एकै दिन विमानका तीन घटना १९ जनाको मृत्यु

लिम्वूवान डट व्लगस्पोट डटकम,काठमाडौं

असोज ८,आइतबार एकै दिन काठमाडौंमा विमानसँग सम्बन्धित तीन वटा घटना भए। पहिलो घटनामा त्रिभुवन विमानस्थलबाट माउन्टेन फ्लाइटका लागि उडेको बुद्ध एअरको एउटा जहाज उपत्यका प्रवेश गर्ने क्रममा ललितपुरमा बिहानै दुर्घटना भयो। जसमा १९ जनाको मृत्यु भयो। त्यसैगरी दोस्रो घटनामा दिउसो भारतीय स्पाइस जेटभित्र बम भएको हल्ला चल्यो। उड्न लागेको विमानमा बम भएको हल्ला चलेपछि नेपाली सेनाको बम निष्क्रिय पार्ने टोली पुग्यो। चेकजाँच गर्दा थाहा भयो कि त्यहाँ त्यस्तो केही रहेनछ। केही व्यक्तिले हल्ला चलाएकामात्र रहेछन्। जो प्रहरी नियन्त्रणमा परे। तेस्रो घटना साँझपख भयो। नेपाल वायु सेवा निगमको ट्विनअटर जहाजको पाङ्ग्रा पङ्चर भएपछि रन वेमा नै अड्क्यो जसका कारण केहीबेर विमानस्थल अवरुद्ध हुन पुग्यो। पहिलो घटनाले जहान उडान र अवतरण हुन नरोकिए पनि पछिल्ला दुई घटनाले भने विमानस्थलकै सम्पूर्ण काम प्रभावित तुल्याए। स्पाइस जेट त अझै उड्न सकेको छैन। बिहान ८ बजेर ५० मिनेट जाँदा ललितपुरको बाडे गाउँमा दुर्घटना भएको पुष्टि नागरिक उड्ययन प्राधिकरणले गरेको थियो। बिहान ६ बजेर ४९ मिनेटमा उडेको सो जहाजको ७ बजेर ३१ मिनेटमा सम्पर्क टुटेको थियो। यात्रुहरुको शव शिक्षण अस्पतालमा लगिएको छ। पोस्टमार्टमपछि शव परिवारलाई बुझाइँदैछ।