मदन र जगदम्बा श्री पुरस्कार घोषणा

लिम्वूवान डट व्लगस्पोट डटकम,काठमाडौं

असोज ६,वि‌.सं. २०६६ को मदन पुरस्कार बैतडीका नरबहादुर साउदलाई प्रदान गरिने भएको छ। उनलाई नेपालका बालीनाली र तिनको दिगो खेती नामक विद्वत् ग्रन्थका लागि यो पुरस्कार दिइने भएको हो। त्यसैगरी जनकपुरका डा. राजेन्द्र विमललाई जगदम्बा श्री पुरस्कार दिइने भएको छ। मदन पुरस्कार गुठीको साधारण सभा बैठकले बुधबार यो निर्णय गरेको हो।विमललाई ४ दशकदेखि मिथिला क्षेत्रमा मैथिलभाषी विद्यार्थीलाई नेपाली भाषामा शिक्षित गराइ विद्वान् बनाउने पुनीत कार्यका साथै नेपाली भाषामा अनेकानेक ग्रन्थ रचना गरी नेपाली भाषा वाङमयलाई समृद्ध तुल्याउने कामसमेत गरेवापत उक्त पुरस्कार प्रदान गरिने भएको गुठीले जनाएको छ।दुवै पुरस्कारको राशि २-२ लाख रुपैयाँको छ। २०१२ सालमा सुरु भएका यी पुरस्कारको सुरु राशि ४-४ हजार रुपैयाँ थियो।२०१५ सालमा गङ्गाविक्रम सिजापतीको ग्रन्थ 'उद्यान' पुरस्कृत भएपछि कृषिसम्बन्धी ग्रन्थले पुरस्कार प्राप्त गरेको यसै सालमात्र भएको जानकारी पनि गुठीले दिएको छ। दुवै पुरस्कार नौरथाका दिन प्रदान हुनेछन्।