प्रधानमन्त्रीले गल्ती भएको स्वीकार गरे

लिम्वूवान डट व्लगस्पोट डटकम,काठमाडौं

प्रधानमन्त्री पुष्पकमल दाहाल प्रचण्डले एमाले कार्यकर्ता प्रचण्ड थैवको हत्या आरोपी सुजित विकलाई पक्राउ गर्न नसक्नु गल्ती भएको स्वीकार गरेका छन् । एमाले नेतृत्वसँग शनिबार सिंहदरबारमा भएको छलफलका क्रममा उनले सुजितको खोजी भइरहेको जानकारी दिए । 'ऊ अपराधी नै थियो, भाग्यो,' छलफलमा प्रचण्डको भनाइ उद्धृत गर्दै एमाले नेता राजेन्द्र पाण्डेले नयाँ पत्रिकासँग भने । पाण्डेका अनुसार आरोपी सुजितलाई मानवअधिकार आयोगको कार्यालयमा बुझाउने जिम्मा माओवादीले पोलिटब्युरो सदस्यहरू टोपबहादुर रायमाझी र देवेन्द्र पौडेलाई दिएको प्रचण्डले जानकारी गराएका थिए । 'मानवअधिकार आयोगमै बुझाउनका लागि मैले सुजितलाई पक्राउ नगर्न गृहमन्त्री वामदेव गौतमजीलाई भनेको थिएँ, आयोगमा मानवअधिकारकर्मीलाई उपस्थित गराएर पत्रकारहरूको माझमा सार्वजनिक गर्ने योजना थियो,' प्रचण्डले छलफलमा भने, 'तर, ऊ बीचबाटै भागेछ ।' सुजित २५ चैतमा मानवअधिकार आयोगको कार्यक्रममा उपस्थित हुने जानकारी माओवादीले आयोग सदस्य डा. केबी रोकायालाई दिएका थिए । रोकायाले माओवादी निकटका मानवअधिकारकर्मी मुक्ति प्रधानलगायतलाई सोही दिन पौने चर बजे हरिहरभवनस्थित कार्यालयमा बोलाएका थिए । 'मलाई आयोगका सदस्य केबी रोकायाले बोलाउनुभएको थियो । म गएँ । तर, सम्बन्धित मान्छे आएनन्,' प्रधानले शनिबार नयाँ पत्रिकासँग भने, 'कार्यालय बन्द हुने वेलासम्म बसेर साढे पाँच बजेतिर हामी निस्क्यौं ।' यद्यपि आयोगले भने सुजितले सम्पर्क नगरेको भन्दै विज्ञप्ति जारी गरिसकेको छ । सोही घटनाको कारण खोज्दै आपसी समझदारी कायम गर्न माओवादी र एमालेले शनिबार कार्यदल गठन गरेका छन् । ६ सदस्यीय रहेको कार्यदलमा माओवादीका पोष्टबहादुर बोगटी, दीनानाथ शर्मा र नारायणकाजी श्रेष्ठ छन् भने एमालेका अशोक राई, शंकर पोखरेल र राजेन्द्र पाण्डे छन् । युथफोर्स कार्यकर्ता प्रचण्ड थैवलाई सहिद घोषणा गर्नुपर्ने, परिवारलाई क्षतिपूर्तिसहित छोराछोरीलाई निःशुल्क शिक्षा र श्रीमतीलाई रोजगारी दिनुपर्ने माग एमालेले शनिबारको बैठकमा राखेको थियो । कार्यदललाई आइतबार साँझसम्म सम्बन्ध सुधारका लागि शीर्ष नेतालाई सुझाव दिन भनिएको छ । एमाले नेता पाण्डेका अनुसार कार्यदलको बैठक आइतबार बिहान ८ बजे माओवादी संसदीय दलको कार्यालय सिंहदरबारमा बस्नेछ । बैठकमा एमालेले सुर्खेतमा मारिएका कार्यकर्ता राजबहादुर मल्ल, पर्वतमा कुटिएका विकास लम्साल र धनकुटामा कुटिएका गोपाल गुरागाईंका सम्बन्धमा पनि छानबिन गरी दोषीलाई कारबाही गर्न माग गर्ने भएको छ ।