको विचार थियो म्याराडोना युवाका लागि खराब आइडल हुन् । पेलेको सो भनाइबाट आक्रोशित म्याराडोना पनि किन चुप लागी बस्थे । पेलेको भनाइबारे के धारणा छ ? भन्ने पत्रकारको प्रश्नको जवाफमा म्याराडोनाले कडा जवाफ दिए । तिमीहरू मबाट के उत्तर चाहन्छौँ ? उसले (पेलेले) पहिलो यौन-सम्पर्क त पुरुषसँग गरेको थियो,’ ४८ वर्षीय म्याराडोनाले पत्रकारलाई दिएको जवाफ हो यो । पुरानै समयमा जाउ, सन् २००० को पुरस्कार-समारोहमा पेलेले भनेका थिए, हामी राम्रा साथी होइनौँ, तर यदि ऊ आफूलाई शताब्दीकै महान् खेलाडी सोच्छ भने त्यो उसको समस्या हो ।’ पेलेले आफ्नो खेल-जीवनमा चार विश्वकप खेले जसमध्ये तीनपटक उनले टोलीलाई फाइनलमा पुर्‍याए र तीनैपटक उपाधि जिताए भने म्याराडोनाले पनि चार विश्वकप खेले । दुईपटक उनी रहेको टोली फाइनल पुग्यो । जसमध्ये एकको फाइनलमा पराजय र अर्कोमा उपाधि जिताउन सक्षम भएका थिए म्याराडोना उनको टोलीलाई ।

संघीय लोकतान्त्रिक राष्ट्रिय मञ्चको अपील

अपील राम्ररी देखिएन भने अपीलमा क्लिक गर्नुहोस्

प्रधानमन्त्री नर्वे र फिनल्याण्ड भ्रमणका लागि प्रस्थान

लिम्वूवान डट व्लगस्पोट डटकम,काठमाडौं

प्रधानमन्त्री पुष्पकमल दाहाल शनिबार अपरान्ह सरकारी र व्यापारीक प्रतिनिधि सम्मिलित १९ सदस्यीय टोलीको नेतृ्त्व गर्दै नर्वेको ओस्लो प्रस्थान गरेका छन् । प्रधानमन्त्री दाहालले त्यहाँ नर्वेका राजा र प्रधानमन्त्रीसँग भेटवार्ता गर्ने छन् । नर्वे भ्रमणका क्रममा द्धिपक्षीय विकास सहयोग सम्बन्धी समझदारी पत्रमा दुवै मुलुकका परराष्ट्र सचिवहरूले हस्ताक्षर गर्ने कार्यक्रम छ ।नर्वे भ्रमण सकि प्रधानमन्त्री दाहाल चैत १९ गते फिनल्याण्ड जाने छन् । त्यहाँ उनले फिनिस राष्ट्रपतिसँग भेटवार्ता गर्नुका साथै विभिन्न उद्योग तथा नविकरणीय उर्जा सम्बन्धी परियोजनाहरूको अध्ययन भ्रमण गर्ने छन् । भ्रमण सकि प्रधानमन्त्री दाहाल चैत २२ गते स्वदेश फर्कने कार्यक्रम रहेको छ । यसअघि गत माघ ४ गतेका लागि तय भएको यो भ्रमण मुलुकको आन्तरीक कारण देखाउँदै दाहालले स्थगित गरेका थिए । यसैबीच प्रधानमन्त्री दाहालले आफ्नो युरोप भ्रमण सबै दलको सहमतिमा हुन लागेको बताएका छन् । मुलुकमा राजनीतिक संकट गहिरिँदै गएका बेला विदेश भ्रमणमा गए गलत नजिर बस्ने भन्दै अन्य दलहरूले विरोध गरिरहँदा उनको यस्तो भनाइ आएको हो । सिंहदरवारमा जारी एकीकृत माओवादीको संविधानसभा दलको बैठकबाट वाहिरिएपछि संचारकर्मीसँग कुरा गर्दै उनले भ्रमणप्रति दलहरूले समर्थन जनाएको बताए ।छलफलका क्रममा सत्तारुढ र प्रतिपक्षी दलहरूले एकपटक स्थगीत भइसकेको भ्रमणलाई फेरी रोके मुलुकको प्रतिष्ठामा आँच आउने भएकाले भ्रमणलाई नरोक्ने सुझाव दिएको उनले बताए । उनले सरकारले जारी गरेको अध्यादेश जनताका पक्षमा भएकाले सदनमा त्यसको विरोध नहुने विश्वास ब्यक्त गरे । उनले वुटबल घटनाका दोषीलाई कारबाही हुने प्रतिबद्धता जनाउदै घटनालाई राजनीतिककरण नगर्न आग्रह समेत गरे ।

नेकपा एमाले सरकारबाट बाहिरिने चेतावनी

लिम्वूवान डट व्लगस्पोट डटकम,काठमाडौं

नेकपा एमालेका अध्यक्ष झलनाथ खनालले एमाले कुर्सीमा बस्न मात्र सरकारमा नगएकोले माओवादीले आफ्ना गलत क्रियाकलाप नसच्याए सरकारबाट बाहिरिने चेतावनी दिएका छन् । उनले माओवादीले व्यक्ति हत्याको श्रृंखला बढाउदै गए अन्तत आफ्नै पार्टीको हत्या हुने चेतावनी दिए । एमालले पटक पटक सुध्रन गरेको आग्रह तोड्दै माओवादीले आफू लगायत विभिन्न राजनीतिक दलका कार्यकर्ताहरुको हत्या गरीरहेको बताउदै उनले भने-'अहिले माओवादीले अन्य दल र जनताको शान्तिको चाहना र लोकतान्त्रिक भावना विरुद्ध उत्रेर हत्याको श्रंखला बढाएको छ । यसले केही समय अरुले क्षति व्यहोर्नु परेपनि अन्तत उसले आफ्नै पाटीको हत्या गर्ने छ ।' युथफोर्स रुपन्देही सदस्य प्रचण्ड थैवको श्रद्धाञ्जली सभामा बोल्दै अध्यक्ष खनालले सरकारको नेतृत्व सम्हालेको माओवादीले शिविरमा राखेका मान्छेलाई प्रयोग गरेर हत्या हिंसा कायम राखेको आरोप लगाए । 'सरकारमा बस्ने र लोकतान्त्रिक मान्यतामा पनि बस्छु भन्ने माओवादीले कुरा एउटा र काम अर्को गरेको बताउदै उनले भने-'सधैभरी हिंसात्मक फासिष्ट र गुण्डागर्दी ढंगले सरकार चल्दैन । देश लोकतान्त्रीक मान्यतामा र शान्ति प्रक्रियामा पनि जाँदैन ।' उनले माओवादीलाई गम्भीर हुन सुझाव दिए ।

लिम्बुवान सांस्कृतिक मेला तथा चलचित्र महोत्सव हुन

लिम्वूवान डट व्लगस्पोट डटकम,काठमाडौं

काठमाडौं/ विभिन्न संघसंस्थाले आफ्ना फिल्मलाई प्रोत्साहन गर्ने उद्देश्यले महोत्सव गरिरहेको वेलामा लिम्बुवान राष्ट्रिय चलचित्रकर्मी संघले पनि महोत्सव आयोजना गर्ने भएको छ । २० देखि ३० वैशाखसम्म लिम्बुवान क्षेत्रमा लिम्बुवान सांस्कृतिक मेला तथा चलचित्र महोत्सव हुन गइरहेको अध्यक्ष सुरज सुब्बाले बताए । सबै जातजाति, भाषा, संस्कृति र मौलिकता बोकेका चलचित्र महोत्सवमा सहभागी हुने भएका छन् भने सहभागी फिल्म चलचित्र जाँचपास समितिबाट सेन्सर भएको हुनुपर्नेछ । महोत्सवमा सहभागी फिल्मले निर्देशन, कथा, पटकथा लगायत २९ विधामा प्रतिस्पर्धा गर्नेछन् ।

धेरै तातो चिया पिउँदा घाँटीको क्यान्सर हुन सक्ने

लिम्वूवान डट व्लगस्पोट डटकम,काठमाडौं

लन्डन/ धेरै तातो चिया पिउँदा घाँटीको क्यान्सर हुन सक्ने इरानी अनुसन्धानकर्ताले बताएका छन् । चियालाई केही सेलाउन दिएर मात्र पिउन पनि उनीहरूले सल्लाह दिएका छन् । पहिलेका अध्ययनले सुर्ती तथा रक्सीजन्य पदार्थ खानाले घाँटीको क्यान्सरको सम्भावना बढ्ने बताएको थियो । अनुसन्धानमा तातो पेयपर्दाथले पनि घाँटीको क्यान्सरको सम्भावना बढाउने उल्लेख छ । अनुसन्धान बि्रटिस मेडिकल जनरलमा प्रकाशित गरिएको छ । ६५ डिग्री सेल्सियसभन्दा कम तातो चियाको तुलनामा ७० डिग्री सेल्सियसभन्दा बढी तातो चिया आठगुणा बढी क्यान्सरको जोखिमयुक्त हुने अनुसन्धानकर्ताले बताएका छन् । तेहरान युनिभर्सिटी अफ मेडिकल साइन्सका रेजा मलेकजादेह र उनका सहकर्मीले इरानको गोलुस्तान प्रान्तका तीन सय घाँटीको क्यान्सरपीडित र पाँच सय ७१ स्वस्थ पुरुष र महिलाको चिया पिउने तरिकाबारेमा अध्ययन गरेका थिए । इरानको उत्तरी क्षेत्रमा अवस्थित गोलुस्तान प्रान्त विश्वकै सबैभन्दा बढी घाँटीको क्यान्सर रोगी भएको क्षेत्रमध्ये एक हो । तर, यस क्षेत्रमा धूम्रपान तथा मदिरापानको दर ज्यादै न्यून रहेको अनुसन्धानकर्ताले बताएका छन् । अनुसन्धानमा भाग लिएका सर्वसाधरण सबैले नियमित रूपमा दिनको करिब एक लिटरजति कालो चिया पिउँछन् । उम्लिएको चिया कपमा खन्याएको करिब चार मिनेटपछि चिया पिउने मानिसको तुलनामा दुई मिनेट नबित्दै चिया पिउने मानिसमा घाँटीको क्यान्सर लाग्ने सम्भावना पाँचगुणा बढी हुने अनुसन्धानकर्ताले बताएका छन् । मानिसले सामान्य ५६ देखि ६० डिग्री सेल्सियससम्मको तापक्रम भएको चिया पिउने बि्रटिस अध्ययनको प्रतिवेदनले देखाएको पनि अनुसन्धानकर्ताले उल्लेख गरेका छन् । क्यान्सरका कारण प्रत्येक वर्ष विश्वमा पाँच लाख मानिस मर्ने गर्छन् । एसिया, अपिmका र दक्षिण अमेरिकी क्षेत्रमा घाँटीको क्यान्सरका रोगी बढी छन् । एक साताअगाडि अमेरिकी तथा जापानी अनुसन्धानकर्ताले संयुक्त रूपमा गरेको अनुसन्धानमा पूर्वी एसिया-चिनियाँ, जापानी तथा कोरियन नागरिकमा इन्जाइम-प्रोटिनयुक्त यौगिक तत्त्व)को कमी भएकाले उनीहरूले रक्सी पिउँदा घाँटीको क्यान्सर हुने सम्भावना बढी हुन्छ ।

दिसा खुवाउने महिलालाई कानुनी कारबाही माग

लिम्वूवान डट व्लगस्पोट डटकम,काठमाडौं

काठमाडौं/ दलित महिलालाई बोक्सीको आरोप लगाई दिसा खुवाउने ललितपुर प्युटार-७ की प्रधानाध्यापिका विमला लामामाथि कानुनी कारबाही अघि बढाउन राष्ट्रिय महिला अयोगले सरकारसँग माग गरेको छ । पीडित महिलालाई दिइएको यातना बर्बर र मानवता विरोधी भएको भन्दै दोषी महिलालाई जागिरबाट बर्खास्त गर्नुपर्ने आयोगले जनाएको छ ।राजधानीमा शुक्रबार आयोजित पत्रकार सम्मेलनमा आयोगकी सदस्य धनकुमारी सुनारले यत्तिका दिनसम्म दोषी पक्राउ नगरिएकोमा रोष प्रकट गरिन् । घटनापछि पीडितको अवस्था बुझ्न घटनास्थल पुगेका सञ्चारकर्मी तथा अधिकारकर्मी र प्रहरीमाथि भएको दुव्र्यवहार राज्यलाई नै चुनौती भएको उनको भनाइ थियो । 'पीडकलाई गाउँलेले नै संरक्षण गरी प्रतिकारमा उत्रिएका छन्, यो राज्यलाई नै चुनौती हो,' सुनारले भनिन् । दोषीलाई कानुनी दायरामा ल्याई पीडितलाई न्याय दिलाउन उनले सरकारसँग आग्रह गरिन् ।

बन्द हड्ताल विरुद्धको अभियान सुरु

लिम्वूवान डट व्लगस्पोट डटकम,काठमाडौं

बन्द-हडतालविरुद्धको संकल्प प्रस्तावमा सबै दललाई ऐक्यबद्धता जनाउन लगाउने उद्योगी व्यवसायीको प्रयास असफल भएको छ ।प्रधानमन्त्रीसहित संविधानसभामा प्रतिनिधित्व गर्ने १९ दलका प्रतिनिधि कार्यक्रममा सहभागी नभएपछि प्रयास असफल भएको हो । बन्द हड्तालले उद्योग व्यवसाय धराशयी भएकाले त्यसविरुद्धको अभियान सुरु गर्न निजी क्षेत्रका छाता संगठनहरूले शुक्रबार राजधानीमा संकल्प प्रस्तावमा ऐक्यबद्धता जनाउने कार्यक्रम गरेका थिए ।नेपाल उद्योग वाणिज्य महासंघ, नेपाल उद्योग परिसंघ, होटल संघ नेपाल, नेपाल चेम्बर अफ कमर्स र घरेलु तथा साना उद्योग महासंघद्वारा संयुक्त रुपमा तयार गरिएको बन्दविरुद्धको संकल्प प्रस्ताव कार्यक्रममा प्रस्तुत गरिएको थियो ।प्रस्तावलाई सहभागी दलका प्रतिनिधि र मन्त्रीहरूले सकारात्मक भने पनि एकअर्काप्रति गालीगलोजमै अधिकांश समय खर्चिएका थिए । कार्यक्रममा कांग्रेस, एमाले, माओवादीसहित समाजवादी जनता दल र नेपाल परिवार दलका प्रतिनिधिमात्र सहभागी थिए । सहभागी कांग्रेस नेता डा. रामशरण महतले सत्ताधारी माओवादीकै कारण औद्योगिक क्षेत्रमा सुरक्षा हुन नसकेको बताए । उनले उद्योगी व्यवसायीले सबै दललाई औंला ठड्याउनुको साटो माओवादी अराजकताको विरोध गर्न चुनौती दिए । एमाले नेता भरतमोहन अधिकारीले दण्डहीनताले बन्द, हड्ताल बढेको बताउँदै त्यसले संविधान लेखनमा समस्या पार्ने बताए । राष्ट्रिय जनशक्ति पार्टीका सहअध्यक्ष डा.प्रकाशचन्द्र लोहनीले राज्यले पुँजी र श्रमको सन्तुलन कायम गर्न नसक्दा बन्द-हड्ताल बढेको जनाए ।पर्यटनमन्त्री हिसिला यमीले सरकारसँग प्रष्ट सोच भए पनि कार्यान्वयनमा समस्या रहेको स्विकारिन् । उनले सरकारले निजी क्षेत्रका लागि विशेष आर्थिक क्षेत्र घोषणा तथा लगानी बोर्ड गठन गरेको दाबी गरिन् । श्रममन्त्री लेखराज भट्टले अरु अगाडि बढी क्रान्तिकारी देखिन बन्द, हड्तालको प्रतिस्पर्धा बढेको बताए । निजी क्षेत्रले सार्वजनिक गरिएको प्रस्तावमा बन्द स्वेच्छिक, शान्तिपूर्ण, जायज मर्का वा मागमा आधारित र लक्षित वर्गमा केन्दि्रत हुनुपर्ने उल्लेख छ । माग पूरा गराउन वैकल्पिक उपाय अपनाउनुपर्ने उल्लेख गर्दै प्रस्तावमा बन्द गरे पनि औषधि पसल, अस्पताल, होटल, चमेनागृह, निजी तथा सार्वजनिक यातायात, बिजुली, पानी, फोहोरमैला संकलन, सञ्चारलगायत क्षेत्रलाई बन्द निषेधित व्यवस्था गरिनुपर्ने सुझाव राखिएको छ ।यो वर्ष नेपालमा ११ महिनामा (३ सय ३० दिनमा) सार्वजनिक र साप्ताहिक बिदाबाहेक १ सय २० दिन उद्योग व्यवसाय बन्द भएको उद्योग वाणिज्य महासंघका अध्यक्ष कुशकुमार जोशीले कार्यक्रममा जानकारी दिएका थिए । प्रतिदिन १० करोड हिसाब गर्दा सो अवधिमा १२ अर्ब रुपैयाँ नोक्सानी भएको उनले बताए ।बन्दकै कारण रोजगारी घटिरहेको, नयाँ लगानी वातावरण नभएको, उद्योगधन्दा धराशयी तथा उद्योगीको जीउज्यान असुरक्षित भएको व्यवसायीले कार्यक्रममा जानकारी दिए । उद्योग परिसंघ अध्यक्ष विनोदकुमार चौधरीले संकल्प इमानदारीपूर्वक व्यवहारमा उतार्न आचारसंहिता बनाइने बताउँदै सरकारले बन्द, हड्ताल र अराजकता रोक्न कडा कदम चाल्नुपर्नेमा जोड दिए ।

तमु स्वायत्त प्रदेश बनाउन गुरुङ समुदायले माग

लिम्वूवान डट व्लगस्पोट डटकम,काठमाडौं

चितवन/ नयाँ संविधानमा तमु स्वायत्त प्रदेश बनाउन गुरुङ समुदायले माग गरेको छ । चितवनमा आयोजित प्रथम तमु एकता महाधिवेशनका सहभागीले यस्तो माग गरेका हुन् । गुरुङ समुदायले जाति, भाषा र क्षेत्रका आधारमा स्वायत्त प्रदेश घोषणा गर्नसमेत माग गरेका छन् । गोर्खा, लमजुङ, कास्की, तनहुँ, स्याङ्जा, पर्वत, मुस्ताङ र मनाङ गरी आठ जिल्लालाई समेटेर तमु स्वायत्त प्रदेश घोषणा गर्नुपर्ने उनीहरूको प्रस्ताव छ । 'हामी एकल जातीय पक्षमा छैनौँ,' महाधिवेशन मूल आयोजक समितिका संयोजक डा. रेमबहादुर गुरुङले भने, 'राजनीतिक आधारमा तमु स्वायत्त राज्य घोषणा गरिनुपर्छ ।' तमु छोज धिङका केन्द्रीय सदस्य शिव तामाङले सरकारले माग पूरा नगरे शान्तिपूर्ण आन्दोलन गर्ने चेतावनी दिए । प्रस्तावित आठ जिल्लामा ५० प्रतिशतभन्दा बढी गुरुङ समुदाय रहेको उनीहरूको दाबी छ । सो महाधिवेशनको शनिबार उद्घाटन गर्दै कानुनमन्त्री देव गुरुङले सरकार जातीय हक-अधिकारको पक्षमा रहेको बताए । उनले संविधानमा जातीय विषयलाई समेट्ने आश्वासनसमेत दिए । महाधिवेशनमा गुरुङ राष्ट्रिय परिषद् र तमु छोज धिङबीच एकीकरण गरी तमु ह्युला धोज धिङ गुरुङ राष्ट्रिय परिषद् नामकरण गरिएको छ । तीन दिनसम्म चल्ने सो महाधिवेशनमा ४७ जिल्लाका करिब हजार प्रतिनिधिको सहभागिता छ ।

बुटवलमा लगाएको कर्फ्यु यथावत प्रदर्शन नियन्त्रण बाहिर

लिम्वूवान डट व्लगस्पोट डटकम,काठमाडौं

एमाले युवा संगठन युथफोर्स रुपन्देहीका जिल्ला सदस्य प्रचण्ड थैवको बिहीबार राति गोलीहानी हत्या गरिएको बिरोधमा भएको प्रदर्शन नियन्त्रण बाहिर गएपछि स्थिति नियन्त्रणमा लिन स्थानीय प्रशासनले शुक्रबार बिहान देखि बुटवलमा लगाएको कर्फ्यु साँझ सम्म यथावत रहेको छ ।प्रशासनले बिहान ९ बजेबाट बुटवल नगरपालिकाको सम्पुर्ण क्षेत्र र सिद्धार्थ राजमार्गको भैरहवा सडकखण्डको आसपासको २ सय मिटर वरपर कर्फ्यु आदेश जारी गरेको छ । यद्यपी कर्फ्युको प्रवाह नगरी प्रर्दशनकारीहरुले सडकमा प्रर्दशन गर्न छाडेका छैनन् ।यसअघि बुटवलमा निस्केको एमाले तथा त्यसका भातृ संगठनहरुको जुलुशले बुटवलमा रहेको माओवादीको कार्यालयमा आगजनी गरेको छ । प्रदर्शन रोक्न प्रहरीले तीन राउण्ड अश्रुग्यास प्रयोग गरे पनि प्रदर्शन नियन्त्रणम आएको छैन ।प्रर्दशनकारीहरुले बुटवल नगरपालिका ८ चादवारीमा माओवादी सभासद टोपबहादुर रायमाझी बस्ने घरको कम्पाउण्डमा रहेका ३ वटा गाडी समेत तोडफोड गरेका छन् ।घटनाको विरोधमा युथफोर्स रुपन्देहीले दिउँसो २ बजे बुटवलमा पत्रकार सम्मेलन गर्दै छ भने ३ बजे बिरोध जुलुस निकाल्ने बताएको छ ।हत्याको बिरोधमा आज लुम्बिनी अञ्चल बन्दको आव्हान गरिएको छ । प्रहरीका अनुसार बुटवल नगरपालिका ९ दिपनगरका युथफोर्स जिल्ला सदस्य ३५ बर्षीय प्रचण्ड थैवलाई सुख्खानगरबाट हिलपार्क जाने पुलमा गोली हानीएको थियो । राति करिव साढे १० बजेको समयमा आफ्नो मोटरसाईकलमा साथी केशव रोकासंगै घरतर्फ जादै गरेको समयमा गोली हानीएको थियो । मोटरसाईकलमा पिछा गर्दै आएको समुहले केहीबेर रोकी थैवमाथि गोली हानेको रोकाले बताए ।युथफोर्सले थैवको हत्या स्ववियु निर्वाचनसंग जोडेर वाईसीएलले गराएको आरोप लगाएको छ । एमाले जिल्ला सचिव लीला गिरीले बुटवल बहुमुखी क्याम्पसमा भएको स्ववियु चुनाव विवादपछि वाईसीएलले धम्की दिदै आएको बताए ।प्रदर्शनकारीलेपनि थैवको हत्यामा वाईसीएका जिल्ला इन्चार्ज सुजित नै संलग्न भएको भन्दै नारावाजी गरेका छन् । सोही अनुसार प्रशासनमा ५ जनाको नाम किटानी सहित कारवाहीको लागि निवेदन दिएको युथफोर्सका संयोजक राजु गुरुङले बताए । तर माओवादीले भने यसबारे कुनै धारणा बाहीर ल्याएको छैन । इलाका प्रहरी कार्यालय बुटवलका डिएसपी ठाकुर प्रसाद ज्ञवालीले घटनाबारे अनुसन्धान जारी रहेको बताएका छन् । यसैबीच, माओवादी र वाईसीएल रुपन्देहीले विज्ञप्ति जारी गरी घटनामा आफ्नो कुनै संलग्नता नरहेको दावी गरेक छन् ।युथफोर्सका कार्यकर्ताको हत्यारालाई कार्वाहीको माग गर्दै एमाले निकट युवा विद्यार्थीले शुक्रवार विहानै देखि पाल्पा बन्द गराएको छ ।एसएलसी परीक्षालाई असर नपर्ने गरी यातायात, शिक्षणसंसथा, बजार सबै बन्द गरीने अनेरास्ववियुका टिकाबहादुर थापाले बताएका छन् । नवलपरासीमा पनि बिहानै देखि युथफोर्सका कार्यकर्ताले महेन्द्रराजमार्गमा अबरोध पुर्‍याएका कारण हजारौ यात्रु राजमार्गमा अलपत्र परेका छन् ।

एमालेले पार्टीका मन्त्रीहरु बैठकमा भाग नलिने निर्णय

लिम्वूवान डट व्लगस्पोट डटकम,काठमाडौं

सुर्खेत र बुटवलमा कार्यकर्ता हत्या गर्नेहरुलाई सरकारले कारवाही नगरेसम्म एमालेले पार्टीका मन्त्रीहरु मन्त्रीपरिषद बैठकमा भाग नलिने निर्णय गरेको छ । बुटवलमा चैत १३ गते राती युथफोर्सका कार्यकर्ता प्रचण्ड थैवमाथि गोली प्रहार गर्ने वाईसीएल रुपन्देहीका अध्यक्ष सुजितमाथि कारवाही नगरेसम्म एमालेका मन्त्रीहरुले मन्त्रीपरिषद बैठकमा भाग नलिने भएका छन् । चैत १४ गते पार्टी केन्द्रीय कमिटीको बैठकबाट एमालेले यस्तो निर्णय गरेको हो । दिउँसो तीन बजे पत्रकार सम्मेलन गर्दै एमालेले बुटवलमा आफ्ना कार्यकर्ताको हत्या भएको बिरुद्ध चैत १५ गते देशब्यापी प्रदर्शन गर्ने पनि घोषणा गरेको छ ।
एमाले अध्यक्ष झलनाथ खनालद्वारा प्रकाशित बिज्ञप्तीमा फागुन २६ गते सुर्खेतमा मारिएका पार्टीका कार्यकर्ता राजबहादुर मल्ल र थैवलाई सरकारले शहीद घोषणा गर्नुपर्ने तथा हत्यारालाई कारवाही हुनुपर्ने माग उल्लेखित ज्ञापनपत्र प्रधानमन्त्री पुष्पकमल दाहाललाई बुझाइने पनि उल्लेख छ । 'माओवादीका यस्तै गतिविधी रहने हो भने हामीले सरकारमा रहनेबारे पनि पुनर्बिचार गर्नुपर्छ' बिज्ञप्तीमा भनिएको छ ।

दिसा खुवाउनेलाई पक्राउ गर्न गएको प्रहरी ज्यान जोगाएर फर्किए

लिम्वूवान डट व्लगस्पोट डटकम,काठमाडौं

बोक्सीको आरोपमा एउटी दलित महिलालाई दिसा खुवाउने प्रधानाध्यापिकालाई पक्राउ गर्न गएको प्रहरी आफैं ज्यान जोगाएर फर्किएको छ । ललितपुरको चापागाउँबाट प्युटार पुगेको प्रहरी टोलीलाई सारा गाउँले मिलेर ढुंगामुढा गरेपछि दोषीलाई पक्रने प्रयास असफल भएको हो । बोक्सी लागेको भन्दै प्युटारको गडीभञ्ज्याङ प्राथमिक विद्यालयकी प्रधानाध्यापिका विमला लामा र उनका सहयोगीले स्थानीय दलित महिला कल्लीकुमारी विकलाई रक्ताम्मे हुनेगरी कुटपिट गर्दै दिसासमेत खुवाएका थिए । यो समाचार लिम्वूवान डट व्लगस्पोट डटकमले छापेलगत्तै राजधानीका पत्रकार, मानवअधिकारकर्मी र चापागाउँको प्रहरीसहितको संयुक्त टोली घटनास्थल पुगेको थियो । तर, बोक्सीलाई जोगाउन आएको भन्दै बूढाबूढी, युवायुवती र केटाकेटीले समेत ढुंगामुढा गरेपछि टोली ज्यान जोगाउँदै फर्किएको छ ।

कन्डमको आधारमा विद्यार्थी हत्याराको पक्राउ

लिम्वूवान डट व्लगस्पोट डटकम,काठमाडौं

विद्यार्थी हत्याको अभियोग लागेका सैनिक जवान घटनास्थलमा बरामद भएको कन्डमको आधारमा प्रहरीले पक्राउ गरेको छ । सेनाको मध्यपश्चिम पृतनाअन्तर्गत भैरव गणमा कार्यरत जवान झविन्द्रप्रसाद खनाललाई विद्यार्थीको शवनजिकै भेटिएको कन्डमको आधारमा सुर्खेत जिल्ला प्रहरी कार्यालयले पक्राउ गरेको हो ।जिल्ला प्रहरी कार्यालयमा बुधबार आयोजित पत्रकार सम्मेलनमा एसपी छविलाल जोशीले भने, 'हामीले मृतक विद्यार्थीको नजिकै कन्डोम भेटायौं, जसले घटनाको प्रमुख कारण यौनप्रकरण हो भन्ने जानकारी भयो ।'कन्डमका साथै मृतक विद्यार्थीको पर्समा भेटिएका केटीका फोटाले अनुसन्धानलाई थप सहज बनाएको प्रहरीको भनाइ छ । एसपी जोशीका अनुसार मृतक विद्यार्थीको पर्समा आठवटा केटीका फोटा भेटिएका थिए । जोशीले भने, 'हामीले फोटोमा भएका केटीहरूको पहिचान गर्ने क्रममा एउटी केटी तुलसा खत्री (सुष्मा) मृतक विद्यार्थीसँगै पढ्ने खुलासा भयो, त्यसपछि हामीले उनको खोजी गर्‍यौं ।'प्रहरीले अनुसन्धानका क्रममा नेपाली सेनामा कार्यरत झविन्द्रकी श्रीमती तुलसा र मृतक वलीबीच लामो समयदेखि हिमचिम रहेको तथ्य प्राप्त गर्‍यो । एसपी जोशीले भने, 'यतिसम्म आइपुग्दा हामी हत्याराबारे अन्योलमा थियौं, तर घटनास्थलमै भेटिएको खुकुरीको खोलले हामीलाई हत्यारा सेनामा कार्यरत व्यक्ति अथवा तुलासाकै श्रीमान् हो भन्ने पक्का भयो ।' उनका अनुसार घटनास्थलमा भेटिएको खुकुरीको खोल सेना वा प्रहरीले प्रयोग गर्ने 'स्केल' को थियो । 'सामान्य व्यक्तिले खुकुरीको खोलको टुप्पोमा पोलिस लगाउँदैनन्, तर बरामद खोल पोलिस लगाएर टल्काइएको थियो,' जोशीले भने ।अभियुक्तको पहिचान भएपछि तुलसाको कोठामा छापा मारी थप फोटा बरामद गरियो । ती फोटाले पनि अनुसन्धानलाई सफलताको नजिक पुर्‍याए । प्रहरीले घटनास्थलमा बोलानो कम्पनीको एउटा घडी भेटाएको थियो । त्यही घडी तुलसाको कोठाबाट बरामद एउटा फोटोमा उनका श्रीमान् झविन्द्रले लगाएका थिए ।घटनाको अनुसन्धानमा संलग्न प्रहरी निरीक्षक प्रदीप क्षेत्रीले भने, 'यति भइसकेपछि त हामीलाई हत्यामा सैनिक जवान झविन्द्रको संलग्नता छ भन्ने निश्चित नै भयो ।' अनुसन्धानका क्रममा प्रहरीले करिब एक सय फोटोको अनुसन्धान गरेको थियो । कन्डमको आधारमा थालिएको अनुसन्धानलाई पछिल्लो समय फोटाहरूले बल पुर्‍याएको प्रहरीको भनाइ छ ।सूक्ष्म अनुसन्धानबाट प्राप्त उपलब्धिका आधारमा प्रहरीले १८ फागुनमा मध्यपश्चिम पृतनामा पत्राचार गरी अभियुक्त सैनिकलाई बुझाउन अनुरोध गरेको थियो । पृतनाले भने गत सोमबार जिल्ला प्रहरी कार्यालयमा बुझाएको छ ।अभियुक्त सैनिक जवान झविन्द्रले वलीलाई आपनी श्रीमती तुलसासँग आपत्तिजनक अवस्थामा भेटाएपछि आवेगमा आएर हत्या गरेको स्वीकारेको प्रहरीको दाबी छ । मृतक वलीकी दुईवटी श्रीमती छन् ।

ठगी गर्ने 'नक्कली मेजर' पक्राउ परे

लिम्वूवान डट व्लगस्पोट डटकम,काठमाडौं

छाउनी अस्पतालमा कार्यरत सेनाको मेजर डा. उमेश सिंह हुँ भन्दै ठगी गर्ने 'नक्कली मेजर' भरतसिंह लामा पक्राउ परेका छन् । विदेश जाने अवसरको खोजीमा रहेका युवालाई छाउनी अस्पताल परिसरमै बोलाएर ११ लाख ठगी गरेपछि नक्कली मेजर भरतसिंह पक्राउ परेका हुन् । युवालाई ठगी गर्दा उनी मेजरले लगाउने पोसाक सजिएका थिए ।२६ वर्षीय भरतसिंह सार्वजनिक स्थानमा समेत सेनाकै पोसाकमा हिँड्ने गर्थे । बुधबार बेलुका महानगरीय प्रहरी वृत्त नयाँबानेश्वरको टोलीले उनलाई गौशालामा पक्राउ गर्दासमेत उनी मोटरसाइकलमा मेजरकै पोसाकमा थिए ।उनलाई पक्राउ गर्न जाने प्रहरीसमेत मोटरसाइकलमा सवार 'मेजर'लाई देखेर चकित परेका थिए । वृत्तको हिरासतमा रहेका भरतसिंह हिरासतभित्र समेत सैनिक पोसाकमै थिए । कसैले अविश्वास गर्लान् कि भनेर उनले प्रमाणका लागि त्रिभुवन अन्तर्राष्ट्रिय विमानस्थल, छाउनीमा रहेको सैनिक अस्पताललगायतका सैनिक इलाकामा गएर मेजरको पोसाकमा तस्बिर खिचाएका थिए । सेनामा कार्यरत एक साथीसँग सेनाकै पोसाकमा एम-१६ हतियार बोकेरसमेत भरतसिंहले तस्बिर खिचाएका थिए । पक्राउपछि गोठाटारमा रहेको उनको कोठामा छापा मार्न गएको प्रहरीले सातथान नेपाली सेनाको पोसाक र दुईथान सशस्त्र प्रहरीको पोसाकसमेत फेला पारेको छ । नक्कली मेजरको ठग्ने काइदाभरतसिंह साढे दुई वर्ष दुबई प्रहरीमा काम गरेर फर्केका हुन् । वृत्त प्रमुख विश्वराज पोखरेका अनुसार उनी सशस्त्र प्रहरी बलको प्रहरी सहायक निरीक्षक बनेका अंकित भण्डारीसँग मिलेर युवालाई दुबई प्रहरीमा पठाइदिने भन्दै रकम असुल्न सक्रिय थिए । सेनाको मेजरको पूर्ण पोसाक लगाएर हिँड्ने भरतसिंह युवाहरूलाई सैनिक अस्पताल परिसरभित्रै भेट्थे अनि आफ्नो घर-ठेगाना पनि सक्कली मेजर डा. उमेशको घर भएको स्थान गल्फुटार बताउँथे ।वैदेशिक रोजगारीमा जान चाहने ११ जना युवाहरूसँग एकमुस्ट ११ लाख ६० हजार रकम लिएर दुवैजना बेपत्ता भएपछि उनीहरू नक्कली भएको पत्ता लागेको थियो । त्यसपछि पीडित युवा प्रहरीको नयाँबानेश्वर वृत्त पुगेका थिए । प्रहरीमा उजुरी दिँदा उनीहरूले मेजर डा. उमेश सिंह भनेर नै उजुरी दिएका थिए । प्रहरीले उजुरीको आधारमा खोजी गर्दै जाँदा छाउनी अस्पतालमा डा. उमेश नामका गाइनोलोजिस्ट मेजर रहेको, तर उनी ठगी धन्दामा नरहेको पुष्टि भएपछि पीडितहरूको हुलियाको आधारमा नक्कली उमेशको खोजी सुरु गरेको थियो ।पीडितहरूका अनुसार उनी पीडितहरूसँग मेजरको पूर्ण पोसाक र डा. उमेश सिंह लेखिएको नेमप्लेटसहित छाउनी अस्पताल परिसरमै भेट्ने गर्थे । उनी प्रायः बा१७प ९८४५ को वाइबिएक्स चढेर हिँड्थे । पीडितहरूको उजुरीमा उल्लेख छ, 'उनी प्रायः सधैं सैनिक पोसाकमै भेटिन्थे र आफूलाई मेजर उमेशसिंह हुँ भन्थे । उनीसँगै रहेका अंकित आफूलाई सशस्त्र प्रहरी बलमा काम गर्ने बताउँथ्यो र दुवैले हामीलाई दुबई प्रहरीमा पठाइदिन्छु भनेर पैसा माग गरेका थिए ।' अंकितले 'मेरो दाजु प्रहरीमा डिएसपी हुनुहुन्छ सबै काम हुन्छ' भनेरसमेत फकाउने गरेको पीडितहरूको उजुरीमा उल्लेख छ ।डिएसपी पोखरेलेका अनुसार २५ फागुनमा दुबई प्रहरीमा रोजगार पाउने आशामा उनीहरूले लामालाई एकमुस्ट ११ लाख ६० हजार दिएपछि सोही दिन मध्याह्न एक बजेबाट लामा र अंकित दुवै बेपत्ता भएका थिए । दुवै बेपत्ता भए पनि पीडितहरूले उनको खोजी सैनिक अस्पतालबाटै गरेका थिए । उनीहरूले छाउनी अस्पतालमा गएर डा. उमेशको खोजी गर्दा जब सक्कली उमेश फेला परे तब आफू ठगिएको चाल पाएका थिए । पीडितहरू प्रहरी कार्यालयमा उजुरीसहित आएपछि वृत्तले नक्कली मेजर खोज्न १८ दिनअघि प्रहरी निरीक्षकको कमान्डमा टोली परिचालन गरेको थियो । डिएसपी पोखरेका अनुसार बुधबार बेलुका विशेष सुराकीबाट खबर आयो शंकास्पद व्यक्ति गौशालातिर मोटरसाइकलमा जाँदैछ । खबर पाएलगत्तै वृत्तबाट टोली खटियो र शंकास्पद मेजरलाई मोटरसाइकलमा गइरहेको अवस्थामा फेला पार्‍यो ।पक्राउ परेको वेलामा समेत सेनानीको दज्र्यानी चिह्नसमेत लगाएर सेनाको पूर्ण पोसाकमा रहेका उनलाई वृत्तमा ल्याएर केराकार गरेपछि उनी ठग रहेको खुल्न आएको थियो । लामा पक्राउ परे पनि अर्का भण्डारी भने अझै फरार छन् । पक्राउ परेका लामाले समेत ठगको मुख्य योजनाकार भण्डारी रहेको दाबी गरेका छन् ।

नेपाल वायुसेवा निगमले दुई जेट विमान खरिदका गर्ने

लिम्वूवान डट व्लगस्पोट डटकम,काठमाडौं

नेपाल वायुसेवा निगमले दुई जेट विमान खरिदका लागि टेन्डर गर्ने तयारी थालेको छ ।निगमसँग अहिले दुईटा जेट विमान छन् । केही दिनमा दुई विमान खरिदका लागि टेन्डर आह्वान गरिने निगम महाप्रबन्धक सुगतरत्न कंसाकारले जानकारी दिए ।निगमले थप चार विमानबाट उडान सेवा सञ्चालन गर्ने योजना बनाएको छ । त्यसका लागि दुइटा जेट विमान भाडामा लिने प्रक्रिया जारी छ । निगमले भाडामा लिनका लागि आह्वान गरेको टेन्डरमा १९ कम्पनीका प्रस्ताव परेका थिए । प्रस्तावमाथि मूल्यांकन भइरहेको जानकारी उनले दिए ।

काठमाडौं नजिकका स्थानमा विमानस्थल स्थापना गर्ने

लिम्वूवान डट व्लगस्पोट डटकम,काठमाडौं

त्रिभुवन अन्तर्राष्ट्रिय विमानस्थलमा विमान चाप अधिक भएपछि सरकारले काठमाडौं नजिकका स्थानमा साना विमानका लागि छुट्टै विमानस्थल स्थापना गर्ने भएको छ ।नयाँ हवाई कम्पनीसँग उडान सम्झौता भइरहेको र थप कम्पनीसँग उडान सम्झौता हुने तयारीमा रहेको कारण विमानस्थल साँघुरो हुँदै गएको छ । सरकारले पयर्टक संख्या बढाउने योजना बनाएको छ । धेरै पर्यटक आउँदा विमान आगमन संख्या पनि वृद्धि हुन्छ ।काठमाडौंमा अन्तर्राष्ट्रिय र आन्तरिक विमास्थल एउटै भएकाले अन्तर्राष्ट्रिय विमानस्थललाई स्थान अपुग हुने सम्भावनाका कारण साना विमानका लागि छुट्टै विमानस्थल निर्माण गर्ने सोच बनाएको पर्यटन मन्त्रालयले जनाएको छ । अहिले काभ्रेपलाञ्चोकको धुलिखेल र भकुन्डेबेंसीमा विमानस्थल निर्माणका सर्भे भइसकेको र अन्य क्षेत्रको पनि सम्भाव्यता बुभने काम भइरहेको जानकारी पर्यटनमन्त्री हिसिला यमीले दिइन । उनले भनिन्, 'हेलिकोप्टर र टि्वनअटर विमानसहित साना जहाज बाहिर पार्किङ व्यवस्था गर्न सकिए काठमाडौंमा अन्तर्राष्ट्रिय उडान भर्ने विमानका लागि पर्याप्त ठाउँ रहन सक्छ ।'साथै, आन्तरिक उडान भर्ने विमान पार्किङ क्षेत्रमा बढ्दै गएको भीडभाड समस्या समाधान गर्न भित्रै छुट्टै स्थानमा हेलिकोप्टर पार्किङ व्यवस्था आगामी असारसम्म सम्पन्न गर्ने मन्त्रालयले जनाएको छ ।

बुटवल र आसपासका क्षेत्रमा कर्फ्यु आदेश जारी

लिम्वूवान डट व्लगस्पोट डटकम,काठमाडौं

कार्यकर्ता हत्याको विरोधमा युथफोर्स र एमाले कार्यकर्ताले गरेको प्रदर्शनले उग्ररुप लिएपछि स्थीति नियन्त्रणमा लिन जिल्ला प्रशासन कार्यालय रुपन्देहीले शुक्रबार बुटवल र आसपासका क्षेत्रमा कर्फ्यु आदेश जारी गरेको छ । प्रशासनले बुटवल नगरपालिका र सिद्धार्थ राजमार्गको सुनौलीदेखि बुटवलसम्म राजमार्गको २०० मिटर वरपरको क्षेत्रमा अर्को आदेश नआउन्जेलका लागि बिहान सवा ९ बजेदेखि कर्फ्यु आदेश जारी गरेको हो ।युथफोर्स रुपन्देहीका जिल्ला सदस्य प्रचण्ड थैवको हत्याको विरोधमा एमाले र युथफोर्स कार्यकर्ताले शुक्रबार बिहानैबाट गरेको प्रदर्शनका कारण बुटवल तनावग्रस्त बनेको छ । प्रदर्शनकारीले रातो दरवारमा रहेको माओवादी कार्यालयमा तोडफोड र आगजनीसमेत गरेका थिए । बुटवल-९ दिपनगरका ३५ बर्षीय थैवलाई बिहीबार राति अज्ञात समूहले गोली प्रहारगरी हत्या गरेको थियो ।उनीसँगै मोटरसाईकलमा रहेका केशव रोक्का भने सकुसल रहेको प्रहरीले जनाएको छ । एमाले जिल्ला सचिव लिला गिरीले माओवादी कार्यकर्ताले थैवलाई पटक-पटक धम्क्याउँदै आएकाले उनीहरूले नै हत्या गरको दावी गरेका छन् ।

गोरखा भूपू भिसासम्बन्धी नीति ल्याउन बेलायत सहमत

लिम्वूवान डट व्लगस्पोट डटकम,काठमाडौं

गोरखा भूतपूव सैनिकहरुको आवासीय भिसासम्बन्धी नीति तीन हप्ताभित्र ल्याउन बेलायत सहमत भएको छ। बेलायती उच्च अदालतमा गोरखाहरुको आवासीय भिसासम्बन्धी नीति ल्याउन बेलायतले गरिरहेको ढिलाइका बारेमा पेस भएको मुद्दाको बिहीबार भएको सुनुवाइपछि न्यायाधीश ब्लेकले बेलायती गृह मन्त्रालय आगामी तीन हप्ताभित्र सो नीति ल्याउन राजी भएको बताउनुभएको छ। गोरखा भूतपूव सैनिकहरुले गत सेक्टेम्बर ३० मा बेलायतमा आवासीय भिसाको मुद्दा जितेका थिए।

नेपालले भारतबाट थप ३० मेगावाट विद्युत् आयात गर्ने

लिम्वूवान डट व्लगस्पोट डटकम,काठमाडौं

नेपाल विद्युत् प्राधिकरणले भारतबाट थप ३० मेगावाट विद्युत् आयात गर्ने भएको छ। प्राधिकरणले सो विद्युत् भारतको ऊर्जा दलाल कम्पनी पावर ट्रेडिङ कर्पोरेसन (पीटीसी) मार्फ रामनगर-गण्डक प्रसारणलाइनबाट आयात गर्ने तयारी गरेको छ। विद्युत् आयात गर्ने विषयमा प्राधिकरण र पीटीसीबीच सहमति भए पनि विद्युत्को मूल्य तय हुन बाँकी रहेको प्राधिकरणका कार्यकारी निर्देशक उत्तरकुमार श्रेष्ठले नेपाल समाचारपत्रलाई जानकारी दिनुभयो।उहाँका अनुसार पीटीसीले विद्युत् प्रतियुनिट भारतीय ५ रुपियाँ ५२ पैसा अर्थात् ८ रुपियाँ ८३ पैसामा दिने प्रस्ताव गरेको छ भने प्राधिकरणले यसमा घटाउन अनुरोध गरेको छ। यसअघि प्राधिकरणले टनकपुरबाट प्रतियुनिट ४ रुपियाँ ५२ पैसा भारू अर्थात् ७ रुपियाँ २० पैसामा आयात गरिरहेको छ। यो मूल्य बढी भएकाले घटाउने प्रयास गरिरहेको छौं’ -श्रेष्ठले भन्नुभयो। भारतमा अहिले लोकसभाको चुनावका साथै विद्युत् संकट बढ्दै गएको र विद्युत्को मूल्य पनि बढेकाले यसको असर आयातमा पनि पर्न थालेको भनाइ उहाँको छ।यो विद्युत् गण्डक प्रसारणलाइन हुँदै पश्चिम बुटवलमा पुर्याइने भएको छ। विद्युत् सुक्खायामका लागि भएकाले आवश्यकताअनुसार आयात गर्न सकिने उहाँले बताउनुभयो।यसअघि पीटीसीले नेपालको ऊर्जा संकट समाधानका लागि ५ सय मेगावाट विद्युत् दिने प्रस्ताव गरेको छ। पीटीसीले सो प्रस्ताव गरे पनि नेपालमा विद्युत् ल्याउनका लागि अन्तरदेशीय प्रसारणलाइन निर्माण नभएकाले सो विद्युत् तत्काल आयात हुने सम्भावना छैन। अहिले दुहबी-कटैया प्रसारणलाइनबाट ५० तथा टनकपुरबाट २० गरी जम्मा ७० मेगावाट विद्युत् भारतबाट आयात भइरहेको छ।

नयाँ संविधान निर्माणको ३० करोड रुपैयाँभन्दा बढी दिने

लिम्वूवान डट व्लगस्पोट डटकम,काठमाडौं

नयाँ संविधान निर्माणको पहिलो चरणको कामका लागि शान्ति कोषले संविधानसभा सचिवालयलाई ३० करोड रुपैयाँभन्दा बढी दिने भएको छ । सचिवालयले झन्डै डेढ साताअघि हालेको 'प्रपोजल' कोषले बुधबार स्वीकृत गरेको हो ।संविधानसभा सचिवालयका प्रवक्ता मुकुन्द शर्माका अनुसार कोषले संविधान निर्माणको पहिलो चरणको कामका लागि ३० करोड सात लाख ७६ हजार रुपैयाँ दिनेछ । 'हामीले पहिलो चरणको कामका लागि हालेको 'प्रपोजल' स्वीकृत भएको छ । अब शान्ति कोषबाट पैसा आउँछ,' प्रवक्ता शर्माले नयाँ पत्रिकासित भने । डेढ सातासम्ममा सचिवालयमा रकम आइपुग्ने उनले बताए । सचिवालयको प्रपोजलमा उक्त रकम नयाँ संविधान निर्माणका सम्बन्धमा सञ्चारमाध्यमहरूमा गरिएको विज्ञापनको भुक्तानी, जनताको राय लिन सभासद्हरूको टोली जिल्ला जाँदा लागेको खर्च र सुझावलाई 'विश्लेषण' गरेर संविधानको प्रारम्भिक मस्यौदा तयार गर्नमा खर्च गरिने उल्लेख गरिएको छ । सचिवालयले सुरुमा नयाँ संविधान निर्माण गरुञ्जेलसम्मका लागि दुई अर्ब खर्च लाग्ने भन्दै शान्ति कोषमा प्रपोजल हालेको थियो । तर, कोषले धेरै ठूलो रकम एकमुष्ट दिन नसक्ने जनाएपछि दुई चरणमा प्रपोजल हाल्ने योजना सचिवालयले बनाएको थियो । सचिवालयका अनुसार दोस्रो चरणको कामका लागि पुनः कोषमा अर्को 'प्रपोजल' पठाउने योजना बनाइएको छ । कोषले दिने रकममध्ये रेडियो, टेलिभिजन र पत्रपत्रिकाहरूमा गरेको विज्ञापनको भुक्तानीका लागि मात्रै सचिवालयले १३ करोड ७९ लाख २९ हजार एक सय रुपैयाँ खर्च गर्ने भएको छ । सभासद्हरूको टोली जिल्ला जानुअघि सचिवालयले सञ्चारमाध्यमहरूमा विज्ञापन गरेर जनतालाई नयाँ संविधानका लागि सुझाव दिन/पठाउन आह्वान गरेको थियो । संविधानसभाका सबै समितिले छुट्टाछुट्टै विज्ञापन गरेका थिए । त्यस्तै, सभासद्हरूको टोली जिल्ला गएर जनताको सुझाव संकलन गर्ने काममा नौ करोड ४४ लाख ४६ हजार नौ सय रुपैयाँ लाग्ने प्रपोजलमा उल्लेख छ । टोली जिल्ला जाँदा सचिवालयका कर्मचारी र सभासद्हरूको हवाईखर्च, जिल्लामा पुगेपछि प्रयोग भएका सवारीसाधनको भाडा, इन्धन, पहाडी र हिमाली जिल्लाहरूमा घोडा-भाडा खर्च, सभासद्हरू र कर्मचारीहरूको दैनिक भ्रमण भत्ता, खाना र बास खर्च यो शीर्षकअन्तर्गत राखिएको छ ।जिल्ला जाँदा सभासद्हरूको टोलीलाई सचिवालयले आफ्नो नियमित खर्च शीर्षकमा रहेको रकमबाट पेस्की उपलब्ध गराएको थियो । सचिवालयले प्रत्येक सभासद्लाई साढे २४ दिनको भ्रमण भत्ता, आवास र खाना खर्चबापत एकमुष्ट ४१ हजार ५० रुपैयाँ पेस्की उपलब्ध गराएको थियो । जसमा दैनिक भ्रमण भत्ताबापत पाँच सय र आवास तथा खानाको १२ सय गरी एक हजार सात सय प्रतिदिनका दरले छुट्याइएको थियो ।'सभासद्हरूको टोली जिल्ला जाँदा सचिवालयसित भएको अन्य शीर्षकको रकमबाट त्यतिखेर चलाएका हौँ । अब शान्ति कोषबाट आएपछि पूर्ति गरिन्छ,' प्रवक्ता शर्माले भने । त्यस्तै, जनताबाट प्राप्त सुझावहरूलाई एकीकृत र विश्लेषण गरेर नयाँ संविधानको प्रारम्भिक मस्यौदा तयार गर्ने कार्यमा ६ करोड ८४ लाख खर्च लाग्ने सचिवालयको 'प्रपोजल'मा उल्लेख छ । पहिलो चरणमा प्राप्त सुझावहरूबाट संविधानको प्रारम्भिक मस्यौदा तयार गरेर सभासद्हरू पुनः जिल्ला जाने संविधानसभाको कार्य-तालिकामा उल्लेख छ ।

अमेरिकाले आक्रमणको नयाँ योजना बनायो

लिम्वूवान डट व्लगस्पोट डटकम,काठमाडौं

वासिङ्टन/ पाकिस्तान तथा अफगानिस्तानको आदिवासी क्षेत्रमा सक्रिय चरमपन्थीलाई ठेगान लगाउन अमेरिकाले आक्रमणको नयाँ योजना बनाएको छ । प्रख्यात अमेरिकी समाचारपत्र वालस्टि्रट जर्नलका अनुसार मानवरहित विमानबाट ती स्थानमा आक्रमणको तयारी भइरहेको छ । अमेरिकी सुरक्षा अधिकारीले मानवरहित विमानबाट भएका कारबाहीको पुनरावलोकनका साथै त्यसलाई निरन्तरता दिने सम्बन्धमा सहमति जनाएका बताइएको छ । सरकारले सुरक्षा रणनीतिमा परिवर्तन गर्नुका साथै उक्त कार्यक्रमको गति र नीतिमा पनि केही फेरबदल गरेको जनाइएको छ । यसैबीच, उत्तरी बजिरिस्तानमा मानवरहित अमेरिकी विमानले गरेको आक्रमणमा चारजनाको ज्यान गएको छ । मारिएका चारैजना आदिवासी चरमपन्थी भएको बताइए तापनि उनीहरू कुन देशका नागरिक थिए भन्नेबारे केही उल्लेख गरिएको छैन । दक्षिणी बजिरिस्तानमा बुधबार गरिएको कारबाहीमा अन्तर्राष्ट्रिय आतंकवादी संजाल अलकायदाका सातजना मारिएका थिए ।

लिम्बुवान तीन कार्यकर्तालाई राज्यद्रोहको अभियोग

लिम्वूवान डट व्लगस्पोट डटकम,काठमाडौं

राष्ट्रिय एकता र अखण्डतामाथि आँच आउने क्रियाकलापमा संलग्न भएको आरोपमा सरकारले पल्लो किराँत लिम्बुवान राष्ट्रिय मञ्चका तीन कार्यकर्तालाई राज्यद्रोहको अभियोग लगाएको छ । झापाको दमकबाट सोमबार पक्राउ परेकामध्ये तीनलाई राज्यद्रोहको अभियोग लगाएर मुद्दा चलाउने तयारी भएको हो । इलाम बाँझो-९ बस्ने मनाहाङ भनिने २५ वर्षीय मानप्रसाद आङबोहाङ, मोरङ पथरी-८ बस्ने ३५ वर्षीय विनयकुमार फागो र टाँडी-२ बस्ने २५ वर्षीय टेकहाङ साङ्मीमाथि राज्यविरुद्धको अपराधअन्तर्गत मुद्दा चलाउन लागिएको झापाका प्रहरी प्रमुख विजयराज भट्टले बताए । आङबोहाङ मञ्चका केन्द्रीय सदस्य हुन् ।उनीहरूलाई राज्यविरुद्धको अपराध र सजाय ऐनअन्तर्गत झापा जिल्ला अदालतमा मुद्दा दायरका लागि मंगलबार साँझ म्याद थप गरी पेस गरिएको छ । उनीहरूसँग बुधबारदेखि बयान सुरु गरिने प्रहरीले जनाएको छ । मञ्चका अन्य २३ जना कार्यकर्तालाई सार्वजनिक अपराध ऐनअन्तर्गत कारबाही अघि बढाइएको छ ।

चारजना बालकलाई बिक्री गर्ने दुईजनालाई प्रहरीले पक्राउ

लिम्वूवान डट व्लगस्पोट डटकम,काठमाडौं

सुनसरी/ सप्तरी राजविराजस्थित फिङ्गर्स चिप्स बनाउने उद्योगमा चारजना बालकलाई बिक्री गर्ने दुईजनालाई सुनसरीको इनरुवाबाट प्रहरीले पक्राउ गरेको छ । इनरुवाका स्थानीय बासिन्दाको सहयोगमा प्रहरीले मोरङको कटहरी-५ कदमगाँछीनिवासी बद्रीनारायण कामत र सो उद्योगमै कार्यरत रघुनन्द साहलाई प्रक्राउ गरेको हो । कामतले राजविराजको ओम फिङ्गर्स चिप्स उद्योगमा मोरङकै कटहरी घर भएका बालक अजयकुमार मुसहर, चन्दनकुमार मुसहर, महेश मुसहर र सूर्य मुसहरलाई बिक्री गरेका थिए । उनले ती बालकलाई उद्योगमा काम लगाउने सर्तमा प्रतिबालक १५ हजार लिएर सो उद्योगमा बिक्री गरेको पीडित बालकले बताएका छन् । कामतलाई बालक बिक्री गर्ने वातावरण सोही उद्योगमा कार्यरत रघुनन्द साहले मिलाएका थिए । उद्योगबाट बाहिर निस्कन नदिई जोखिमपूर्ण काम लगाइएपछि उनीहरू राजविराजबाट भागेर पैदल हिँड्दै सुनसरीको इनरुवा आएका थिए । उनीहरू भागेको जानकारी उद्योगले कामतलाई दिएपछि कामत र सो उद्योगका साहले उनीहरूको पिछा गरेका थिए । पिछा गर्ने क्रममा इनरुवाको सुनसरी खोलानजिक पैदल हिँड्दै गरेको अवस्थामा चारैजना बालकलाई फेला पारेपछि दुईजनाले निर्घात कुटपिट गरेका थिए । कुटपिट गरेको देखेर स्थानीय बासिन्दाले ती बालकलाई सोधपुछ गरेपछि उनीहरू सो उद्योगमा बिक्री गएको खुलासा भएको सुनसरीका अधिकारकर्मी राजेन्द्र पोख्रेलले बताए । स्थानीय बासिन्दाले इनरुवामा रहेका मानवअधिकारकर्मीलाई खबर गरेका थिए ।

राजधानीमा जग्गा कारोबार मूल्य घट्न थाल्यो

लिम्वूवान डट व्लगस्पोट डटकम,काठमाडौं

राजधानीमा निरन्तर बढिरहेको जग्गा कारोबार मूल्य घट्न थालेको छ । मालपोत कार्यालयमा जग्गा पास गर्न पुग्ने सेवाग्राहीमा ४० प्रतिशत हाराहारी कमी आएको छ । घरजग्गा मूल्यसँगै उच्च रूपले बढिरहेको कारोबार खरिद गर्दा स्रोत खुलाउनुपर्ने प्रावधान लागू भएपछि पुसयता नै केही घट्न थालेको थियो । सरकारले पुसमा २० लाखभन्दा बढीको गाडी, ३० लाखमाथिको जग्गा र ५० लाख रुपैयाँभन्दा बढीको घरजग्गा किन्दा स्रोत खुलाउनुपर्ने व्यवस्था गरेको थियो । हाल बैंकको लागानी अभाव तथा विश्वव्यापी आर्थिक मन्दीबाट तर्सिएर पनि जग्गा किन्नेको संख्यामा कमी आएको जनाइएको छ ।'दृष्टिबन्धक (बैंकबाट ऋण लिएबापत रोक्का), अंशबन्डा गर्नेबाहेक जग्गा किनबेच गरी नामसारी गर्न आउनेको संख्या पछिल्लो चार महिनामा ४० प्रतिशत हाराहारीले गिरावट आइसकेको छ,' काठमाडौं मालपोतका शाखा अधिकृत काजी विष्टले भने, 'छिचोलिनसक्नु मान्छेको भीड लाग्ने कार्यालय अचेल खुला हुन्छ ।'घरजग्गा खरिदकर्ता घटेका कारण कारोबारमा कमी आएको हो । विस्तारै मूल्यमा समेत गिरावट आउने अपेक्षा गर्न थालिएको छ । बैंकहरूको लगानी तथा रेमिट्यान्सका कारण राजधानीमा घरजग्गा कारोबार र मूल्य उच्च रुपले बढिरहेको थियो । अहिले राष्ट्र बैंकले सो क्षेत्रमा लगानी गर्न बैंकहरूलाई कडाइ गरिसकेको छ । घरजग्गाकै लगानीका कारण अमेरिकी बैंकहरू टाट उल्टिएर विश्वव्यापी आर्थिक मन्दी सुरु भएपछि केन्द्रीय बैंकले सो कदम चालेको हो । हाल नेपाली बैंकहरूले ६० अर्ब रुपैयाँभन्दा बढी रकम घरजग्गामा लगानी गरेको केन्द्रीय बैंकले जनाएको छ । मन्दीले रेमिट्यान्समा समेत प्रभाव पर्न थालेपछि लगानीकर्ता थप हच्किएका हुन् । त्यसमाथि जग्गा मूल्यवृद्धिको १० वर्षे चक्र पूरा भएकाले पनि ह्रास आउने सम्भावना बढेको बताइन्छ । प्रत्येक १० वर्षमा जग्गा मूल्य ओरालो लाग्ने अन्तर्राष्ट्रिय मान्यता छ । ०५६ पछि उकालो लागेको जग्गा मूल्यवृद्धि क्रमशः १० वर्ष पुग्न लागेको छ ।मालपोतमा लेखापढी व्यवसाय सञ्चालनकर्ता पनि जग्गा कारोबार गर्नेको संख्यामा ठूलो कमी आएको बताउँछन् । डिल्लीबजारस्थित काठमाडौं मालपोतमा डेढ सय हाराहारी लेखापढी व्यवसायी छन् । '६ महिनाअघि प्रत्येक व्यवसायीले जग्गा पासको मात्र औसत दैनिक दुई लिखत उठाउँथे,' एक लेखापढी व्यवसायीले भने, 'तर अहिले दिनभर बसेर पनि खालि हात फर्किनुपर्ने अवस्था आएको छ ।'काठमाडौं मालापोतले उठाउने राजस्व मंसिरयता लगातार घट्दो छ । मंसिरमा १३ करोड ४६ लाख ६२ हजार राजस्व सो कार्यालयले संकलन गरेकामा पुसमा १२ करोड ९१ लाख २४ हजार रुपैयाँमा झरेको छ । त्यस्तै, माघमा १२ करोड ५४ लाख ४८ हजार ४८ हजार मात्र राजस्व उठेको थियो भने फागुनमा १२ करोड ४१ लाख ५२ हजार रुपैयाँमा झरेको छ । चैतमा अझै कमी आउने संकेत देखिएको कार्यालय प्रमुख प्रेमबहादुर खापुङले बताए । फागुनसम्म दैनिक औसत २ सय ५० भन्दा बढी लिखत उठ्दै आएकामा चैत लागेपछि एक दिन मात्र दुई सय नाघेको छ । ५ चैतमा २ सय १० लिखत उठेको थियो । औसतमा दैनिक १ सय ५० हाराहारी लिखत उठ्ने गरेको उनले जानकारी दिए ।ललितपुर र भक्तपुरमा पनि जग्गा कारोबार घटेको सम्बन्धित जिल्लाका मालपोत कार्यालयले जनाएका छन् । 'म आएको एक साता भयो,' ललितपुर मालपोत प्रमुख झंकप्रसाद नारायण श्रेष्ठले भने, 'हरेक दिन जग्गा पास गर्न आउनेको भीड पातलिंदै गएको छ ।' सो कार्यालयले उठाउने राजस्व माघको तुलनामा फागुनमा केही बढे पनि जग्गा खरिद बिक्री नामसारी घटिरहेको उनले जानकारी दिए । दैनिक १ सय ५० भन्दा बढी लिखत उठ्ने ललितपुरमा अहिले १ सय नाघ्न मुस्किन पर्न थालेको जनाइएको छ । भक्तपुरमा पनि लिखत संख्यामा ठूलो कमी आएको छ । त्यहाँ दैनिक २ सयसम्म नामसारी दर्ता हुने गरेकामा हाल मुस्किलले १ सय पुग्ने गरेको एक कर्मचारीले बताए ।

पल्लो किराँत लिम्बुवान राष्ट्रिय मञ्चद्वारा स्वतन्त्र राष्ट्रको घोषणा

लिम्वूवान डट व्लगस्पोट डटकम,काठमाडौं

पल्लो किराँत लिम्बुवान राष्ट्रिय मञ्चले अरुण नदीदेखि पूर्वतर्फका नौ जिल्लालाई स्वतन्त्र राष्ट्र घोषणा गरेको छ । मञ्चका महासचिव शेर्माहाङ याकथुम्बाले जानकारी गराएअनुसार नेपाल एकीकरणको समयमा तत्कालिक राजा पृथ्वीनारायण शाहसँग भएको विशेष सम्झौताअनुसार किराँत प्रदेश (लिम्बुवान) नेपालमा गाभिएको थियो । अब त्यसप्रकारको सन्धि गरी लिम्बुवानलाई नेपालमा गाभ्ने राजतन्त्रकै अन्त्य भइसकेको हुँदा पहिले भएको सन्धि पनि स्वतः समाप्त भएकोले लिम्बुवान स्वतः स्वतन्त्र देश हुन पुगेको याकथुम्बाको दाबी छ ।मञ्चले यसै साता आफ्नो देश स्वतन्त्र भएको घोषणा गरिएको प्रथम स्वतन्त्रता दिवसका अवसरमा चैत १० गते सोमबार झापामा आयोजना गर्न लागेको एक विशेष समारोहलाई नेपाल सरकारले रोक लगाएको छ । तर, उनीहरूले यसलाई एउटा देशले अर्को स्वतन्त्र मुलुकमाथिको हस्तक्षेपको रूपमा परिभाषित गर्दै कठोर मुकाबिला गर्न तत्पर रहेको जनाएका छन् । मञ्चले नेपालका राष्ट्रपति डा. रामवरण यादवलाई एक पत्र लेखी दुई मुलुकबीच दौत्य सम्बन्ध स्थापना गर्न आग्रह गरेको छ । दुई ‘देश’बीच दौत्य सम्बन्ध कायम भएपछि सदस्यताको निम्ति संयुक्त राष्ट्रसङ्घलाई पत्र लेख्ने तयारी पनि सम्बद्ध पक्षले गरेको बुझिन आएको छ ।महासचिव याकथुम्बाले लिम्बुवान स्वतन्त्र देश भएको ऐतिहासिक तथ्य प्रमाण हेर्न पनि नेपाल सरकारलाई आग्रह गरेका छन् । उनले नेपालको हस्तक्षेपले आफ्नो अभियानको निरन्तरतालाई फरक नपार्ने पनि बताएका छन् । ज्ञातव्य छ, अरुणपूर्वका नौ जिल्लामा ताप्लेजुङ, संखुवासभा, पाँचथर, इलाम, झापा, तेह्रथुम, मोरङ, सुनसरी र धनकुटा रहेका छन् । प्राप्त जानकारीअनुसार डम्बर लावतीको नेतृत्वको सङ्घीय लिम्बुवान राज्य परिषद् र सञ्जुहाङ पालुङ पक्षको सङ्घीय लिम्बुवान राज्य परिषद्बीच एकीकरणका निम्ति निर्णायक पहल भइरहेको छ । उनीहरूबीच एकीकरणको आधारचाहिँ स्वतन्त्र लिम्बुवान देश हुने बताइएको छ । अरुणपूर्वका जिल्लाहरूमा पछिल्ला दिनहरूमा लिम्बुवान गतिविधि आक्रामक रूपमा बढ्दै गएको छ । लिम्बुवान कार्यकर्ताका गतिविधि असैह्य ढङ्गले बढ्न थालेपछि झापामा अन्य जातजातिका समुदायले व्यापक विरोध प्रदर्शन पनि गरेका छन् । तथापि लिम्बुवान कार्यकर्ताहरूको त्रासबाट भने स्थानिय बासिन्दा आक्रान्त भएका छन् । शान्तिपूर्ण तवरमा राज्य स्वतन्त्र नभएमा हतियार-युद्ध गर्ने चेतावनी दिइएका कारण त्यस भेकका अन्य जातजातिमा आतङ्कको वातावरण सिर्जना हुन पुगेको छ ।नेपाललाई सङ्घीय संरचनामा लैजाने दुष्प्रयत्न भएपछि स्वतन्त्र राष्ट्र घोषणा गर्ने लिम्बुवान पहिलो भएको छ । राज्यले आफ्नो नीतिमा तत्काल सुधार नगरे देश विखण्डित हुने खतरा बढ्ने सङ्केत यस प्रकरणले दर्शाएको छ ।

दुर्इ मण्डल विस्तार ६ सचिवको जिम्मेवारी हेरफेर

लिम्वूवान डट व्लगस्पोट डटकम,काठमाडौं

प्रधानमन्त्री पुष्पकमल दाहालले मन्त्री मण्डल विस्तार गरेका छन् भने ६ सचिवको जिम्मेवारी हेरफेर गरिएको छ ।चैत १२ गते महेन्द्र पासवानलाई भूमि सुधार र रामचरण चौधरीलाई महिला वालवालिका तथा समाजकल्याण मन्त्रीमा थप गरेपछि मन्त्री मण्डल २४ सदस्यीय बनेको छ । सिराहा निवासी पासवान र बर्दिया निवासी चौधरी दुबै माओवादी सभासद हुन् । मात्रृका यादवले राजिनामा दिएपछि रिक्त रहेको भूम सुधार र नेकपा मालेले लिन नमानेको महिला, वालवालिका तथा समाज कल्याण मन्त्रालयको जिम्मेवारी यसअघि प्रधानमन्त्री स्वयमले सम्हाल्दै आएका थिए ।मन्त्री परिषदको वैठकले राष्ट्रिय सूचना आयोगका सचिव गणेशराज जोशीलाई रक्षामा ल्याएको छ भने यसअघि रक्षामा रहेका वामनप्रसाद न्यौपानेलाई सामान्य प्रशासनमा लगेको छ । यसैगरी प्रताप पाठकलाई प्रधानमन्त्री कार्यालयबाट उद्योग मन्त्रालयमा, उद्योगमा रहेका ताना शर्मालाई राष्ट्रिय सर्तकता केन्द्रमा, सर्तकता केन्द्रबाट सुशिल घिमेरेलाई सूचना तथा संचार मन्त्रालयमा र संचारबाट लिलामणी पौडेललाई प्रधानमन्त्री कार्यालयमा लगिएको छ ।

नयाँ पात्रोबारे मन्त्रालय र पञ्चाङ्गबीच विवाद

लिम्वूवान डट व्लगस्पोट डटकम,काठमाडौं

नयाँ वर्ष २०६६ शुरु हुन केही दिनमात्र बाँकी रहँदा संस्कृति मन्त्रालय तथा पञ्चाङ्ग निर्णायक समिति आगामी वर्ष कति महिनाको हुनुपर्छ भन्नेमा अझै एकमत हुन सकेका छैनन्। केही समय अगाडि मन्त्रिपरिषदले ऋतु मिलान गर्न भन्दै २०६६ सालबाट चैत हटाएर एघार महिनाको गराउन गरेको निर्णयप्रति मन्त्रालय अडिग छ।तर पात्रो निर्माणदेखि लिएर सम्पूर्ण तिथिमिति तोक्ने जिम्मा पाएको पञ्चाङ्ग निर्णायक समितिले बाह्रै महिनाको पात्रो बनाउने निर्णय गरिसकेको छ।सरकारकै अंग भएपनि स्वायत्त संस्थाको रुपमा रहेको पञ्चाङ्ग निर्णायक समितिका अध्यक्ष माधव भट्टराईले भने, “हामीले बाह्रै महिनाको पात्रो बनाइसकेका छौं।पात्रो केही दिनमै बजारमा आउने छन्।”पञ्चाङ्गको निर्णयप्रति असन्तुष्ट संस्कृति तथा राज्य पुनर्संरचना मन्त्रालयले त्यो निर्णय पुनर्विचार गर्न आग्रह गर्ने भएको अधिकारीहरुको भनाइ छ।मन्त्रालयका प्रवक्ता जलकृष्ण श्रेष्ठका अनुसार पञ्चाङ्गलाई एघार महिनाको वर्ष बनाउन अनुरोध गर्दै पत्र लेखिनेछ।पञ्चाङ्गका अधिकारीहरु भने कुनैपनि हालतमा वर्ष छोट्टयाउन नमिल्ने तर्क गर्छन्।अध्यक्ष भट्टराईका अनुसार सरकारको अंग भएको नाताले अन्य निर्देशन पालना गर्न समितिलाई आपत्ती छैन।“तर शास्त्रको विषयमा हामीले सम्झौता गर्ने ठाउँ छैन,” उनले भने।केही समय अगाडि गृह मन्त्रालयले २०६६ सालको निम्ति बाह्रै महिनाको पर्व विदा तथा राष्ट्रिय विदाको सूची निकालेपछि यो विषयमा सरकारभित्रैबाटै परस्पर विपरित निर्णय भएको देखिएको छ।यसरी चर्को विवादमा परेको २०६६ साल कस्तो छ त? सो सालको पात्रो तयार गरेको पञ्चाङ्ग समितिका अध्यक्ष भट्टराईका अनुसार नयाँ वर्षको साउन सात गते खग्रास सूर्यग्रहण परेको छ भने पुष १६ र माघ १ को पन्ध्र दिनभित्र चन्द्र र सूर्य गरी दुईवटा ग्रहण पनि परेको छ।नयाँ वर्ष २०६६ आउन केवल बीस दिनमात्रै बाँकी छ।यतिञ्जेलसम्म सो सालको पात्रोबारे विवाद जारी रहँदा नयाँ सालमा हुने चाडपर्व, विवाह, व्रतबन्धको तिथिमितिबारे आम मानिसहरुबीच अझै अन्योल कायम छ।

सेना समायोजन बिशेष प्राविधिक समितिमा नाम सिफारिस

लिम्वूवान डट व्लगस्पोट डटकम,काठमाडौं

प्रमुख चार दलले पूर्व सहमति अनुसार सदस्यहरुको नाम सिफारिस गरेपछि सेना समायोजन तथा पुर्नस्थापना बिशेष समिति अन्र्तगतको प्राविधिक समिति छिट्टै गठन हुने भएको छ । एकीकृत नेकपा माओवादी, नेपाली कांग्रेस, एमाले र मधेसी जनअधिकार फोरमले बुधबार दुई/ दुई जना सदस्यको नाम सिफारिस गरेपछि विशेष समितिलाई सघाउन कार्यदेश पाएको प्राविधिक समिति गठन हुने भएको हो । तर सिफारिस सदस्यको नाम सार्वजनिक गरिएको छैन । शुक्रबार बस्ने विशेष समितिको बैठकले औपचारिक रुपमा नाम पारित गरेपछि सदस्यहरुको नाम सार्वजनिक गर्ने बताईएको छ । श्रोतका अनुसार नेपाली कांग्रेसले समितिमा अवकास प्राप्त बलाधिकृत रथी बालानन्द शर्मा र शम्भुराम सिंखडालाई सिफारिस गरेको छ । यसअघिको बैठकमा नाम सिफारिसमा दलहरुबीच कुरा नमिलेपछि शुक्रबारसम्मलाई बैठक स्थगित गरिएको थियो ।

माओवादीले नयाँ संबिधानको प्रारम्भिक खाका प्रस्तुत

लिम्वूवान डट व्लगस्पोट डटकम,काठमाडौं

एकीकृत नेकपा माओवादीले संविधानसभाको संबैधानिक समितिमा बुधबार नयाँ संबिधानको प्रारम्भिक खाका प्रस्तुत गरेको छ ।खाका प्रस्तुत गर्दै प्रधानमन्त्री समेत रहेका पार्टी अध्यक्ष पुष्पकमल दाहालले एकदलीय अधिनायकवादी प्रणालीलाई संबिधानमा छुट नदिने प्रतिवद्धता व्यक्त गरेका छन् ।उनले पार्टीको यो प्रतिवद्धतालाई रणनीतिक भनाईका रुपमा मात्र नबुझ्न पनि आग्रह गरे । बहुदलीय व्यवस्थाका बिषयमा आफ्नो पार्टीप्रतिको भ्रम त्याग्न आग्रह गर्दै उनले विधिको शासन, जनताको सर्वोच्चतासहितका लोकतान्त्रिक मुल्य मान्यतामा आफ्नो दल प्रतिवद्ध रहेको दोहोर्‍याए ।संघीयताको सम्बन्धमा १३ वटा प्रदेशको प्रस्ताव गरिएको छ । माओवादीले संघीय इकाइहरुको तहगत संरचनालाई संघ, स्वायत्त प्रदेश र स्थानीय उप स्वायत्त क्षेत्र इलाकामा विभाजन गरेको छ ।संबैधानिक समितिले संविधानको अवधारणा तयार गर्नका लागि पार्टीहरुबाट सुझाव लिने क्रम थालेको हो । माओवादी, काँग्रेस, एमाले लगायत दलहरुलाई गत फागुन १३ गते नै पार्टीको खाका प्रस्तुत गर्न समितिले भनेको थियो । तर कार्याव्यस्तताले तयार गर्न नसेकेको भन्दै उनीहरुले ढिलाई गरेका थिए । समितिको मंगलबारको बैठकले तत्काल अवाधारण प्रस्तुत नगरे संविधान सभाको कार्यातालिका प्रभावित हुने उल्लेख गर्दै पुनः ताकेता गरेपछि प्रधानमन्त्री तथा माओवादी अध्यक्ष दाहाल समितिमा बुधबार उपस्थित भएका हुन् । समितिले सबै दलका शिर्षस्थ नेताहरुलाई नै उपस्थित भई खाका प्रस्तुत गर्न निर्देशन दिएको छ । सत्तारुढ दलहरुबीचको मतभेदका कारण संबिधान निर्माणप्रति जनताले शंका गरेको उल्लेख गर्दै उनले तोकिएको समयमै संबिधान निर्माण बनाई छाड्ने दृढता व्यक्त गरे । निर्धारित मितिमा संबिधान निर्माणबारे दलहरुमा पनि शंका रहेको भन्दै उनले संक्रमणकालमा यस्तो शंका उब्जिनु स्वभाविक भएको बताए । निर्धारित मितिमा संबिधान निर्माण नभए कहालिलाग्दो अवस्था आउने उल्लेख गर्नै त्यो स्थिति सिर्जना नगर्न उनले सबैमा आग्रह गरे । बैठकमा पार्टीको अवधारणा प्रस्तुत गर्न उपस्थित प्रधानमन्त्री दाहालले आफ्नो दल र शान्ति प्रकि्रयाबारे उत्पन्न आशंका अन्त्य गर्ने प्रयास गरेका थिए । उनले सेना समायोजनलाई असार सम्ममा तार्किक निष्कर्षमा पुर्‍याउने सेना समायोजन बिशेष समितिमा सहमति भइसकेको जानकारी दिए । 'बाहिर जे कुरा सार्वजनिक भएका त्यस्तो असहमति केही छैन' उनले भने 'समिति बैठकमा सबै दलहरुको सहमति छ ।' सेना समयोजनले शान्ति प्रक्रियालाई समेत नयाँ गति प्रदान गर्ने भन्दै उनले शान्ति प्रक्रिया र संबिधान निर्माण प्रक्रिया संगै अघि बढ्ने बताए । यी दुई मध्ये एउटामा अवरोध भयो दुबै प्रक्रिया असफल हुने तर्फ सचेत रहन सबै दललाई आग्रह समेत गरे । उनले संविधानको खाकामा जनमुक्ति सेना र नेपाली सेनाबीचको समायोजनबाट राष्ट्रिय सेना निर्माण गर्ने उल्लेख गरेका छन् । सुरक्षासँग सम्बन्धित 'सुरक्षा आयोग' पनि बनाउने खाकामा उल्लेख छ । तीन तहको न्यायिक संरचना बनाउने प्रस्ताव छ । स्वायत्त राज्यहरु भित्र जातीय, भाषिक लगायतका आधारमा उपराज्य र इलाकाहरु निर्धारण गर्न सक्ने पनि प्रस्ताव छ ।

पत्रकार सुनीलकुमार सिंहकी छोरीको हत्या

लिम्वूवान डट व्लगस्पोट डटकम,काठमाडौं

करिब दुइ वर्षअघि धुन्सा हेलिकोप्टर दुर्घटनामा परी निधन भएका पत्रकार सुनीलकुमार सिंहकी सात वर्षीया छोरी सोनालीकुमारी सिंहको हत्या आफन्तले गराएको आशंका प्रहरीले गरेको छ। दुर्घटनामा परी मृत्यु भएका पत्रकार सिंहकी पत्नीलाई क्षतिपूर्तिबापत दिइएको ३५ लाख रुपियाँको विषयमा आफन्तबीच भएको विवाद सो हत्याका कारण हुन सक्ने प्रहरीले जनाएको छ।प्रहरीस्रोतका अनुसार सोनालीलाई काठमाडौं घट्टेकुलोनजिक डेराबाट यही चैत ३ गते अपहरण गरी लगिएको थियो। उनको शव भारतको रक्सौलनजिक सिसबनियास्थित खेतमा फेला पारिएको थियो।हामी हत्यारा नजिक पुगेका छौं’, प्रहरी स्रोतले नेपाल समाचारपत्रसँग भन्यो- केही दिनभित्रै पक्राउ गरी र्सार्वजनिक गर्नेछौं।’पत्रकारपुत्री सोनालीको हत्याको भर्त्सना गर्दै नेपाल पत्रकार महासंघले मंगलबार दोषीमाथि कडा कारबाही माग गरेको छ।त्यस्तै बत्तीसपुतलीस्थित देश तिलक स्कुलमा अध्ययनरत सात वर्षीय बालक प्रशान्त साह तेलीको अपहरण गर्नेको पहिचान नजिक पुगेको प्रहरीले जनाएको छ।प्रशान्त स्कुलबाट घरतर्फजाँदै गर्दा सोमबार दिउँसो ४ बजे अपहरणमा परेका थिए। केही दिनभित्रै अपहरणकारीलाई पक्राउ गर्नेछौं’, महानगरीय प्रहरी परिसर काठमाडौंका प्रमुख एसपी नवराज सिलवालले भन्नुभयो।

रक्षाको निर्णय तत्काल कार्यान्वयन नगर्न अदालतको आदेश

लिम्वूवान डट व्लगस्पोट डटकम,काठमाडौं

नेपाली सेनाका आठ जना सहायकरथीको म्याद थप नगर्ने रक्षा मन्त्रालयको निर्णय कार्यान्वयन नगर्न सर्वोच्च अदालतले मंगलबार अन्तरिम आदेश जारी गरेको छ । उसले रक्षाको निर्णय तत्काल कार्यान्वयन नगर्न आदेश दिएको हो । आदेशपछि सहायकरथीहरुले पुरानै जिम्मेवारीमा काम गर्न सक्ने छन् । अदालतले यहीं मुद्दामा अर्को आदेश नभए सम्म उनीहरुलाई पूर्ववत जिम्मेवारी वहन गर्ने बाटो खुला गरिदिएको हो । रक्षा मन्त्रालयले म्याद थप नगरेपछि त्यसलाई चुनौती दिंदै सहायकरथीहरु नरबहादुर कंडेल, नरेन्द्रबहादुर रावल, कुमार बुढाथोकी, पवनबहादुर पाण्डे, प्रदिप विक्रम राणा, शिवकुमार पौड्याल, रमेश विष्ट र राजुप्रताप केसीले सर्वोच्चमा सोमवार संयुक्त रिट दायर गरेका थिए । रिटमा सुनुवाई गर्दै न्यायाधीश कल्याण श्रेष्ठको एकल इजलासले रक्षाको निर्णयलाई तत्कालका लागि रोकेको हो । रिट निवेदकले आफूहरुको म्याद थप नगर्ने सरकारको गैर कानूनी निर्णय बदर गर्न माग गरेका थिए । 'म्याद थप नगर्नुको कारण र आधार स्पष्ट खुलेको देखिएन' आदेशमा भनिएको छ-''सुविधा र सन्तुलनको सिद्धान्तका हिसाबले समेत रक्षा मन्त्रालयको निर्णय तत्काल कार्यान्वयन नगर्नु ।' अदालतले म्याद थप नगर्नुको लिखित कारण पेश गर्न समेत भनेको छ । लिखित जवाफ परेपछि यसमा थप सुनुवाई हुने छ । यस अघि म्याद नथप्ने सरकारी निर्णयलाई चुनौती दिदं अदालत पुगेका सहायक रथीहरुले आफूहरुमाथि न्याय भएको प्रतिक्रिया दिए । 'हामीमाथि राजनीतिक र प्रशासनिक अन्याय भएको थियो' आदेश सुनेपछि सहायक रथी राजुप्रताप केसीले संवाददाताहरुसँग भने-'कार्यक्षमता र शारिरीक सक्षमताका कारण पनि हामी योग्य छौं ।'

नेत्री आङ सान सुकीलाई नजरबन्दमा राख्नु गैरकानुनी

लिम्वूवान डट व्लगस्पोट डटकम,काठमाडौं

बैंकक/ संयुक्त राष्ट्रसंघले म्यान्मारकी प्रजातन्त्रवादी नेत्री आङ सान सुकीलाई नजरबन्दमा राख्नु गैरकानुनी भएको जनाएको छ । विगत १३ वर्षदेखि आफ्नै निवासमा नजरबन्दमा रहेकी नेत्री सुकीलाई बर्सेनि नजरबन्दको अवधि थप्दै राख्नु म्यान्मारको कानुनबमोजिम नभएको राष्ट्र संघको एउटा कानुनी दस्तावेजमा उल्लेख छ । नोबेल शान्ति पुरस्कारबाट सम्मानित प्रजातन्त्रवादी नेत्री सुकीलाई अन्तर्राष्ट्रिय एवं म्यान्मारको कानुनको बर्खिलाप हुनेगरी नजरबन्दमा राखिएको जिकिर गर्दै विश्व संस्थाले जुन्ता सरकारलाई पत्राचार गरेको छ । म्यान्मारको सन् १९७५ को राज्य संरक्षण कानुनअनुसार कुनै पनि नागरिकलाई पाँच वर्षभन्दा बढी नजरबन्दमा राख्न पाइनेछैन । यसैबीच, नेत्री सुकीको दल नेसनल लिग फर डिमोक्रेसी (एनएलडी) ले बन्दी बनाइएको आफ्नो दलका नेता तथा कार्यकर्तासँग भेटघाट गर्न अनुमतिका लागि जुन्ता सरकारसँग अपिल गरेको छ । दलको भावी योजना तथा रणनीतिबारे नेत्री सुकीलगायत हिरासतमा रहेका केन्द्रीय कार्यसमितिका नेताहरूसँग परामर्श गर्न पाउनु आफ्नो अधिकार भएको बताउँदै उक्त दलले हालसम्म सरकारीस्तरबाट कुनै प्रतिक्रिया प्राप्त नभएको जनाएको छ । आफ्ना नेताहरूसँग भेट्न एनएलडीले सैनिक सरकारलाई पत्राचार गरेको उक्त दलका एकजना वरिष्ठ नेताले बताए ।

प्रधानमन्त्री नर्वे र फिनल्यान्डको औपचारिक भ्रमण गर्ने

लिम्वूवान डट व्लगस्पोट डटकम,काठमाडौं

प्रधानमन्त्री पुष्पकमल दाहाल 'प्रचण्ड'ले चैतको दोस्रो साता नर्वे र फिनल्यान्डको औपचारिक भ्रमण गर्ने भएका छन् । चैत १५ गते प्रस्थान गरी उनी चैत १६ गते नर्वे पुग्ने कार्यक्रम छ । चैत १९ गते प्रधानमन्त्री त्यहाँबाट फिनल्यान्डका लागि प्रस्थान गर्नेछन् । प्रधानमन्त्रीका साथ उनकी पत्नी, प्रधानमन्त्री कार्यालय र परराष्ट्र मन्त्रालयका उच्च पदाधिकारी तथा व्यापारिक समुदायका सदस्य पनि रहनेछन् । प्रधानमन्त्रीले चैत १७ गते नर्वेका प्रधानमन्त्री जेन्स स्टोल्टेन्बर्गसँग भेटी द्विपक्षीय एवं आपसी हितका अन्य विषयमा छलफल गर्नेछन् । उनले नर्वेका राजासँग पनि भेट्नेछन् । प्रधानमन्त्रीले नर्वेली जलस्रोतमन्त्री तथा ऊर्जा सचिवालय र जलविद्युत् प्लान्टको भ्रमण गरी नेपालको जलविद्युत् विकासमा नर्वेको उच्चस्तरको संलग्नताबारे छलफल गर्नेछन् ।

नेपाली कांग्रेसले प्रधानमन्त्रीय पद्धतिलाई सिफारिस गर्ने

लिम्वूवान डट व्लगस्पोट डटकम,काठमाडौं

प्रमुख प्रतिपक्षी दल नेपाली कांग्रेसले प्रधानमन्त्रीय पद्धतिलाई निरन्तरता दिन संवैधानिक समितिमा सिफारिस गर्ने भएको छ । समितिमा पेस गर्न तयार पारिएको भावी संविधानको स्वरूपमा राष्ट्रप्रमुख राष्ट्रपति भए पनि कार्यकारी अधिकार भने प्रधानमन्त्रीमा हुनुपर्ने उल्लेख गरिएको छ । कांग्रेसले आपनो मस्यौदामा राष्ट्रिय एकता, अखण्डता जनतामा निहित सार्वभौमसत्ता, जनतामा निहित संविधानको सर्वोच्चतालाई नयाँ संविधान निर्माणको आधारभूत सिद्धान्त बनाउन सिफारिस गरेको छ । राष्ट्रपतिको निर्वाचन केन्द्रीय र प्रादेशिक संसद्बाट गर्नुपर्ने र प्रधानमन्त्री केन्द्रीय संसद्बाट चुनिनुपर्ने कांग्रेसले उल्लेख गरेको छ । नौ पेज लामो मस्यौदामा बहुदलमा आधारित संघीय लोकतान्त्रिक गणतन्त्रात्मक शासन व्यवस्थाको सिफारिस गरेको छ । उसले मस्यौदामा 'प्रधानमन्त्री केन्द्रीय संसद्प्रति उत्तरदायी हुनुपर्ने' उल्लेख छ । मानवअधिकार, मौलिक हक एवं नागरिक र राजनीतिक स्वतन्त्रतालाई संविधानमै सुरक्षित गर्नुपर्ने कांग्रेसको प्रस्ताव छ । कांग्रेसको प्रारम्भिक अवधारणाको मस्यौदामा संघीय स्वरूपबारे भने केही उल्लेख गरिएको छैन । कांग्रेस महामन्त्री विमलेन्द्र निधिले बहुलवादमा आधारित संघीय लोकतान्त्रिक गणतन्त्र राज्यको मूल स्वरूप हुनुपर्ने कांग्रेसको अवधारणा रहेको बताए । पार्टीको संविधान मस्यौदा समितिले दिएको सुझावका आधारमा तयार पारिएको सो सुझावलाई मंगलबार बिहान बस्ने संवैधानिक समितिको बैठकमा कांग्रेसका तर्फबाट महामन्त्री निधिले पेस गर्ने भएका छन् । कांग्रेसले सोमबार कार्यवाहक सभापति सुशील कोइरालाको उपस्थितिमा केही कानुनविद्को समेत परामर्शमा सो अवधारणा तयार पारेको हो । कांग्रेसले छिट्टै संविधानको स्वरूपसमेत पेस गर्ने पार्टीका तर्फबाट संविधान सुझाव समितिका सदस्य लोकेश ढकालले जानकारी दिए । संवैधानिक समितिले संविधानसभामा प्रतिनिधित्व गर्ने सबै राजनीतिक दलहरूसित लिखित अवधारणा मागेको छ ।