केटी बेच्ने गिरोह प्रहरीको नियन्त्रणमा

लिम्वूवान डट व्लगस्पोट डटकम,काठमाडौं

धेरै धनसम्पत्ति कमाउने प्रलोभन देखाएर किशोरीहरूलाई बिक्री गर्न लगिरहेको आशङ्कामा नवलपरासीको प्रगतिनगरमा पाँचजनालाई स्थानीय बासिन्दाले नियन्त्रणमा लिई प्रहरीको जिम्मा लगाएका छन्। चितवन माडी बस्ने राजेश भनिने राहुल, पोखरा ढुङ्गाधारा निवासी श्याम पौडेल, सुरेश भन्ने मिलन विक, सावित्री सापकोटा र नाम नखुलेकी एक महिलासहित पाँचजनालाई स्थानीय बासिन्दाले नियन्त्रण लिएर इलाका प्रहरी कार्यालयको जिम्मा लगाएका हुन्। प्रगतिनगरमा शङ्कास्पद क्रियाकलाप गरेपछि उनीहरूलाई नियन्त्रणमा लिई सोधपुछ गर्दा बिक्रीका लागि भारततर्फ लैजान लागेको रहस्य खुलेपछि उनीहरूलाई प्रहरीको जिम्मा लगाइएको हो। रुपन्देहीको सालझण्डीकी १७ वर्षीया किशोरीलाई बेच्न हिँडेका अभियुक्तहरूलाई गाउँलेले प्रहरीलाई बुझाएका प्रहरीले जनाएको छ।