तीन दलको बैठक कुनै टुंगोमा पुग्न सकेन

लिम्वूवान डट व्लगस्पोट डटकम,काठमाडौं

असोज १६ जारी गतिरोध अन्त्यका लागि साझा संकल्प प्रस्ताव तयार पार्न बसेको तीन दलको बैठक शुक्रबार पनि कुनै टुंगोमा पुग्न सकेन। नेकपा एमालेले संसदमा लाने संकल्प प्रस्ताव तयार पार्न नसकेकाले शनिबार पुनः बैठक बस्ने गरी बैठक सकिएको थियो। प्रमुख विपक्षी एकीकृत माओवादी एवं सत्ता साझेदार कांग्रेस र एमाले राष्ट्रपतिको कदमको विषयमा साझा संकल्प प्रस्ताव लैजान सहमत भएका थिए। साझा संकल्प प्रस्तावमा राष्ट्रपतिलाई छुनै नहुने भन्ने कांग्रेस अडान र राष्ट्रपतिका विषयमा छलफल हुनुपर्ने भन्ने माओवादी अडान शुक्रबार पनि दोहोरिएको थियो।"सत्ता साझेदार दलहरूका तर्फबाट एमालेले लिखित प्रस्ताव तयार गर्ने भने पनि त्यो तयार नभएर छलफल हुन नसकेको हो," माओवादी नेता पोष्टबहादुर बोगटीले भने।स्रोतको भनाइमा प्रस्तावमा एमालेले राष्ट्रपतिको कदमका विषयमा केही उल्लेख गर्नुपर्ने र कांग्रसले केही उल्लेख हुनै नहुने भनेपछि विवाद उत्पन्न भएको हो।एमाले एक्लैले तयार पारेको लिखित प्रस्तावमा नेपालमा २००७ देखि ०६२/०६३को आन्दोलनसम्म नागरिक सर्वोच्चताको लागि आन्दोलन हुँदै आएकाले त्यसप्रति प्रतिबद्ध रहने उल्लेख गरिएको थियो। मस्यौदामा राष्ट्रपतिको भूमिका संवैधानिक राष्ट्राध्यक्षका रुपमा हुने कुरामा दलहरू प्रतिबद्ध रहने, कार्यकारी अधिकार मन्त्रिपरिषदमा रहने र त्यसका लागि कुनै व्यवस्था गर्नुपर्ने भएमा दलहरू त्यसका लागि तत्पर हुने पनि उल्लेख गरिएको थियो।त्यस्तै सहमतिको साझा मस्यौदामा सेनामाथि नागरिक नियन्त्रण रहने र नेपाली सेनाको लोकतान्त्रिकरण गर्न आवश्यक व्यवस्था गर्ने (आवश्यक परे अन्तरिम संविधानसम्मत हुने गरी सैनिक ऐनमा समेत संशोधन गर्ने) उल्लेख गरिएको थियो।