प्रधानसेनापति प्रकरणमा दलहरुको आआफ्नै अडान

लिम्वूवान डट व्लगस्पोट डटकम,काठमाडौं

प्रधानसेनापति प्रकरणमा प्रमुख दलहरु माओवादी, नेपाली कांग्रेस र एमाले आफ्नै अडानमा कायम छन् ।
राजनीतिक दलहरुको सहमतिमा प्रधानसेनापति रुक्माङ्गद कटवालबारे निर्णय गर्ने प्रधानमन्त्री तथा वरिष्ठ मन्त्रीहरुले बताइरहेका बेला प्रमुख दलहरुले आफ्नै अडान दोहोर्‍याएका छन् । बैशाख १३ गते व्यवस्थापिका संसदको बैठकमा बोल्दै माओवादी, नेपाली कांग्रेस र एमाले नेताहरुले प्रधानसेनापति प्रकरणमा आफ्ना अडान दोहोर्‍याएका हुन् ।माओवादी प्रवक्ता तथा सभासद दिनानाथ शर्माले नागरिक सर्वोच्चता कायम गर्न प्रधानसेनापति कटवाललाई सरकारले हटाउन खोजेकाले सबै दलले सरकारलाई सहयोग गर्नुपर्ने बताए । नेपाली कांग्रेसका महामन्त्री तथा सभासद डा. रामशरण महतले माओवादी सर्वोच्चता कायम गर्न प्रधानसेनापति हटाउन खोजिएको उल्लेख गरे भने एमाले सचिव तथा सभासद शंकर पोखरेलले कुनै ब्यक्तिको निर्णय तथा स्वेच्छचारिताका आधारमा प्रधानसेनापतिमाथि कारवाही भए आफ्नो पार्टीलाई मान्य नहुने धारणा राखे ।व्यवस्थापिका संसदको अर्को बैठक बैशाख १४ गते हुने भएको छ ।यसैबीच, माओवादी सचिवालय सदस्य नारायणकाजि श्रेष्ठले संसदमा उपस्थित पत्रकारहरुसँग कुरा गर्दै प्रधानसेनापति हटाउने निर्णयबाट आफ्नो पार्टी पछि नहट्ने बताए । उनले आजै मन्त्रीपरिषद बैठक हुने सम्भावना नरहेको पनि जानकारी दिए ।