मुद्दा फिर्ता नलिन प्रचण्डलाई मानवअधिकारबादीहरुको आग्रह

लिम्वूवान डट व्लगस्पोट डटकम,काठमाडौं

बिभिन्न राजनैतिक मुद्दा फिर्तालिने बिषयमा माओवादी र मधेसी मोर्चा बिच भएको सहमति कार्यान्वयन नगर्न मानवअधिकारबादीहरुले आग्रह गरेका छन् । राष्ट्रिय मानवअधिकार आयोगका पदाधिकारीहरुले माओवादी अध्यक्ष प्रचण्डलाई भेटेर गम्भीर मानवअधिकार उल्लङ्घनका दोषी उपर लागेको मुद्धा फिर्ता नलिन ध्यानाकर्षण गराएका छन् । आयोग अध्यक्ष केदारनाथ उपाध्याय नेतृत्वमा गएको एक टोलीले माओवादी मुख्यालय कोटेश्वर पेरिसडाँडामा भेटी प्रचण्डको ध्यानाकर्षण गराएको हो । उनीहरुले सरकार गठनअघि माओवादी र मधेसी मोर्चाबीच भएको सहमतिमा गम्भीर मानवताविरोधी अपराधमा संलग्नहरुको समेत सरकारले मुद्धा फिर्ता लिने उल्लेख गरिएको भन्दै त्यसो नगर्न प्रचण्डलाई आग्रह गरेका थिए । भेटपछि सञ्चारकर्मीहरुसँग कुरा गर्दै अध्यक्ष उपाध्यायले आफूहरुले गम्भीर मानवअधिकार उल्लङ्घटनका घटनाका दोषीको मुद्धा फिर्ता नलिन आग्रग गरेको र प्रचण्डले त्यसलाई सकारात्मक रुपमा लिएको बताउनुभयो । अध्यक्ष प्रचण्डले आपराधिक घटनाका दोषीको नभई द्वन्द्वकालमा राजनीतिक प्रतिशोधका आधारमा लगाइएका झुठा मुद्धामात्र फिर्ता लिने सहमति भएको स्पष्ट गर्दै त्यसलाई गम्भीर रुपमा नलिन आयोग टोलीसँग आग्रह गर्नुभएको थियो । भेटमा आयोगका सदस्यहरुले अन्तरिम संविधानमा व्यवस्था भएअनुसार सत्य निरुपण तथा मेलमिलाप आयोग तत्काल गठन गर्न पनि प्रचण्डसँग अनुरोध गरेका थिए । टोलीले कांग्रेस-एमालेलगायत दलका नेताहरुलाई पनि भेटेर गम्भीर प्रकृतिका मुद्धा फिर्ता नलिन ध्यानाकर्षण गराइने बताएको छ ।