११ दिनसम्म पनि भूकम्प केन्द्रबिन्दू नजिकका गाउँ सम्पर्कविहीन

लिम्वूवान डट व्लगस्पोट डटकम,काठमाडौं

ताप्लेजुङ, असोज ११- सम्पर्कविहिन भएको ताप्लेजुङका उत्तरी गाउँको अवस्था बुझ्न सदरमुकामबाट गएको सशस्त्र प्रहरीको ११ जनाको टोली सो ठाउँ पुग्न नसकेर बीचबाटै बाट फर्किएको छ। यो टोली पनि फर्किएपछि उत्तरी गाउ घुन्सा, याङ्गमा, फले र ओलाङ्गचुङ्गगोला भूकम्प गएको ११ औं दिनसम्म पनि सम्पर्क बाहिर रहेका छन्। जिल्ला दैवी प्रकोप उद्धार समितिका संयोजक एवम् प्रमुख जिल्ला अधिकारी देवराज ढकालले ठाउँ ठाउँमा पहिरो गएको र बाटो अवरुद्ध भएका कारण सो टोली लक्षित स्थल तर्फ पुग्न नपाएको बताए। ती स्थल भूकम्प गएको दिनदेखि नै सम्पर्क बाहिर रहेको पनि उनले जानकारी दिए। "अब हेलिकप्टर बाहेक अर्को उपाय रहेन"उनले भने "त्यसका लागि गृह सचिवसँग कुराकानी भइरहेको छ"। उनले त्यो क्षेत्रका बासिन्दाको अवस्था बुझ्न पनि कठिनाई भइरहेको जानकारी दिए। ढकालका अनुसार शसस्त्र प्रहरीको कञ्चनजंघा गुल्मबाट प्रहरी नायव निरिक्षक राजेश बुढाथोकीको नेतृत्वमा गएको टोली ग्याब्लाभन्दा मास्तिर पुगेर उकालो जान नसकी फर्किएको हो। फलेसम्म पनि पुग्न नपाएकाले भूकम्पपछि उत्तरी क्षेत्रको जनजीवन कस्तो छ भन्ने बारेमा जिल्ला दैवी प्रकोप उद्धार समितिसँग पनि कुनै जानकारी र अभिलेख छैन। सम्पर्क स्थापित हुन नसक्दा ओलाङ्गचुङ्गगोला, याङ्गमा र फलेका बासिन्दा राहातका लागि तोकिएको केन्द्र आई पुगेका छैनन् भने ती क्षेत्रमा बाढी र पहिरोका कारण सरकारी उपस्थिति पनि शून्य छ।