भोलिदेखि माओवादी लडाकुको पुनःवर्गीकरण

लिम्वूवान डट व्लगस्पोट डटकम,काठमाडौं

भदौ १३- प्रधानमन्त्री बाबुराम भट्टराईले भोलिदेखि माओवादी लडाकुको पुनः वर्गीकरण प्रारम्भ गरिने बताएका छन्। पाँचबुँदे सहमति कार्यान्वयन, अनुगमन विशेष समितिको बैठकमा प्रधानमन्त्री भट्टराईले यस्तो जानकारी गराएको समितिका सदस्य एवं नेपाली कांग्रेसका नेता विमलेन्द्र निधिले बताए। प्रधानमन्त्रीले सेना समायोजन विशेष समितिमा हेरफेर भएपछि उक्त समितिको निर्णयअनुसार लडाकुहरुको सङ्ख्या निर्धारण, मापदण्ड र प्रारुप प्याकेजमा टुङ्गो लगाइने बैठकलाई जानकारी दिएका छन्। गत जेठ १४ गते संविधान सभाको म्याद थप्ने क्रममा प्रमुख तीन दलबीच भएको पाँच बुँदे सहमति कार्यान्वयनका लागि अनुगमन गर्न सभामुख सुवास नेम्वाङको संयोजकत्वमा संसदमा रहेका दलहरुको प्रतिनिधित्व गरी सो निर्णय समिति गठन गरिएको थियो।

सो समितिले आफ्नो कामको समीक्षा गर्दै समिति आज अन्तिम बैठक बसेको हो। समितिको म्याद यही भदौ १४ गतेसम्म तोकिएको थियो। बैठकमा सदस्यहरुले शान्ति प्रक्रियाको अनुगमनका लागि संसदबाट संसदीय अनुगमन समिति गठन गर्नुपर्ने सुझाव राखेको थियो।