काँग्रेस केन्द्रीय कार्यसमितिको बैठकमा नेताहरुबीच तीब्र विवाद

लिम्वूवान डट व्लगस्पोट डटकम,काठमाडौं

कात्तिक दोस्रो साता बीरगञ्जमा तय गरिएको महासमितिको बैठकबारे छलफल गर्न बसेको नेपाली काँग्रेस केन्द्रीय कार्यसमितिको बैठकमा नेताहरुबीच तीब्र विवाद देखिएको छ । बैठकमा बोल्ने अधिंकाशं सदस्यहरुले तोकिएकै समयमा महासमितिको बैठक गर्नु पर्ने अडान राखेपछि नेताहरुबीच केही समय चर्काचर्की समेत भएको थियो । नेताहरुबीच विवाद बढेपछि बैठकले साझा प्रस्ताव तय गर्न पार्टीका तीन जना वरिष्ठ नेताहरु सुशिल कोइराला, शेरबहादुर देउबा र रामचन्द्र पौडेललाई जिम्मा दिएको छ ।महासमिति बैठक निर्धारित समयमा गर्ने या नगर्ने भन्ने बिषयमा पार्टीभित्र मतभेद कायम रहेको अवस्थामा महासमिति बैठकबारे ठोस निर्णय गर्न आज पार्टी मुख्यालय, सानेपामा केन्द्रीय समितिको बैठक डाकिएको हो । यही कात्तिक १५ देखि १७ गतेसम्म बीरगञ्जमा डाकिएको महासमिति बैठक रोक्नका लागि पार्टी सभापति गिरिजाप्रसाद कोइरालाले दबाब दिएपछि बैठक अन्यौलमा परेको थियो ।
कोइरालाले हिजो आफ्नै निवास, महाराजगञ्जमा पार्टी केन्द्रीय कार्यसमितिको अनौपचारिक बैठकमा महासमितिको बैठक रोक्न केन्दीय सदस्यहरुलाई पुनः आग्रह गर्नुभएको थियो । तर अधिकांश केन्द्रीय सदस्यहरुले महासमिति बैठक रोक्ने कोइरालाको प्रस्तावप्रंति आपत्ति जनाएपछि सभापति कोइराला विवाद नहुने भए महासमिति बैठक निर्धारित समयमा नै गर्न सहमत भएको बैठकमा सहभागी केही काँग्रेस नेताहरुले बताएका छन् । बैठकमा उपसभापतिद्वय रामचन्द्र पौडेल, गोपालमान श्रेष्ठ, महामन्त्री बिमलेन्द्र निधि, सहमहामन्त्री अर्जुननरसिंह केसी, नरहरि आचार्यले विधान संशोधन गर्न तथा राज्यको पुनर्संरचना र शासकीय स्वरुप सम्बन्धमा नीतिगत निर्णय गर्न महासमिति बैठक अत्यावश्यक रहेको स्पष्ट पार्नुभएको थियो । आजदेखि शुरु पार्टी केन्द्रीय समितिको बैठकले विधान संशोधन र राजनीतिक प्रस्ताव तयार पार्ने काम गर्ने नेपाली काँग्रेसका संसदीय दलका नेता रामचन्द्र पौडेलले जानकारी दिनुभयो ।