एमाले निकट एक युवाको गोली हानी हत्या

लिम्वूवान डट व्लगस्पोट डटकम,काठमाडौं

चितवन,भदौ १०- आपसी द्वन्द्वका कारण नेपाली काँग्रेससमर्थक युवाहरूको एक समूहले एमाले निकट एक युवाको गोली हानी हत्या गरेका छन्। चितवनको कविलास गाविस ५ केराबारी भन्ने स्थानका काँग्रेस युवा समूहले भरतपुर १ का २८ वर्षिय संजय लामाको शनिबार गोली हानी हत्या गरेका हुन्। घटनामा उनका साथी भरतपुर १२ का विनोद लामा घाइते भएका छन्। नारायणगढ मुग्लिन सडक अन्तर्गत केराबारी भन्ने स्थानको एक होटलमा शनिबार मध्यान्ह सवा १२ बजे साथीहरुसँग खाना खाएर आराम गरिरहेका संजयसहितका युवाहरुमाथि अर्को समूहले गोली प्रहार गरेको थियो। सँगैको साथीलाई गोली छेकेका संजयको उपचारका लागि चितवन मेडिकल कलेज ल्याईपुर्‍याउनासाथ मृत्यु भएको थियो। उनीहरु काठमाडौँट चितवन आउँदै गर्दा केराबारीस्थित एक होटलमा खानाखान बसेका थिए।

खाना खाएपछि होटल बाहिर बसिरहेका थियौं एक्कासी ड्याम ड्याम गोली हाने ,'गोली काण्डमा बच्न सफल घाइते बिनोद लामाले भने। अगाडि अगाडि सडकमा रातो गाडी थियो पछाडि मोटरसाइकलमा चिनेका व्यक्तिहरु नै थिए, उनले भने। उनका अनुसार तीनपटकसम्म गोली हानिएको थियो। घटनास्थलमा उपस्थितहरूका अनुसार गोली हान्ने समूहमा काँग्रेस भ्रातृ संगठन तरुण दलका चितवन अध्यक्ष शिव पौडेल,संगठनकै कुमार गुरुङ,कान्छी भनिने यमबहादुर कार्की, प्रमेश राई, कान कुईए भन्ने अनिल परियार, मुसे भन्ने बचन काकी,साजन गुरुङ, सुरेन्द्र गुरुङ, लुना र सुरेश नामका युवा रहेका छन्। ‘मलाई समेत तीन महिना अघिदेखि मार्ने धम्की दिइरहेका थिए, हत्या भएका संजयका साथी प्रकाश रेग्मीले भने. ‘आजै मार्छु भोली मार्छु भन्थे।' केही दिनअगाडि सोही समूहले आफ्ना साथी सुरज राईलाई नारायणगढ सडकमा खुलेआम आक्रमण गरेको उनले बताए। तर प्रहरीले कारबाही अगाडि नबढाउँदा अहिले हत्यामा उत्रिएको दाबी उनले गरे। चितवनका प्रहरीको लापरबाहीका कारण यो घटना भएको आरोप समेत उनीहरुले लगाए। दुई युवासमुहबीच पटक पटक आपसी झगडा भैरहेकोले घटना निम्तिएको प्रहरीको भनाई छ।

आपसी रिसइबीका कारण गोली प्रहार गरेको हुनसक्ने आशंका प्रहरीले गरेको छ। घटनामा संलग्न रहेको आशंकामा प्रहरीले एकजनालाई पक्राउ गरेको छ। घटनास्थलबाट गोलीका खोका समेत बरामद गरिएको मुग्लिन प्रहरीले बताएको छ। घटनास्थलमै टोली पठाएर थप अनुसन्धान चलिरहेको चितवनका प्रहरी प्रमुख रविन्द्र शर्माले बताए। घटनापछि आक्रोशित युवा समूहले चितवन मेडिकल कलेज अगाडि ना १७ प २८४७ नम्बरको सो मोटरसाइकल सडकमै जलाएका थिए। मोटरसाइकल कसको हो भन्ने नखुलेको प्रहरीले बताएको छ। घटनापछि आक्रोशित समूहले दिउँसोभर सडक अवरुद्ध पारेका थिए। भरतपुर दिनभर तनाबग्रस्त बनेको थियो। सवारीमा आएका तथा पैदल यात्रु र नजिकका बासिन्दा त्रस्त बनेका थिए। उनीहरुले घटनामा संलग्नहरुलाई कारबाही नगरेसम्म विरोधमा उत्रने जनाएका छन्। अन्य घटना हुन नदिन चितवन मेडिकल कलेज क्षेत्र तथा भरतपुर क्षेत्र वरपर प्रहरी परिचालन गरिएको छ।