मोर्चा 'मनाउन' दुई मन्त्रालय फुटाइने

लिम्वूवान डट व्लगस्पोट डटकम,काठमाडौं

भदौ १७ -सत्ताको प्रमुख घटक संयुक्त लोकतान्त्रिक मधेसी मोर्चाको चित्त बुझाउन प्रधानमन्त्री बाबुराम भट्टराईले भौतिक योजना तथा निर्माण र कृषि तथा सहकारीलाई फुटाएर दुई मन्त्रालय बढाउने सहमति गरेका छन् । प्रधानमन्त्री तथा मन्त्रिपरिषद कार्यालयमा माओवादी अध्यक्ष पुष्पकमल दाहालसमेत सहभागी शुक्रबार अपराह्न मोर्चासँगको बैठकमा भट्टराई मन्त्रालय संख्या बढाएर २८ पुर्‍याउन तयार भएका हुन्। नयाँ गठन हुनेमध्येबाट मोर्चालाई एउटा मन्त्रालय थप्ने सहमतिपछि मोर्चा र माओवादीबीच मन्त्रालय भागबन्डामा देखिएको विवाद सल्टिएको छ। 'आवास तथा भौतिक योजना र कृषि तथा सहकारी मन्त्रालय फुटाएर मोर्चालाई यसअघिको सहमतिबाहेक थप एक मन्त्रालय दिन माओवादी तयार भएको छ,' फोरम लोकतान्त्रिकका मुख्य सचेतक रामजनम चौधरीले नागरिकसँग भने, 'मोर्चाले पाएको थप एक मन्त्रालय फोरम गणतान्त्रिकलाई हो।' जयप्रकाशप्रसाद गुप्ताले नेतृत्व गरेको फोरम गणतान्त्रिकले उपप्रधानमन्त्री नपाए सरकारमा सहभागी नहुने अडान राखेपछि बदलामा एउटा मन्त्रालय थप्ने सहमति भएको हो। यसअघि माओवादीसँग गुप्ता नेतृत्वको फोरम गणतान्त्रिकलाई दुई मन्त्रालयसहित मोर्चालाई ११ मन्त्रालय दिने सहमति भएको थियो। नयाँ सहमतिअनुसार माओवादीले ११, मोर्चाले १२, फोरम नेपाललाई दुई र बाँकी मन्त्रालय अरू साना दललाई बाँडिनेछ।