योजना आयोगका उपाध्यक्षसहित दुई सदस्यले राजीनामा दिए

लिम्वूवान डट व्लगस्पोट डटकम,काठमाडौं

भाद्र १६ - राष्ट्रिय योजना आयोगका उपाध्यक्ष डा. दिनेशचन्द्र देवकोटाले शुक्रबार राजीनामा दिएका छन् । उनीसँगै आयोग सदस्यद्वय डा. प्रेम कुँवर र रामकुमार शर्माले राजीनामा दिए । उपाध्यक्ष डा देवकोटाले आयोगमा पत्रकार सम्मेलन गरी आफूले वर्तमान सरकारलाई काम गर्न सहज परिस्थिति सिर्जना गर्न राजीनामा दिएको बताए । राजीनामा दिनेबारे शुक्रबार नै प्रधानमन्त्री बाबुराम भट्टराईलाई जानकारी गराएको उनले बताए ।गोरखा निवासी देवकोटा जेठ तेस्रो साता योजना आयोगको उपाध्यक्ष नियुक्त भएका हुन् । त्यसअघि भने उनी आयोग सदस्य थिए । एमाले निकट उनलाई झलनाथ खनाल नेतृत्वको सरकारले नियुक्त गरेको थियो । पत्रकार सम्मेलनमा उपाध्यक्ष देवकोटाले ३१ महिने आफ्नो कार्यकालमा मुलुकको विकासका लागि २० वर्षे दृष्टिकोणको खाका तयार पारेको, बबइ डाइभर्सन, माथिल्लो तामाकोसी, मध्यपहाडी लोकमार्गलगायतको निर्माणमा महत्वपूर्ण भूमिका निर्वाह गरेको दाबी गरे ।