ज्वाला सिंह र राजन मुक्तिबीच एकीकरण

लिम्वूवान डट व्लगस्पोट डटकम,काठमाडौं

तराईमा हतियारको राजनीति गर्दै आएका दुई भूमिगत संगठनबीच एकीकरण भएको छ । अज्ञात स्थानमा भएको वार्तापछि जनतान्त्रिक तराई मुक्ति मोर्चा ज्वाला सिंह समूह र मधेसी मुक्ति टाइगर्स राजन समूहबीच एकीकरण भएको हो । दुवै संगठनले तराईवासीलाई नै अपहरण गर्ने,चन्दा माग्ने र ज्यान लिनेसम्मका गतिविधि बढाएका छन् । भारतको अज्ञात स्थलमा चैत २८ गतेदेखि दुवै समूहका केन्द्रीय स्तरका नेताबीच भएको वार्तापछि पार्टीबीच एकीकरण भएको दुवै समूहका प्रमुख नेताद्वारा जारी विज्ञप्तिमा उल्लेख छ । वार्तामा मधेसमा विद्यमान शोषण र उत्पीडनको अन्त्यका लागि दुवै समूहबीच एकीकरण गर्ने सहमति भएको विज्ञप्तिमा जनाइएको छ । मधेसको मुक्तिको जनतान्त्रिक तराई मुक्ति टाइगर्सले शान्तिपूर्ण आन्दोलन गर्नेसमेत निर्णय गरेको विज्ञप्तिमा उल्लेख छ । पार्टी सञ्चालन गर्न राजन र ज्वाला सिंहलाई जिम्मा दिइएको छ । पार्टीको बैठकले भावी कार्यदिशाका लागि दुवै नेतालाई जिम्मा दिएको छ । दुई वर्षअघि राजन मुक्ति समूह जनतान्त्रिक तराई मुक्ति मोर्चा ज्वाला समूहबाट फुटेको थियो ।