ऋषि धमलालाई साधारण तारेखमा रिहा गर्न आदेश

लिम्वूवान डट व्लगस्पोट डटकम,काठमाडौं

पुनरावेदन अदालत पाटनले रिपोटर्स क्लबका अध्यक्ष ऋषि धमलालाई साधारण तारेखमा छोड्न जिल्ला प्रशासन कार्यालयलाई आदेश दिएको छ । शुक्रबार न्यायाधीशद्वय आनन्दमोहन भट्टराई र मोहनप्रसाद घिमिरेको संयुक्त इजलासले धमलालाई थुनामा राख्नुपर्ने आधार नभएको भन्दै साधारण तारेखमा छोड्ने आदेश दिएको हो । जिल्ला प्रशासन कार्यालय काठमाडौंले फागुन तेस्रो साता हात हतियार खरखजना ऐन अन्तर्गत धमलालाई थुनामा राख्न आदेश दिएको थियो । पुनरावेदनले त्यसलाइ बदर गरेको छ । काठमाडौं प्रशासनले गरेको निर्णय बदर गर्न माग गर्दै धमलाले चैत २ गते पाटन अदालतमा निवेदन दिएका थिए । धमलाका तर्फबाट बरिष्ठ अधिवक्ता विश्वकान्त मैनाली तथा अधिबक्ताहरु शम्भु थापा, भिमार्जुन आचार्य, माधब बाँस्कोटा, विष्णु भट्टराई लगायत एक दर्जन वकिलले बहस गरेका थिए ।
सरकारका तर्फबाट सरकारी वकिल चन्द्र प्रकाश सापकोटा, ऋषिराम दवाडी र बज्रेस कुमार प्याकुरेलले बहस गरेका थिए । उनी सहित पक्राउ परेका रामशुभक महतो, वीरेन्द्र केएम र मनोज महतोलाई भने अदालतले जिल्ला अदालतकै निर्णयलाई सहि मानेको छ ।