तीन दलका शीर्ष नेताहरुको बैठक सुरु

लिम्वूवान डट व्लगस्पोट डटकम,काठमाडौं

माघ १० - सरकार निर्माण र संसद् नियमावली संशोधनका विषयमा छलफल गर्न तीन दलका शीर्ष नेताहरुको बैठक सुरु भएको छ । होटल र्‍याडिसनमा जारी बैठकमा तीन वटै दलका शीर्ष र दोस्रो तहका नेताहरु सहभागी छन् । यसअघि शान्ति मन्त्रालयमा बस्ने भनिएको बैठकस्थल अन्तिम समयमा परिवर्तन गरिएको हो । बैठकमा माओवादी अध्यक्ष पुष्पकमल दाहाल, उपाध्यक्षत्रय मोहन वैद्य, बाबुराम भट्टराई, नारायणकाजी श्रेष्ठ, कांग्रेस सभापति सुशील कोइराला, नेताहरु शेरबहादुर देउवा, विमलेन्द्र निधि, कृष्णप्रसाद सिटौला सहभागी छन् । यस्तै एमाले अध्यक्ष झलनाथ खनाल, स्थायी समिति सदस्य भरतमोहन अधिकारी, गृहमन्त्री एवम् एमाले केन्द्रीय सदस्य भीम रावललगायत बैठकमा सहभागी छन् । आइतबार बस्ने भनिएको शीर्ष बैठक माओवादी अध्यक्ष दाहाल चितवनबाट नफर्किएकाले बस्न सकेको थिएन । दाहालले यसअघि सोमबार बिहान कांग्रेस सभापति कोइरालासँग भेट गरी आफ्नो नेतृत्वको सरकार निर्माणमा सहयोग गर्न आग्रह गरेका थिए ।