प्रधानमन्त्री प्रचण्डको अन्तिम समयमा चीन भ्रमण स्थगित

लिम्वूवान डट व्लगस्पोट डटकम,काठमाडौं

प्रधानमन्त्री पुष्पकमल दाहाल प्रचण्ड को आसन्न चीन भ्रमण अन्तिम समयमा आएर स्थगित भएको छ। देशमा विकसित पछिल्लो राजनीतिक घटनाक्रम, प्रधानसेनापति रुक्मांगद कटवाललाई सरकारले लिएको स्पष्टीकरण र त्यसप्रति राष्ट्रिय तथा अन्तर्राष्ट्रिय क्षेत्रबाट भइरहेको गम्भीर समीक्षा एवम् आलोचनालाई मध्यनजर गर्दै प्रधानमन्त्री प्रचण्डले अन्तिम समयमा आएर भ्रमण स्थगित गर्नुभएको प्रमका प्रेस सल्लाहकार ओम शर्माले नेपाल समाचारपत्रलाई शनिबार जानकारी दिनुभयो।त्यस्तै परराष्ट्र मन्त्रालयका प्रवक्ता, सहसचिव तथा चाइना डेस्क हेर्ने प्रमुख अधिकारी सुरेशप्रसाद प्रधानले देशमा उत्पन्न जटिल राजनीतिक परिस्थितिका कारण नै प्रम प्रचण्डको भ्रमण हालका लागि स्थगित भएको बताउनुभयो।भ्रमणको लगभग सम्पूण तयारी भइसकेको थियो, मे पहिलो साताका लागि हामीले भ्रमण तयारी गरेका थियौ, प्रवक्ता प्रधानले भन्नुभयो- तर देशको जटिल राजनीतिक परिस्थितिका कारण प्रमको भ्रमण अहिलेका लागि स्थगित भयो। उहाँले देशको राजनीतिक अनुकूलता, चिनियाँ उच्चपदस्थ सरकारी अधिकारीको समय र अनुकूलतालाई हेरेर छिट्टै नयाँ भ्रमण मिति तय गरिने जानकारी भन्नुभयो।मन्त्रालयका अर्का एक अधिकारीले प्रमको भ्रमण हाललाई स्थगित हुनुमा चीनद्वारा प्रस्तावित नयाँ शान्ति तथा मैत्री सन्धिमा हस्तँक्षर नहुने पक्कापक्की हुनु पनि रहेको बताए।प्रम प्रचण्डले यही वैशाख १८ देखि २७ गतेसम्मका लागि चीन भ्रमण गर्ने गरी मन्त्रालयले तयारी अघि बढाएको थियो।