मेक्सिकोमा स्वाइन फ्लुबाट मर्नेको संख्या १०० पुग्यो

लिम्वूवान डट व्लगस्पोट डटकम,काठमाडौं

मेक्सिको सिटी/ मेक्सिकोमा स्वाइन फ्लुको संक्रमणका कारण अहिलेसम्म १०० जनाले ज्यान गुमाइसकेका छन् । यस रोगको संक्रमण संयुक्त राज्य अमेरिका, क्यानडा र स्पेनमा पनि फेला परिसकेको छ । स्पेनमा स्वाइन फ्लुको संक्रमण देखापरेपछि युरोपेली देशका स्वास्थ्यमन्त्रीले आपतकालीन बैठक आह्वान गरेका छन् । स्वाइन फ्लुले महामारीको रूप लिन सक्ने संयुक्त राष्ट्र संघले सचेत गराएको छ । एसियालगायत अन्य देशका कयौं विमानस्थलमा संक्रमण लागेको वा नलागेको जाँच्ने व्यवस्था गरिएको छ । मेक्सिकोमा एक हजार ६ सय १४ जना स्वाइन फ्लुबाट संक्रमित भएको स्वास्थ्यमन्त्री जोसे एन्जेल कोरडोभाले जानकारी दिए । संयुक्त राज्य अमेरिकामा २० व्यक्तिलाई स्वाइन फ्लुको संक्रमण लागेको बताइएको छ । अमेरिकामा सार्वजनिक स्वास्थ्यमा संकटकाल घोषणा गरिएको छ । क्यानडामा ६ व्यक्तिमा यो संक्रमण देखापरेको छ । रुस, थाइल्यान्ड र चीनले मेक्सिको र अमेरिकाका केही भागबाट सुंगुरको मासु आयात गर्न रोक लगाएको छ ।