युवाहरुको एक समूह र वाइसीएल कार्यकर्ताबीच कुटाकुट

लिम्वूवान डट व्लगस्पोट डटकम,काठमाडौं

इटहरी, असोज १७ सुनसरीको इटहरीमा शुक्रबार राति मादकपदार्थ सेवन गरेका युवाहरुको एक समूह र वाइसीएल कार्यकर्ताबीच कुटाकुट भएको छ। एकम्वा र मधेलीबाट मादक पदार्थ सेवन गरेका युवाको एक समूह इटहरी–७ को गाउँमा प्रवेश गरी जगबहादुर ऋषिदेवलाई धम्क्याएपछि वाइसीएलका स्थानीय कार्याकर्तासँग कुटाकुट भएको प्रहरीले जनाएको छ। मादकपदार्थ सेवन गरेका युवाको समूहले वाइसीएल कार्याकर्ता राजेश चौधरी, तेजनारायण चौधरी, दुखीलाल चौधरीलगायतलाई कुटपीट गरेका छन्। वाइसीएल कार्याकर्ताले पनि एकम्बा–७ का लालु चौधरी, गौतम चौधरी र मधेलीका हीरालाल चौधरीलाई कुटपीट गरेका छन्। स्थानीय युवा र वाइसीएल कार्याकर्ता कुटाकुट भएको घटनालाई शनिबार बिहान प्रहरीले आइन्दा गल्ती नगर्ने सर्तमा दुवै पक्षवीच सम्झौता गराए पनि वाइसीएल जिल्ला स्तरका कार्यकर्ताको दबाबमा ललित चौधरीलाई प्रहरीले पक्राउ गरेको छ। अन्य युवा भने फरार छन्। वाइसीएलका जिल्ला स्तरका कार्याकर्ताले इलाका प्रहरी कार्यालय इटहरीमा शनिबार दिउसो पुगेर आफ्ना कार्यकर्तालाई हातपात गर्ने युवालाई कडा कारबाही गर्न दबाब दिएको स्रोतले जनाएको छ। यसैबीच, हाँसपोसाका मुकेश बस्नेतको समूहले व्यक्तिगत रिसइवीले गर्दा अपहरण गरेका सोही ठाउँका रतन चौधरीको अवस्था अज्ञात छ। अपहरित चौधरीलाई सकुशल रिहाईका लागि थारु कल्याणकारिणी सभा र परिवारजनले आग्रह गरेका छन्। थारु कल्यणकारिणी सभा र परिवारजनले चौधरीको अपहरणमा संलग्न व्यक्ति पहिचान भइसकेकाले पक्राउ गरी कारबाही गर्न पनि माग गरेका छन्।