३२ सहसचिव र ६२ उपसचिवलाई मन्त्रालयमा सिफारिस

लिम्वूवान डट व्लगस्पोट डटकम,काठमाडौं

लोकसेवा आयोगले विभिन्न सेवा समूहका ३२ सहसचिव र ६२ उपसचिवलाई सम्बन्धित मन्त्रालयमा सिफारिस गरेको छ । लिखित परीक्षा उत्तीर्ण गरेका उनीहरू अन्तर्वार्तामा पनि छनोट भएपछि सिफारिसमा परेका हुन् । खुला र आन्तरिक प्रतिस्पर्धाबाट उत्तीर्ण भएका सहसचिव र उपसचिव गरी ९४ जनालाई आयोगले सम्बन्धित मन्त्रालयमा सिफारिस गरेको हो । उनीहरू सबै विभिन्न निकाय र मन्त्रालयमा उपसचिव र शाखा अधिकृतमा कार्यरत थिए । आयोगले हालसम्म सहसचिव र उपसचिव गरि ४८ वटा विज्ञापनको अन्तर्वार्ता सम्पन्न गरी विभिन्न मन्त्रालयमा सिफारिस गरेको आयोग प्रवक्ता निरञ्जनप्रसाद उपाध्यायले जानकारी दिए । सो विज्ञापनको लिखित परीक्षा सम्पन्न भएर नतिजा आइसक्दा पनि एक वर्षदेखि अन्तर्वार्ता हुन सकेको थिएन । आयोगले सहसचिवको अन्तर्वार्ता सम्पन्न गरे पनि उपसचिवको अन्तर्वार्ता भने हाल जारी छ । आयोग पदाधिकारीविहीन भएपछि गत एक वर्षदेखि अन्तर्वार्ता, विभागीय कारबाहीसम्बन्धी परामर्श तथा बढुवा उजुरीसम्बन्धी कारबाही हुन सकेका थिएनन् । आयोगमा पदाधिकारी नियुक्ति फागुनको अन्तिम सातादेखि यी सबै कार्य सुचारु हुन पुगेका हुन् ।