बाबुराम भट्टराईद्वारा प्रधानमन्त्रीको उम्मेदवारी दर्ता

लिम्वूवान डट व्लगस्पोट डटकम,काठमाडौं

प्रस्तावक माओवादी अध्यक्ष पुष्पकमल दाहाल तथा समर्थकमा उपाध्यक्ष नारायणकाजी श्रेष्ठ र महासिचव रामबहादुर थापा रहेर माओवादी नेता डा. बाबुराम भट्टराईले शुक्रबार दिउँसो सवा ११ बजे प्रधानमन्त्रीका लागि उम्मेदवारी दर्ता गरेका छन् । अध्यक्ष दाहाल, उपाध्यक्ष श्रेष्ठ, महासचिव थापा, नेताहरु पोष्टबहादुर बोगटी, दिननाथ शर्मा, हिसिला यमीलगायत दुई दर्जन सभासद्हरुसहित आएका भट्टराईले संसदका महासचिव मनोहरप्रसाद भट्टराईको कार्यकक्षमा गएर उम्मेदवारी दर्ता गराएका हुन् । 'शान्ति र संविधानको लागि उम्मेदवारी दिएका हौं' माओवादी अध्यक्ष दाहालले मनोनयन दर्तापछि संवाददाताहरुलाई संक्षिप्तमा भने । माओवादी प्रबक्ता दीननाथ शर्माले उम्मेदवारी दिइसकेपछि पनि सहमतिको प्रयास जारी रहने बताए । प्रधानमन्त्रीका अर्का उम्मेदवार काँग्रेस संसदीय दलका नेता रामचन्द्र पौडेलले सवा १२ बजेतिर मनोनयन दर्ता गर्ने बताइएको छ ।