पूर्वका जिल्लामा बन्द फिर्ता

लिम्वूवान डट व्लगस्पोट डटकम,काठमाडौं

इटहरी, भदौ १४- संघीय लिम्बुवान राज्य परिषद सन्जुहाङ् पालुङवा समूहले आह्वान गरेको बन्द फिर्ता भएको छ। बन्द फिर्ता भएपछि आज बिहानैदेखि पूर्वका जिल्लामा यातायात सुचारु भएको छ। झापा बिर्तामोडमा गएराति सरकारका तर्फबाट पूर्वाञ्चल क्षेत्रीय प्रशासक धरणीधर खतिवडा नेतृत्वको टोली र संघिय लिम्बूवान राज्य परिषद्का पदाधिकारीबीच भएको वार्तामा ५ बुँदे सहमति भएपछि बन्द फिर्ता भएको हो। वार्तामा सरकारसँग २०६४ चैत ६ गते भएको सहमति कार्यान्वयन गर्ने र अरुणपूर्वका नौ जिल्लालाई लिम्बुवान राज्य सुनिश्चित गर्न असोज ९ गते सरकारसँग पुनः वार्ता गर्ने सहमति भएको परिषदका महासचिब खेसेहाङ खजुमले जानकारी दिए। यसैगरी, थपिएको म्यादभित्र संविधान जारी गर्नुपर्ने, भ्रष्टचार, महंगी नियन्त्रण गर्ने र संघीय लोकतान्त्रिक गणतन्त्र तथा धर्मनिरपेक्षता कायम गर्ने सहमति भएको छ। तोकिएको समयमा संविधान जारी गर्न, संविधान मार्फत लिम्बुवान राज्य सुनिश्चित गर्न, शान्ति-सुरक्षा कायम गर्न माग राखेर पालुङ्वा समुहले सोमबारदेखि तीन दिने बन्द आह्वान गरेको थियो। बन्दले गर्दा दुई दिनसम्म पूर्वको जनजीवन कष्टकर भएको थियो।