एसिसी यू-१९ इलाइट कप क्रिकेटको विजय सुरुवात

लिम्वूवान डट व्लगस्पोट डटकम,काठमाडौं

साविक चारपटकको विजेता नेपालले एसिसी यू-१९ इलाइट कप क्रिकेट प्रतियोगितामा विजयी सुरुवात गरेको छ । कुवेतमा बुधबारदेखि सुरु भएको प्रतियोगिताको समूह 'बी' को खेलमा नेपालले साउदी अरेबियालाई १ सय ३७ रनको विशाल अन्तरले पराजित गरेको हो । नेपालको जितमा बायाँहाते बलर अमृत भट्टराईले ब्याटिङमा उत्कृष्ट प्रदर्शन गरे । म्यान अफ द म्याच अमृतले सानदार ८२ रनको अर्धशतकीय पारी खेलेपछि पहिलो ब्याटिङ गरेको नेपालले ४९ ओभरमा सबै विकेट गुमाई २ सय ३२ रनको योगफल बनायो । अमृतले ९३ बलको सामना गरी ९ चौका र २ छक्का प्रहार गरे । प्रत्युत्तरमा साउदी अरेबिया ३८ ओभर ३ बलमा ९६ रनमा समेटियो । लालबहादुर अधिकारी, सागर खड्का र अनिल मण्डलले उत्कृष्ट बलिङ गर्दै साउदी अरेबियालाई सस्तो रनमा अलआउट गर्‍यो । तीनैजना बलरले दुई/दुई विकेट लिए । यसैगरी, कप्तान ज्ञानेन्द्र मल्ल र पृथु बाँस्कोटाले एक/एक विकेट आफ्ना पोल्टामा राखे । साउदीलाई अली जमानले २० रनको सर्वाधिक पारी खेले । यसअघि, कप्तान ज्ञानेन्द्रले टस जितेर ब्याटिङ रोजेको नेपाली टोलीको ब्याटिङ निकै कमजोर भएको थियो । साउदीका वकारले पाँच विकेट लिइसक्दा नेपाल इनिङको एक समय ७६-७ कमजोर स्थितिमा थियो । नेपाललाई अमृत रोम -३२) र चन्द साउद (२८) साझेदारी गर्दै नेपाललाई २२१-९ को बलियो अवस्थामा ल्याए । यसैगरी, ज्ञानेन्द्र मल्लले २० रन जोडे । नेपाललाई अतिरिक्तिबाट ३२ रन प्राप्त भयो । प्रतियोगितामा खेल तालिका परिवर्तन भएपछि नेपालले अर्को खेल बिहीबार मलेसियासँग खेल्नेछ ।