१५ दिनका लागि भट्ट विज्ञान मन्त्री शपथ

लिम्वूवान डट व्लगस्पोट डटकम,काठमाडौं

माओवादीले वाणिज्य तथा आपूर्ति मन्त्रीमा सिफारिस गरेका लेखराज भट्टले विज्ञान तथा प्रविधि मन्त्रीकारुपमा शपथ लिने भएका छन् । बाणिज्य तथा आपूर्ति मन्त्रालयका लागि मधेसी जनअधिकार फोरमले एक नेतालाई सिफारिस गरेपछि भट्टले विज्ञान मन्त्रीमा शपथ लिने भएका हुन् । आफूलाई सिफारिस गरिएकै मन्त्रालयमा शपथ नगराए पद अस्वीकार गर्ने चेतावनी दिएका भट्टलाई अध्यक्ष पुष्पकमल दाहालले १५ दिनका लागि विज्ञान मन्त्रालयको जिम्मेवारी हेर्न भनेका छन् । फोरम अध्यक्ष एवं उपप्रधान तथा परराष्ट्रमन्त्री उपेन्द्र यादवसँग टेलिफोन सम्पर्क गरी दाहालले आपूर्ति मन्त्रालयको दाबी छाड्न आग्रह गरेका थिए । जवाफमा यादवले उक्त मन्त्रालय पनि नपाए 'फेरि पनि पार्टी फुट्नेभो' भनेपछि दाहालले १५ दिनका लागि विज्ञान मन्त्री र पछि पुनः आपूर्ति मन्त्रालय नै पाउनेगरी शपथ लिन निर्देशन दिएका छन् । भट्टले आफू (पोलिट्ब्युरो सदस्य) भन्दा कनिष्ट (केन्द्रीय सदस्य)लाई राम्रा मन्त्रालय दिएकाले विज्ञान मन्त्रालयमा शपथ नलिने अडान राखेका थिए । मन्त्रालय बाँडफाटमा वाणिज्य तथा आपूर्ति मन्त्रालय फोरमको भागमा थियो । मन्त्रालयको जिम्मेवारी पनि अहिले उपप्रधान एवं परराष्ट्रमन्त्री उपेन्द्र यादवले सम्हालेका छन् । माओवादी पोलिट्ब्युरो सदस्य भट्ट कैलाली क्षेत्र नम्वर ५ बाट निर्वाचित हुन् । उनले यसअघि श्रम मन्त्रालयको जिम्मेवारी सम्हालिसकेका छन् ।