स्वाइन फ्लुबाट मर्नेको संख्या एक सय ५२ पुगे

लिम्वूवान डट व्लगस्पोट डटकम,काठमाडौं

मेक्सिकोसिटी/ मेक्सिकोमा स्वाइन फ्लुबाट मर्नेको संख्या एक सय ५२ पुगेको छ । यस महामारीबाट मर्नेको संख्या अब घट्दै गएको जानकारी स्वास्थ्य मन्त्री जोसे एन्जेल कोर्दोभाले दिए । शनिबार स्वाइन फ्लु रोगबाट ग्रस्त भएको आशंका गरिएका ६ व्यक्तिको मृत्यु भएकोमा आइतबार पाँचजनाको मात्र मृत्यु भएको थियो । तर, सोमबार मृतकको संख्या अझै घटेर तीनजनामा मात्र सीमित भएको उनले जानकारी दिएका छन् । टेलिभिजनसँगको एक अन्तर्वार्तामा उनले सोमबार थप तीनजना सो रोगबाट मरेको खबर प्राप्त भएको बताए । मेक्सिकोमा स्वाइन फ्लुबाट २० जनाको मृत्यु भएको पुष्टि भइसकेको छ । र, एक हजार ६ सय १४ जनालाई विशेष निगरानीमा राखिएको छ । विभिन्न मुलुकले मेक्सिको भ्रमण नगर्न आफ्ना नागरिकलाई सल्लाह दिए पनि मेक्सिकोले विश्वसँगको व्यापारिक तथा पर्यटकीय सम्बन्ध स्थापित गर्ने धारणा मन्त्री कोर्दोभाले व्यक्त गरे । मेक्सिको भ्रमणबाट फर्केपछि बेलायत र स्पेनमा पनि प्राणघातक स्वाइन फ्लुको संक्रमण भएको पुष्टि भएको छ । मेक्सिकोसिटी स्वाइन फ्लु नामक महामारीको केन्द्र भएकाले त्यहाँका विद्यालयहरू बन्द गरिएको छ ।