राज्य पुनर्संरचना आयोगका विषयमा दलहरुबीच कुरा मिलेन

लिम्वूवान डट व्लगस्पोट डटकम,काठमाडौं

भाद्र १७ - राज्य पुनर्संरचना आयोग बनाउनुपर्ने अडानबाट कांग्रेसपछि नहटेपछि त्यस विषयमा दलहरुबीच सहमति हुन सकेको छैन । संविधानमा देखिएको विवाद समाधान उपसमितिको लामो समयपछि बसेको बैठकमा दलहरुबीच आयोग गठन वा विज्ञहरुको समूह बनाउने विषयमा कुरा मिल्न सकेन ।संविधानमा देखिएको विवाद समाधान उपसमितिको लामो समयपछि बसेको बैठकमा कांग्रेसले संवैधानिक व्यवस्था अनुसार आयोग गठन गरिनुपर्ने आफ्नो पूर्व अडानमा अडिग रह्यो । माओवादी र संयुक्त लोकतान्त्रिक मधेशी मोर्चाबीच संविधान निर्माणका लागि समय कम भएकाले आयोग गठन नगर्ने सहमति भइसकेको छ । बीचको बाटोका रुपमा विज्ञहरु सम्मिलित समूह बनाएर राज्य पुनर्संरचनाका विषयमा छलफल गराउन सकिने प्रस्ताव आएपनि कांग्रेसले त्यसलाई स्विकार गरेन । विज्ञहरुको समूह बनाउन माओवादी र एमाले सहमत भएका छन् । कांग्रेसले राज्यको पुनर्संरचनाको विषय गम्भीर भएकाले यसलाई आयोग बनाएर टुंग्याउनुपर्नेमा जोड दिएको छ । कांग्रेसले संविधानमा व्यवस्था भए अनुसार नै आयोग गठनको माग गर्दै आएको छ भने माओवादीले राज्यपुनर्संरचना तथा राज्य शक्तिको बाँडफाँड समितिले प्रतिवेदन तयार पारिसकेकाले सुझावका लागि विज्ञ सम्मिलित प्राविधिक सहितको समूह गठन गरिनुपर्नेमा जोड दिएको छ । मधेशवादी दलहरुले आयोग गठनमा असहमति राख्दै आएका छन् । दलहरुबीच राज्यपुनर्संरचना, निर्वाचन प्रणाली र सशाकीय स्वरुपका विषयमा तिव्र मतभेद छ । विज्ञहरुको समूह बनाउने विषयमा उपसमितिका अधिकांश सदस्य सहमत भएपनि कांग्रेस संसदीय दलका नेता रामचन्द्र पौडेलको अनुपस्थितिका कारण निर्णय हुन सकेन । बैठकपछि कांग्रेस नेता बिमलेन्द्र निधिले कांग्रेस आयोग गठनका पक्षमा रहेकाले यस विषयमा पार्टी भित्र थप छलफल गरेर निर्णय लिइने बताए ।