पहिरोमा पुरिएर एक परिवारका सातको मृत्यु

लिम्वूवान डट व्लगस्पोट डटकम,काठमाडौं

बाजुरा, २५ साउन,अविरल वर्षासँगै आएको पहिरोमा पुरिएर बाह्रबिसमा एक परिवारका सातको मृत्यु भएको छ । पहिरोमा एक बेपत्ता भएका छन् । बाह्रबिस-५ जुवापानीमा सोमबार राति आएको पहिरोमा पुरिएर मृत्यु हुनेमा भागी, महामती, रोशन, लक्ष्मी, सरिता, राजु र शंकर चदारा रहेका छन् । पहिरोमा अर्का एक बेपत्ता भएको स्थानीय बासिन्दा शेरबहादुर सार्कीले जानकारी दिए । जुवापानी पहिरोका कारण स्थानीय तीन घरपरिवार विस्थापित भएका छन् भने गाउँका करिब ३० परिवार जोखिममा रहेका छन् । विस्थापित तीन परिवार गाउँलेको शरणमा छन् । वर्षा भने रोकिएको छैन । प्रमुख जिल्ला अधिकारी योगेन्द्रप्रसाद पाण्डेले घटनास्थलमा इलाका प्रहरी कार्यालय टाँटे र डोगडीबाट प्रहरीको उद्धारटोली पठाइएको जानकारी दिए । बाह्रबिस गाविस सदरमुकामबाट करिब एक दिनको पैदलमा पुगिन्छ ।