दुई अर्व रुपैयाँ ठगीको आरोप लागेका योगेन्द्र श्रेष्ठलाई प्रहरीद्वारा सार्वजनिक

लिम्वूवान डट व्लगस्पोट डटकम,काठमाडौं

आश्विन ११ - नेपाली वित्तिय क्षेत्रमा सबैभन्दा ठुलो अनियमितता गरेको आरोप लागेका योगेन्द्र प्रसाद श्रेष्ठ बुधवार प्रहरीले सार्वजनिक गरेको छ । उनलाई भारतमा पक्राउ गरेर ल्याइएको हो । उनी कार्यकारी अध्यक्ष रहँदा नेपाल सेयर मार्केट्स एन्ड फाइनान्स (एनएसएम) मा २ अर्ब ६६ करोड भन्दा बढि रुपैयाँ अनियमितता गरेको आरोप छ । भारतमा लुकेर बसेको अवस्थामा उनलाई भारतीय प्रहरीले पक्राउ गरी नेपाली सीमासम्म ल्याइ दिएको बताइएको छ । प्रहरीको केन्द्रिय अनुसन्धान ब्युरोले उनलाई धनगढीबाट काठमाडौं ल्याइ सकेको छ । श्रेष्ठ परिवारका अन्य सदस्यको नाममा समेत पक्राउ पूर्जी जारी भएपनि फरार छन् । राष्ट्र बैंकले एनएसएममा गरेको अनुसन्धानबाट श्रेष्ठ दोषी देखिएपछि वैशाखबाट खोजी सुरु भएको थियो । सर्वसाधारणको निक्षेप व्यक्तिगत कामका लागि प्रयोग गरेको, पुँजी वृद्धि गर्न संस्थागत निक्षेपकर्ताको रकम दुरुपयोग गरेको, प्रकृया नपुर्याइ कर्जा दिएको लगायतका आरोप उनलाई लागेको छ । उनको परिवारको एनएसएममा ४० प्रतिशत लगानी छ । प्रचलित कानून अनुसार उनलाई ३ देखि ५ वर्षसम्म कैद हुनसक्छ । प्रहरीले बैंकिङ कसुर तथा सजय ऐन २०६४ अनुसार बिगो बराबरको जरिवाना र पाँच वर्ष कैद दावी गर्ने जनाएको छ ।