काँग्रेसका बरिष्ठ नेता देउवाद्वारा केन्द्रीय सदस्यबाट राजीनामा

लिम्वूवान डट व्लगस्पोट डटकम,काठमाडौं

आश्विन ११ - काँग्रेसका बरिष्ठ नेता शेरबहादुर देउवाले पार्टी केन्द्रीय सदस्यबाट राजीनामा दिएका छन् । भातृ संगठनको विवाद चर्किंदै गएपछि मंगलबार पत्रकार सम्मेलन गरी उनले राजीनामा घोषणा गरेका हुन् । 'मैले पार्टीबाटै सन्यास लिन वा पार्टी फुटाउन राजीनामा दिएको होइन' उनले पत्रकार सम्मेलनमा भने, 'सभापतिले एक लौटी गरेकाले बाहिरै बसेर काम गर्छु भनेर राजीनामा दिएको हुँ ।'देउवाले भातृ संगठनको केन्द्रीय समिति भंग गर्ने पार्टीको निर्णय सच्याउन आग्रह गर्दै आएका थिए । उक्त विवाद समाधान गर्न संस्थापन र देउवा पक्षका नेताहरु रहेको कार्यदल गठन गरेपनि उक्त कार्यदलको सुझाव सभापति सुशील कोइरालाले लत्याएपछि देउवा रुष्ट भएका हुन् । नौ दिन देखि जारी रहेको देउवा पक्षीय भातृ संगठनका नेता कार्यकर्ताहरुको आमरण अनसन पनि मंगलबार तोडिएको छ । देउवाले आफ्नो राजीनामा घोषणा गरेपछि अनसन तोडाएका हुन् । महाधिवेशनमा सुशील कोइरालासंग सभापतिमा पराजित देउवालाई कोइरालाले केन्द्रीय सदस्यमा मनोनित गरेका थिए । देउवाले भातृ संगठनहरुको नेतृत्व विघटन गर्दा रामचन्द्र पौडेललाई उपसभापति र कृष्ण सिटौलालाई महामन्त्री बनाउँदा सभापति कोइरालाले गरेको सहमति तोडिएको बताउँदै आएका छन् ।