माओवादीले 'राजनीतिक सहमति हुन नसक्ने' निष्कर्ष

लिम्वूवान डट व्लगस्पोट डटकम,काठमाडौं

असोज १७ राष्ट्रपतिको कदम, नागरिक सर्वोच्चता लगायतका आफ्ना माग सम्बोधन नभए प्रमुख प्रतिपक्ष एकीकृत माओवादीले 'राजनीतिक सहमति हुन नसक्ने' निष्कर्ष निकालेको छ। तीन प्रमुख दलबीच साझा सहमति तयार पार्न बैठक जारी रहेका बेला पार्टी मुख्यालय कोटेश्वरमा शुक्रबार बसेको स्थायी समितिको बैठकले यस्तो निर्णय गरेको हो। 'राष्ट्रपतिले जुन गल्ती गरेका छन्, त्यसलाई सच्याउन र नागरिक सर्वोच्चतालाई सम्बोधन नगरिकन सहमति नगर्ने निर्णय भएको छ,' प्रवक्ता दिनानाथ शर्माले भने। उनले सदनमा संकल्प प्रस्ताव लान नदिने दलहरूको अडानलाई 'अधिनायकत्व' र 'फासीवाद'को संज्ञासमेत दिए। उनले भने, 'संकल्प प्रस्ताव लान नदिनु भनेको अधिनायकत्व र फासीवादी कुरा हो।'माओवादीले राष्टपतिविरुद्ध सदनमा संकल्प प्रस्ताव राख्न पाउनुपर्ने र त्यसको विषयमा जस्तो परिणाम आए पनि स्वीकार्ने बताउँदै आएको छ। सत्ता साझेदार कांग्रेस र एमाले भने लान नहुने अडानमा छन्।पार्टीले गरेको पहिलो चरणको एकमहिने आन्दोलन सफल भएको निष्कर्षसमेत निकालेको छ। उसले दलहरूसँग हुने छलफलका आधारमा आगामी रणनीति तयार पार्ने भएको छ। बैठकमा अध्यक्ष दाहालले राष्ट्रपति, दलका नेता र विभिन्न देशका राजदूतहरूसँग भएका छलफलबारे जानकारी गराएको प्रवक्ता शर्माले बताए। उनका अनुसार बैठकमा आगामी महाधिवेशनको तयारी र संगठन सुद्धृढीकरणका विषयमा पनि 'सामान्य छलफल भएको' थियो।महाधिवेशनमा प्रस्तुत गर्ने राजनीतिक प्रतिवेदन तयार पार्ने जिम्मा अध्यक्ष दाहाललाई र संगठनात्मक प्रतिवेदन तयार पार्ने जिम्मेवारी वरिष्ठ उपाध्यक्ष मोहन वैद्यलाई दिइएको छ। बैठक शनिबार फेरि बस्ने भएको छ।