विरोधमा वैद्य समूहले मसाल जुलुस निकाल्यो

लिम्वूवान डट व्लगस्पोट डटकम,काठमाडौं

आश्विन १३ - रक्षामन्त्री शरतसिंह भण्डारीले दिएको अभिव्यक्तिको विरोधमा सत्तारुढ माओवादीका उपाध्यक्ष मोहन वैद्य समूहले शुक्रबार साँझ राजधानीसहित केही जिल्लामा मसाल जुलुस निकालेको छ । वैद्य समूहका जनवर्गीय संगठनले राजधानीको रत्नपार्क, लगनखेल र भक्तपुरमा साँझ मसाल जुलुस निकालेको हो । पोलिट्ब्युरो सदस्य नारायण शर्माले रक्षामन्त्रीको 'राष्ट्रघाती' अभिव्यक्ति र चार बुँदे सम्झौता खारेज नभएसम्म मसाल जुलुसहितका विरोध प्रदर्शन जारी राख्ने बताए । यसअघिको स्थायी समिति बैठकले केन्द्रीय समिति बैठक नबसेम्म अन्तरसंघर्षलाई सार्वजनिकरुपमा प्रस्तुत नगर्ने निर्णय गरेको थियो । तर वैद्य समूहले रक्षामन्त्रीको अभिव्यक्तिविरुद्ध दुई दिनदेखि राजधानीसहित देशभर प्रदर्शन गरिरहेका छन् । राजधानी बाहिर भएका कतिपय जिल्लाका विरोधमा एमाले, कांग्रेसलगायतका दलले पनि वैद्य समूहलाई सघाएका छन् । मन्त्री भण्डारीले सोमबार राजधानीमा आयोजित साक्षात्कारमा मधेसीलाई विभेद गरिरहने हो भने मधेसका २२ जिल्लाले निर्णय गरेर नेपालबाट अलग हुने चेतावनी दिएका थिए । 'मधेसका २२ जिल्लाले अलग हुने निर्णय गरे कुन ऐन र कानूनले मुलुकलाई बचाउँछ ?,' उनले भनेका थिए ।