माओवादी र मधेसी मोर्चा बिचको मन्त्रिमण्डल विस्तार अनिश्चित

लिम्वूवान डट व्लगस्पोट डटकम,काठमाडौं

भदौ १६,मन्त्रिमण्डल विस्तार गर्नेबारे माओवादी र मधेसी मोर्चाका नेताबीच केही समयअघिमात्र बैठक सकिएको छ। आजै मधेसी मोर्चाको बैठक बस्ने र उसको निर्णयपछि मात्र मन्त्रिमण्डल विस्तार गर्ने भनिए पनि यो काम भने अनिश्चित देखिएको छ। सत्ता साझेदार दुई दलको उक्त बैठकमा यसअघि भाग लगाइएका केही मन्त्रालय साटफेर गर्ने र कति जना उपप्रधान मन्त्री राख्‍ने भन्नेबारे सहमति भएको बताइएको छ तर कुन कुन मन्त्रालय साटफेर हुने भयो वा कति जना उपप्रधान मन्त्री हुने भए भन्ने जानकारीचाहिँ दिइएको छैन। एकातिर माओवादीले सरकारमा पठाउने मन्त्रीहरु नै निश्चित भइसकेको छैन भने मोर्चाका ५ तिर फर्किएका ५ घटकबीचको सहमति पनि सहज छैन। मोर्चाका प्रत्येक घटकका नेता आफू उपप्रधान मन्त्री वा त्यो नपाए 'कमाउ' मन्त्रालय पाउनुपर्ने दाबी गरिरहेका छन्। त्यसभित्र पनि सबै नेता-सभासद् मन्त्री हुनैपर्ने अडानमा छन्। सबैलाई चित्त बुझाउन सक्ने अवस्था मोर्चामा देखा परेको छैन। यही कारण मोर्चाले मन्त्रीको नाम निश्चित गर्ने काम पक्कै सहज छैन। मन्त्रीमा नपर्ने मोर्चाका सदस्य तत्कालै पार्टी फुटाउन लागिपर्ने भयले पनि नेताहरु सताइएका छन्। विगतका घटना र अभ्यासले उनीहरु अहिले नै त्रसित छन्। उता पार्टी निर्णयविपरित माओवादी लडाकुको हतियार राखेको कन्टेनरको साँचो विशेष समितिलाई बुझाएकामा सङ्घर्षसमेत घोषणा गरिसकेको माओवादी उपाध्यक्ष वैद्य पक्षले आफूहरु सरकारमा सामेल नहुनेसमेतको निर्णय गरिसकेको छ। यस्तो अवस्थामा तत्कालै मन्त्रिमण्डल विस्तार हुने सम्भावना निकै कम छ।