यौन दुर्व्यवहार आरोपमा कार्यालय प्रमुख पक्राउ

लिम्वूवान डट व्लगस्पोट डटकम,काठमाडौं

विराटनगर, भाद्र २२ - सहायकस्तरकी महिला कर्मचारीमाथि यौन दुर्व्यवहारको आरोपमा विराटनगरस्थित जिल्ला पशु सेवा कार्यालयका प्रमुख डा. उदयप्रताप सिंह पक्राउ परेका छन् । उनीविरुद्ध उजुरी परेपछि मंगलबार प्रहरीले पक्राउ गरेको हो । गत वैशाखदेखि कार्यालयमा कार्यरत कर्मचारीले आफुमाथि पटक पटक दुर्व्यवहार गरेको र उनलाई खुसी पार्न नसकेको आरोप लगाइ जागिरबाट निकाला गरेको भन्दै गत आइतवार उजुरी दिएपछि उनी वेपत्ता भएका थिए । प्रहरी टोलीले आइतवार दिनभर खोजतसाल जारी राखेपनि डा. सिंहलाई फेला पार्न सकेको थिएन । सोमबार उनी भेटिएपछि पक्राउ गरि जिल्ला प्रहरीको हिरासतमा राखी कार्वाही अघि बढाइएको जिल्ला प्रहरी कार्यालय मोरङले जनाएको छ । गत साता कामबाट निकाला गरिएपछि ती महिला कर्मचारीले आफुले भोग्नु परेको दुर्व्यवहार बारे खुलासा गरेकी थिइन । कार्यालय प्रमुख संगीन विवादमा मुछिएपछि क्षेत्रीय पशु कार्यालयमा दुवै पक्षलाई राखेर प्रमुख डा. योगेन्द्र यादवले समाधान खोज्ने प्रयास गरेका थिए । दुवै पक्षले अडान नछाडेपछि घटना प्रहरीसम्म पुगेको हो । पक्राउ परेका सिंहलाई निलम्बन गरिएको छ ।