विभिन्न पत्र-पत्रिकाहरूमा छापिएको संघीय लोकतान्त्रिक राष्ट्रिय मञ्चका नेतृत्वहरूलाई कार्वाही गरिएको कथित समाचारप्रति हाम्रो गम्भीर ध्यानाकर्षण भएको छ । आजको मितिमा निर्वाचन आयोगको रेकर्डमा संघीय लोकतान्त्रिक राष्ट्रिय मञ्चको अध्यक्ष डी. के. बुद्धिष्ट हुन् भनेर प्रष्ट उल्लेख छ । निर्वाचन आयोगले डी. के. बुद्धिष्ट मञ्चको अध्यक्ष हुन् भनी दिएको कागज-पत्र हामी कुनै पनि बेला कुनै पनि ठाउमा प्रस्तुत गर्न सक्छौं । मिति २०६५ चैत्र २८, २९ गते सम्पन्न मञ्चको १९ औं बैठकले अध्यक्ष मण्डल सदस्य कमल छाराहाङ र सचिवालय सदस्य बालकुमार (मिसेकहाङ) थाम्सुहाङले विधान विपरीत र संघीयवादी एवम् जातीय मुक्तिको विरुद्धमा कार्य गरेकोले नीजहरूलाई मञ्चको साधारण सदस्यताबाट समेत निष्काशन गरिसकेको छ, मञ्चको संघीय(केन्द्रीय) समितिको बहुमतले गरेको सो निर्णयलाई निर्वाचन आयोगले समेत रुजु गरिसकेको छ । कमल छाराहाङ मञ्चको अध्यक्ष त परैजावस् साधारण सदस्यसमेत छैनन् । मञ्चसँग कुनै वैधानिक सम्बन्ध नभएका नीज व्यक्तिले स्वघोषित अध्यक्ष भएर मञ्चका वैधानिक अध्यक्ष डी. के. बुद्धिष्ट, अध्यक्ष मण्डल सदस्य कुमार लिङ्देन र कार्यवाहक महासचिव खगेन्द्र माखिमलाई मञ्चबाट कार्वाही गरेको हल्ला फिजाएका छन्, यो भ्रम हो, यस हल्लामा एक प्रतिशत पनि वैधानिकता छैन, यो पूरै अवैधानिक कार्य हो । संघीयवादी आन्दोलनलाई तहस-नहस पार्ने षडयन्त्र हो । नीज कमल छाराहाङले मञ्च र राज्यबीच २०६४ फागुन १८ गते भएको ५ बुँदे सहमति र संविधान सभाको खुलेर विरोध गरेका हुन् । उनको षडयन्त्र र विरोधलाई कुल्चदै मञ्च संविधान सभामा सहभागी भयो र हाल पन्ध्रौं राष्ट्रिय दल हुन सफल भएको छ । उनले मञ्चलाई भत्ताभुङग बनाउन अनेकौं पल्ट तिक्डमहरू रचेका हुन्, त्यस षडयन्त्रको जालोमा यसपल्ट मञ्चका सभासद् राजकुमार नाल्बो सहाभागी भएका छन् । सभासद् नाल्बोले पार्टीलाई गम्भीर धोका दिएको र संविधान सभा विरोधीहरूसँग मिलेकोले नीजलाई सभासद्बाट फिर्ता बोलाउन मञ्चले तत्काल कानुनी प्रक्रिया अघि बढाउनेछ । संघीयता विरोधीहरूद्वारा सञ्चालित केही व्यक्तिहरूले मञ्चको विरुद्धमा चलाएको यो भ्रमलाई चिर्न मञ्चका संघीयतावादी, लोकतान्त्रिक, गणतन्त्रवादी, संविधान सभापक्षधर इमान्दार कार्यकर्ताहरू एकजुट हुन आग्रह गर्दछु । साथै, यी सञ्चालित व्यक्तिहरू आफै चाडै नै जनतासामु नाङ्गेझार हुनेछन् ।
मितिः २०६६।०१।१२
No comments:
Post a Comment