फरार सभासद् शिवपूजन राय यादव पक्राउ

लिम्वूवान डट व्लगस्पोट डटकम,काठमाडौं

कुटनीतिक राहदानी दुरुपयोग गरेको अभियोगमा मधेशी जनअधिकार फोरम नेपालका सभासद् शिवपूजन राय यादव पक्राउ परेका छन् । हिजो साँझ केन्द्रीय अनुसन्धान व्युरोको टोलीले सभासद् यादवलाई काठमाडौंको छाउनीबाट पक्राउ गरेको हो । आफ्नो कूटनीतिक राहदानी अर्को व्यक्तिलाई दिएर दुरुपयोग गरेको प्रमाण फेला परेपछि यादव विगत तीन महिनादेखि फरार थिए । सभासद् यादवको राहदानी प्रयोग गरी म्याग्दीका केदार पौडेल अष्ट्रेलिया पुगेको प्रहरीको अनुसन्धानबाट पत्ता लागेको छ । यादव संविधानसभाको चुनावमा सर्लाही क्षेत्र नम्बर ६ बाट निर्वाचित सभासद् हुन् । राहदानी दुरुपयोग गरेकै अभियोगमा यसअघि जनता दलकी गायत्री साह, फोरम गणतान्त्रिकका बीपी यादव र एमालेका नारदमुनि थारू चौधरी पक्राउ परिसकेका छन् ।